ចង់ថែមនោសញ្ចេតនាមួយឲ្យមាំ ពឹងតែនិស្ស័យមិនទាន់គ្រប់ទេ បើភាគីទាំងសងខាងមិនរក្សា
- 2020-08-02 14:00:00
- ចំនួនមតិ 0 | ចំនួនចែករំលែក 0
ចង់ថែមនោសញ្ចេតនាមួយឲ្យមាំ ពឹងតែនិស្ស័យមិនទាន់គ្រប់ទេ បើភាគីទាំងសងខាងមិនរក្សា
យើងបានជួបគ្នានៅកណ្ដាលហ្វូងមនុស្សជាច្រើនរាប់មិនអស់ និស្ស័យបណ្ដាលឲ្យយើងក្លាយជាគូនឹងគ្នា។ តែបើមិនចេះរក្សាទេ យើងនឹងរសាត់ឆ្ងាយពីគ្នាពីពេលណាក៏មិនដឹង។ មុនពេលជួបគ្នា យើងទាំង២សុទ្ធតែអ្នកធ្លាប់មានសង្សារពីមុនទាំងអស់។ រយៈពេលខ្លីក៏មាន ជ្រាលជ្រៅក៏មាន តែមិនយល់ថាមកពីហេតុអ្វី គ្រាន់តែជួបគ្នាភ្លាម យើងទាំង២ហាក់ដូចជាស្គាល់គ្នាពីយូរណាស់មកហើយ។ ឃើញភ្លាម ក៏ចង់កាន់ដៃគ្នា ដើម្បីសាងគ្រួសារមួយ ទោះបីជាតួចក៏ដោយ។ អ្វីដែលរឹតតែប្លែកនោះគឺ គាត់ក៏មានអារម្មណ៍ដូចគ្នាដែរ។ នោះគឺជាអារម្មណ៍មនោសញ្ចេតនាដំបូងរបស់ពួកយើង។ តែទេវតាមានដែលឲ្យអ្នកណាមួយអ្វីទាំងអស់ឯណា។ ពេលកើតមក ពួកយើងសុទ្ធតែមានចិត្តគំនិតខុសគ្នា។
ជួបគ្នាហើយ បើចង់នៅក្បែរគ្នាយូរអង្វែង រំពឹងតែលើពាក្យនិស្ស័យមួយម៉ាត់គឺមិនអាចឆ្លងផុតរាល់ឧបសគ្គឡើយ។ ជាពិសេសនៅក្នុងសង្គមនាសម័យមានភាពទាក់ទាញច្រើនដូចបច្ចុប្បន្ន ប្រហែសតែបន្តិចក៏អាចបាត់បង់គ្នាបាត់ទៅហើយ។
សុភមង្គលគឺមិនសំដៅទៅលើគោលដៅចុងក្រោយដែលយើងទទួលបានឡើយ តែវាស្ថិតលើវិថីដែលយើងពុះពារដើម្បីទៅដល់គោលដៅមួយនោះ។ បើនិស្ស័យបណ្ដាលឲ្យយើងបានជួបគ្នាហើយ សូមកុំប្រញាប់ដោះដៃគ្នា ដោយសារតែរឿងតូចតាច បើនៅមានចិត្តលើគ្នា។ បើថ្ងៃណាមានអារម្មណ៍ថាធុញគ្នា សូមគិតដល់អនុស្សាវរីយ៍ដំបូងដែលយើងសាងនឹងគ្នា ឬរយៈពេលដែលយើងធ្លាប់ពុះពារអ្វីខ្លះទម្រាំបានដល់សព្វថ្ងៃ។
ខណៈមនុស្សជាច្រើនកំពុងស្វែងរកយ៉ាងស្វិតស្វាញទម្រាំរកគូរបស់ខ្លួនឃើញ ចុះហេតុអ្វីយើងជាអ្នកដែលរកគ្នាហើយ បណ្ដាលឲ្យរបូតចេញពីគ្នាដោយសារតែរឿងតូចតាចនោះ។ ស្រលាញ់គ្នាប៉ុន្មានឆ្នាំមកនេះ បើនិយាយពីចង់បែកគ្នាវិញគឺរាប់ភ្លេចទៅហើយ តែដោយសារតែព្យាយាមទាំងសងខាងទើបរក្សាគ្នាបានដល់សព្វថ្ងៃ។ ដូច្នេះហើយ បើរំពឹងតែលើពាក្យនិស្ស័យមួយ ម្ល៉េះពួកយើងមិនបាននៅដល់សព្វថ្ងៃឡើយ។ និស្ស័យឲ្យយើងជួបគ្នា តែយើងត្រូវព្យាយាមទាំងសងខាងដើម្បីរក្សាគ្នា៕