មូលហេតុធំៗ ធ្វើឲ្យអ្នកចេះតែឈឺក្បាលមិនឈប់នៅពេលព្រឹក
- 2020-09-21 07:27:00
- ចំនួនមតិ 0 | ចំនួនចែករំលែក 0
មូលហេតុធំៗ ធ្វើឲ្យអ្នកចេះតែឈឺក្បាលមិនឈប់នៅពេលព្រឹក
ជឿថាមនុស្សជាច្រើនប្រហែលជាធ្លាប់មានបទពិសោធន៍ឈឺក្បាលនៅពេលព្រឹកមិនខាន ទាំងដែលមិនទាន់បានធ្វើកិច្ចការអ្វីមួយសោះ។ វាធ្វើឲ្យអ្នកមានអារម្មណ៍មិនល្អ ឬឈឺក្បាលពេញមួយថ្ងៃក៏មាន។ នេះអាចបណ្តាលមកពីកត្តាធំៗទាំងនេះ៖
១. សម្រាកមិនបានគ្រប់គ្រាន់
អ្នកប្រហែលជាដឹងរួចហើយថា មនុស្សក្នុងមួយថ្ងៃត្រូវសម្រាកឲ្យបាន ៧ -៨ ម៉ោង។ បើសិនជាគេងមិនគ្រប់គ្រាន់ទេ វានឹងបណ្តាលឲ្យចង្វាក់បេះដូងលោតញាប់ សម្ពាធឈាមកើនឡើង ដែលទាំងនេះនឹងនាំឲ្យស្រ្តេសហើយជាលទ្ធផលនឹងធ្វើឲ្យឈឺក្បាលមិនខាន។ បើសិនជាអ្នកក្រោកឡើងហើយមានសញ្ញាបែបនេះ គួរតែចំណាយពេលសម្រាកបន្ថែម ២០ -៣០ នាទី ហើយកុំធ្វើការហួសកម្លាំង ព្រោះវានឹងធ្វើឲ្យអ្នកកាន់តែឈឺក្បាលថែមទៀតមិនខាន។
២. គេងច្រើនពេក
នេះគឺផ្ទុយពីចំណុចទី១បន្តិច។ គេងច្រើនម៉ោងពេក ធ្វើឲ្យមានផលអវិជ្ជមានដល់រាងកាយ ដែលវាឈានទៅដល់ការថយចុះនៃអរម៉ូន serotonin ក្នុងខ្លួន។ ចរន្តឈាមតិចក្នុងខួរក្បាលនឹងធ្វើឲ្យឈឺក្បាលផងដែរ។
៣. កម្រិត endorphins ក្នុងរាងកាយទាប
Endorphins ក្នុងរាងកាយអាចជួយឲ្យមនុស្សមានអារម្មណ៍រីករាយនិងស្រស់ស្រាយបាន។ តែចំពោះអ្នកខ្លះវិញ ពួកគេមានកម្រិត Endorphins ទាបនៅពេលព្រឹក។ ហេតុនេះ ទើបធ្វើឲ្យមានអាការៈឈឺក្បាលដោយគ្មានមូលហេតុដូច្នេះ។ វិធីដោះស្រាយ ត្រូវធ្វើលំហាត់ប្រាណស្រាលៗ ដើម្បីរក្សារាងកាយឲ្យដូចដើម និងផលិត Endorphins ឡើងវិញ។
៤. ស្រមុក
សម្រាប់អ្នកគេងស្រមុក ជាទូទៅកម្រិតអុកស៊ីសែនចូលទៅក្នុងខួរក្បាលបានតិចតួច ជាហេតុធ្វើឲ្យសសៃសម្ពាធឈាមប៉ោងឡើង។ នេះក៏ជាមូលហេតុ ធ្វើឲ្យអ្នកកាន់តែឈឺក្បាលខ្លាំងឡើងផងដែរ។
៥. កង្វះកាហ្វេ
ទម្លាប់របស់មនុស្សមួយចំនួននៅពេលព្រឹក តែងផឹកកាហ្វេ ហេតុនេះបើដល់ពេលវេលានោះគេមិនបានផឹកទេ ច្រើនតែមានអាការៈឈឺក្បាល។ ដូច្នេះ ប្រសិនបើអ្នកមានសញ្ញាបែបនេះ កាហ្វេមួយពែងប្រហែលជួយកាត់បន្ថយបាន។
៦. ផ្លូវចិត្តរងសម្ពាធ
នៅពេលផ្លូវចិត្តរងសម្ពាធ វាមិនត្រឹមធ្វើឲ្យអ្នកមានអារម្មណ៍មិនស្រណុកចិត្តនិងពិបាកចិត្តនោះទេ តែវាក៏ធ្វើឲ្យក្បាលរបស់អ្នកឈឺដែរ។ នេះដោយសារតែកម្រិតអរម៉ូន serotonin ក្នុងរាងកាយធ្លាក់ចុះ។ ម្យ៉ាងទៀត វានឹងជះឥទ្ធិពលដល់ដំណេក ថែមទៀត។ បើសិនជាអ្នកមិនអាចដោះស្រាយផ្លូវចិត្តពីខាងក្នុងទេ នោះលទ្ធផលអាក្រក់នឹងរងដល់ខួរក្បាលនិងរាងកាយអ្នកមិនខាន។ ប្រញាប់រកវិធីដោះស្រាយឲ្យបានលឿន ដើម្បីព្យាបាលខ្លួនអ្នកឲ្យបានប្រសើរឡើង។
៧. សម្ពាឈាមខ្ពស់
បើជាញឹកញាប់ អ្នកឧស្សាហ៍ឈឺក្បាលដោយគ្មានមូលហេតុនៅពេលព្រឹក នោះអាចមកពីសម្ពាធឈាមឡើងខ្ពស់មិនខាន។ កញ្ញា សុំណែនាំអ្នកឲ្យប្រញាប់ទៅជួបគ្រូពេទ្យដើម្បីព្យាបាលទើបជាប្រការល្អ៕