ផលិតផល ៧មុខដែលគេតែងណែនាំឲ្យប្រើញឹកញាប់ជាងគេ មុនអាយុ៣០ឆ្នាំក្រាស់មកដល់
- 2020-10-21 08:13:00
- ចំនួនមតិ 0 | ចំនួនចែករំលែក 0
ផលិតផល ៧មុខដែលគេតែងណែនាំឲ្យប្រើញឹកញាប់ជាងគេ មុនអាយុ៣០ឆ្នាំក្រាស់មកដល់
នៅពេលឈានចូលដល់វ័យ ៣០ + បញ្ហាស្បែកនឹងលេចឡើងជាលំដាប់ ដែលជាហេតុធ្វើឲ្យកាន់តែស្មុគស្មាញដោះស្រាយ។ ដូច្នេះ ដើម្បីរក្សាស្បែកឲ្យនៅតែសុខភាពល្អទាំងវ័យក្មេង និងមុនចូលអាយុ៣០ឆ្នាំក្រាស់ គួរប្រើផលិតផលទាំងនេះដើម្បីចិញ្ចឹមស្បែកមុខ ។
១. ឡេការពារកម្តៅថ្ងៃ
ផលិតផលមួយនេះ គឺមិនអាចខ្វះបានទេ មិនថាអ្នកអាយុប៉ុន្មានក៏ដោយ ព្រោះស្បែករបស់អ្នកតែងរងកម្តៅថ្ងៃជារៀងរាល់ថ្ងៃ។ សូម្បីតែនៅក្នុងផ្ទះ ក៏កាំរស្មីអាចឆ្លងចូលបានដែរ។ ពន្លឺព្រះអាទិត្យនឹងធ្វើឲ្យស្បែកមើលទៅកាន់តែចាស់ ស្រអាប់ ជាំខ្មៅ រោលក្រហម និងស្នាមអុជៗផងដែរ។ ចំពោះប្រភេទឡេការពារកម្តៅថ្ងៃដែលគួរប្រើ ត្រូវមានធាតុផ្សំសង្ក័សីអុកស៊ីត ឬទីតានៀមឌីអុកស៊ីត ព្រោះវាអាចការពារពីពន្លឺព្រះអាទិត្យបានយ៉ាងមានប្រសិទ្ធភាពជាងឡេការពារកម្តៅថ្ងៃធម្មតា ដែលមានត្រឹមតែ SPF។
២. សេរ៉ូមវីតាមីន C
វាត្រូវបានគេចាត់ទុកជាផលិតផលថែរក្សាសម្រស់ដែលគួរប្រើមុនអាយុ៣០ + ដើម្បីជួយជុសជុលស្បែកពីការបំផ្លាញរបស់ពន្លឺព្រះអាទិត្យ។ ម្យ៉ាងទៀត វាមានសារធាតុផ្សំពីអង់ទីអុកស៊ីដង់ ក្នុងការរំញោចនិងផលិតខូឡាជែន ដើម្បីកាត់បន្ថយបញ្ហាស្បែកយារធ្លាក់ និងចាស់មុនអាយុថែមទៀត។ លើសពីនេះ វាជួយឲ្យស្បែកសស្មើគ្នា កាត់បន្ថយស្នាមសន្លាកដោយសារមុន ព្រមទាំងជួយបំបាត់ស្នាមជ្រួញថែមទៀត។
៣. រ៉េទីនុល
ផលិតផលថែរក្សាសម្ពស្សដែលផ្ទុក រ៉េទីនុល ត្រូវគេចាត់ទុកថាជាផលិតផលប្រយុទ្ធប្រឆាំងភាពចាស់មុនអាយុបានយ៉ាងប្រសើរបំផុត។ ប្រសិនបើ អ្នកចង់ឲ្យរ៉េទីនុល កាន់តែមានប្រសិទ្ធភាពខ្ពស់ អ្នកគួរប្រើវាឲ្យបានមុនអាយុ ៣០ + ហើយត្រូវប្រញាប់ប្រើវាមុនពេលស្នាមជ្រួញ ព្រោះបើលេចស្នាមជ្រួញហើយ ច្បាស់ជាពិបាកព្យាបាលជាមិនខាន។
៤. ប្រើផលិតផលជម្រុះកោសិកាចាស់ៗចោល
ប្រសិនបើអ្នកកំពុងប្រើឡេចិញ្ចឹមថែរក្សាស្បែក ចំណុចពិសេសមួយគឺកុំភ្លេចប្រើផលិតផលជម្រុះកោសិកាចាស់ៗចោល។ វានឹងជួយជួសជុលស្បែកឲ្យមើលទៅស្មើគ្នាត្រលប់មកវិញ ហើយអាចជម្រុះចោលស្នាមជ្រួញ ឬស្នាមសន្លាកបន្សល់ពីកើតមុនបាន នៅពេលកោសិកាស្បែកចាស់ៗត្រូវបានជម្រុះចោល នោះស្បែកយើងនឹងមើលទៅទន់ហើយរលោង។ ម្យ៉ាងទៀត នៅពេលអ្នកលាបឡេលើស្បែក វានឹងជ្រាបចូលបានជ្រៅយ៉ាងល្អ។
៥. ហ្វូមលាងមុខមានជាតិកាត់ស្រាល
បើសិនជាអ្នកបានប្រើផលិតផលស្រ្កាប់ ឬ រ៉េទីនុល នោះអ្នកគួរជ្រើសយកហ្វូមលាងមុខដែលមានជាតិកាត់ស្រាលៗដើម្បីលាងមុខ ព្រោះវានឹងជួយការពារស្បែកក្នុងលក្ខខណ្ឌល្អ មិនងាយឲ្យស្បែករងការរោលក្រហាយកាន់តែខ្លាំង។
៦. ផលិតផលមានជាតិអាស៊ីត Hyaluronic
បញ្ហាចម្បងដែលមើលទៅឆាប់ចាស់ គឺមកពីស្បែកស្ងួត គ្មានជាតិទឹក។ ដូច្នេះ អ្នកគួរបន្ថែមជាតិសំណើមដល់ស្បែក ហើយមិនត្រូវបណ្តោយឲ្យស្បែកស្ងួតរយៈពេលយូរឡើយ។ ហេតុនេះ ផលិតផលដែលផ្ទុកអាស៊ីត Hyaluronic នឹងជួយឲ្យស្បែកមានជាតិទឹក មើលទៅស្មើគ្នា និងមិនងាយលេចស្នាមជ្រួញ និងចាស់មុនអាយុនោះទេ។
៧. ឡេលាបជុំវិញភ្នែក
ដោយសារតែស្បែកនៅជុំវិញបរិវេណភ្នែក មានសភាពស្តើងខ្លាំង ហើយវាក៏ជាសញ្ញាដំបូងបង្ហាញពីការឈានចូលដល់វ័យច្រើន ។ ដូច្នេះបើមិនចង់ឲ្យមានស្នាមជ្រួញកើតឡើងងាយៗទេ អ្នកគួរតែចិញ្ចឹមស្បែកនៅជុំវិញភ្នែក ដោយមិនត្រូវកង្វះឡេឡាបជុំវិញភ្នែកឡើយ។ ត្រូវតែរក្សាស្បែកនៅជុំវិញឲ្យមានសំណើមជានិច្ច ដើម្បីកាត់បន្ថយស្នាមជ្រួញឲ្យមានប្រសិទ្ធភាព៕