តារាសម្ដែងល្បីឈ្មោះហុងកុង ធ្លាក់ខ្លួនក្លាយជាកម្មករលីសែង ព្រោះគ្មានរឿងថតយូរខែ
- 2020-09-07 02:12:00
- ចំនួនមតិ 0 | ចំនួនចែករំលែក 0
តារាសម្ដែងល្បីឈ្មោះហុងកុង ធ្លាក់ខ្លួនក្លាយជាកម្មករលីសែង ព្រោះគ្មានរឿងថតយូរខែ
កម្រងរូបភាពកាលពីពេលថ្មីនេះរបស់តារាសម្ដែងប្រុសហុងកុង ២ដួងគឺ Chen Guo Feng និង Mo Jia Jin បានធ្វើឲ្យទស្សនិកជនទប់អារម្មណ៍សឹងមិនបាន នៅពេលតារា២រូបនេះ ត្រូវទៅលីសែង ដើម្បីចិញ្ចឹមគ្រួសារ។
កាលពីថ្ងៃទី ៦ ខែកញ្ញាកន្លងទៅនេះ បណ្ដាញព័ត៌មាន ON បានរាយការណ៍ថា តារាសម្ដែងប្រុសជើងចាស់២ដួងគឺ Chen Guo Feng និង Mo Jia Jin ត្រូវបានគេប្រទះឃើញកំពុងធ្វើជាកម្មករលីសែង នៅការដ្ឋានសាងសង់មួយ។ តាមនោះដែរ តារាទាំង២ត្រូវធ្វើការងារដើម្បីផ្គត់ផ្គង់គ្រួសារ ដោយសារសម័យកូវីដ ១៩ គ្មានរឿងឲ្យថត។
ជាក់ស្ដែង ប្រុសស្អាតទាំង២ទទួលបានប្រាក់ ១២០ដុល្លារ សម្រាប់ការលីសែងចំនួន ៩ម៉ោង។ ទោះបីជាថវិការមិនជាច្រើនក្ដី តែគ្រប់គ្រាន់ដើម្បីឲ្យសិល្បករទាំង២ផ្គត់ផ្គង់គ្រួសារ។ កម្រងរូបភាពអ្នកទាំង២អង្គុយញ៉ាំបាយតាមផ្លូវធ្វើឲ្យទស្សនិកជនអាណិតពួកគេជាខ្លាំង។
តារាសម្ដែងទាំង២ខាងលើ ជាតារាកុងត្រាជាមួយ ប៉ុស្តិ៍ TVB តែដោយសារគ្មានរឿងថត ពួកលោកទទួលបានប្រាក់ខែគោលបន្តិចបន្តួចប៉ុណ្ណោះ។ ចែករំលែកនឹងបណ្ដាញព័ត៌មាន លោកទាំង២ប្រាប់ថាមិនមែនមានតែពួកលោកទេដែលត្រូវចេញមករកការងារក្រៅ ដោយនៅមានតារាតូចធំជាច្រើនទៀតក៏ត្រូវធ្វើដូចលោកដែរ៕