មកស្វែងយល់នូវវិធីសំខាន់ៗដើម្បីគ្រប់គ្រងខួរក្បាល ការពារខ្លួនពីភាពស្រ្តេសធ្ងន់ធ្ងរ

2020-07-24 00:00:00
ចំនួនមតិ 0 | ចំនួនចែករំលែក 0

ក្នុងចំណោមការគិតរាប់លានមុខ មាន៨ប្រភេទដែលកើតឡើងនៅក្នុងខួរក្បាលជារៀងរាល់ថ្ងៃ។ ទន្ទឹមជាមួយគ្នានេះដែរ ជ្រុងមួយនៃការគិតរបស់មនុស្ស តែងតែអាចបង្កទៅជាបញ្ហាបានគ្រប់ពេលវេលា ដែលធ្វើឲ្យពួកគេនឿយហត់ ជាមួយនឹងភាពស្មុគស្មាញចាក់ដោតនៅក្នុងខួរក្បាល។

មិនថាការគិតទាំងនោះ បណ្តាលមកពីក្តីព្រួយបារម្ភ ស្រ្តេស ភាពភ័យខ្លាច ឬអ្វីផ្សេងឡើយ។ ក្នុងអត្ថបទនេះនឹងធ្វើការបកស្រាយពី "ការគិតមមៃហួសប្រមាណ" ដែលចាត់ទុកជាមូលហេតុចម្បង នាំឲ្យអ្នកពិបាកក្នុងការគ្រប់គ្រងខ្លួនឯង។

គំនិតរវើរវាយ

ជាទូទៅមនុស្សម្នាក់ៗតែងស្រមើស្រមៃនឹកគិតដល់រឿងល្អៗនិងរំពឹងចង់ឲ្យវាកើតមានឡើងនៅក្នុងជីវិតប្រចាំថ្ងៃ។

ទស្សនវិទូអាមេរិកដ៏ល្បីម្នាក់ មកពីសាកលវិទ្យាល័យ Harvard មានឈ្មោះថា Charles Sanders Peirce បានបង្កើតគំនិតថ្មីមួយនៅក្នុងសតវត្សទី១៩ ដោយផ្អែកទៅលើ "ការអនុវត្តជាកស្តែង” (Pragmatism) មានន័យថា ការគិតគឺជាធាតុផ្សំសំខាន់ ដែលមានសិទ្ធិបញ្ជាទៅលើទង្វើរបស់អ្នក ថែមទាំងអាចនាំមកនូវបទពិសោធថ្មីៗ។ គំនិតដែលល្អនិងមានប្រយោជន៍ គួរយកវាមកអនុវត្តផ្ទាល់ក្នុងជីវិត រីឯគំនិតរវើរវាយដែលមិនអាចកើតឡើងនិងគ្មានប្រយោជន៍ ត្រូវព្យាយាមជម្រុះចោលឲ្យអស់។

ក្រៅពីនោះទស្សនវិទូដ៏ល្បីម្នាក់ទៀតគឺលោក William James បានអះអាងថា អាវុធដែលមានថាមពលខ្លាំងបំផុត អាចប្រឆាំងនឹងភាពស្រ្តេសបាន គឺការគ្រប់គ្រងខួរក្បាល ដោយបង្កើតគំនិតវិជ្ជមានឲ្យច្រើនលើសលប់ជាងគំនិតអវិជ្ជមាន។

វិធីសំខាន់ក្នុងការគ្រប់គ្រងចិត្ត

ការគិតគឺជាឧបករណ៍ដ៏សំខាន់ សម្រាប់គ្រប់គ្រងខ្លួនឯង។ កុំដោយសារតែតម្រូវការផ្ទាល់ខ្លួន បណ្តោយឲ្យខួរក្បាលគិតហួសព្រំដែន រហូតមិនអាចទប់ទល់បាន ថែមទាំងមិនដឹងថាខ្លួនឯងកាន់តែលេចលង់ជ្រៅទៅៗ។

ខាងក្រោមនេះគឺជាគំនិត ដែលតែងដក់ជាប់ក្នុងខួរក្បាល នៅពេលដែលអ្នកមិនព្រមគ្រប់គ្រងខ្លួនឯង៖

តើខ្ញុំកំពុងគិតពីអ្វីហ្នឹង?

តើនឹងមានអ្វីរឿងអ្វីកើតឡើងទៅ បើខ្ញុំមានកំហុសហើយបាត់បង់ការងារ?

តើគេស្រលាញ់ខ្ញុំដែរអត់?

គ្មាននរណាស្រលាញ់និងខ្វាយខ្វល់ពីខ្ញុំទេ។

ខ្ញុំធ្វើខុសរហូត។

ហេតុអ្វីជីវិតពិបាកយ៉ាងនេះ?

ហេតុអ្វីមើលទៅជីវិតគេផ្សេងមានសុភមង្គលម្ល៉េស?

បើថ្ងៃណាមួយខ្ញុំកើតមហារីក តើខ្ញុំគួរធ្វើបែបណា?

តើអ្នកផ្សេងគិតមកលើខ្ញុំយ៉ាងម៉េចទៅ?

ខ្ញុំមិនដែលធ្វើអ្វីបានជោគជ័យម្តងណាទេ។

អារម្មណ៍បែបនេះ មិនអាចកែប្រែអ្វីបាន ក្រៅពីបង្កើនក្តីបារម្ភ ការខឹង ការស្តីបន្ទោសខ្លួនឯង និងឈឺចាប់តែម្នាក់ឯងនោះទេ។ គួរជំនួសមកវិញ ដោយគំនិតល្អៗ ដើម្បីជួយឲ្យគ្រប់យ៉ាងប្រសើរឡើង។

១. គិតពីដំណោះស្រាយ ដោយប្រើប្រាជ្ញានិងការពិចារណារបស់អ្នក ដើម្បីមលុបបំបាត់បញ្ហាបន្តិចម្តងៗ។ ទោះមិនទាន់ឃើញលទ្ធភាពភ្លាមៗ ក៏អ្នកអាចនៅមានកម្លាំងចិត្តនឹងដោះស្រាយបន្តមិនបោះបង់ចោល។

២. ស្វែងរកចំណេះដឹងថ្មីៗបន្ថែមពីមជ្ឈដ្ឋានជុំវិញខ្លួន និងព្យាយាមយកវាទៅអនុវត្តក្នុងការងារ របររកស៊ី ទំនាក់ទំនងជាដើម។

៣. ផ្តោតតែលើរឿងសំខាន់២យ៉ាងដំបូងគេបង្អស់ ហើយទុករឿងបន្ទាប់បន្សំផ្សេងទៀតនៅមួយឡែកសិន។ បើអ្នកខ្វាយខ្វល់គិតពីបញ្ហាច្រើនយ៉ាងពេកក្នុងពេលតែមួយ អ្នកនឹងកាន់តែពិបាកក្នុងការគ្រប់គ្រប់ស្មារតី ធ្វើអ្វីក៏មិនចេញ។ ហេតុនេះគួរហ្វឹកហាត់ចិត្តគំនិត បង្កើនសមត្ថភាពក្នុងការគ្រប់គ្រងអារម្មណ៍ខ្លួនឲ្យបានមូលល្អជាមុនសិន។

៤. ប្រើម្រាមដៃបញ្ចេញសំឡេងដើម្បីដាស់សតិ ទាញខ្លួនឯងមកវិញ នៅពេលគិតស្រមើស្រមៃច្រើន ហើយងាកមកធ្វើរឿងចាំបាច់នៅចំពោះមុខវិញ។

៥. កុំនៅស្តីបន្ទោសខ្លួនឯងដដែលៗពេលមានកំហុស គួររកវិធីដោះស្រាយ ហើយបើស្រាយមិនចេញទេ ចាត់ទុកថាវាជាមេរៀនទៅចុះ។

ជាចុងក្រោយ ទស្សនវិទូ William James បានរំឮកទៀតថា "ប្រសិនបើអ្នកអាចផ្លាស់ប្តូរចិត្តគំនិតបាន នោះអ្នកនឹងអាចផ្លាស់ប្តូរជីវិតរបស់ខ្លួនឯងបានដូចគ្នា"។

ត្រូវចាំថានរណាក៏មានទុក្ខដែរ គ្រាន់តែយូរនិងឆាប់ទម្រាំវាអាចបាត់ទៅវិញ ឬលេចចេញនៅថ្ងៃណាមួយផ្សេងទៀត មិនអាចទាយដឹងមុន។ ត្រូវរៀនរស់ជាមួយសុខនិងទុក្ខ បន្តការជឿជាក់ រៀនគ្រប់គ្រងខ្លួនឯង រៀនគិតគូរពិចារណាដោយប្រើហេតុផល ទើបអ្នកគ្មានថ្ងៃចុះចាញ់នឹងជិវិត៕

ចុចអានបន្ត៖ មេរៀនសំខាន់គ្មាននៅសាលា ដែលអ្នកគួរស្វែងយល់ឲ្យបានច្បាស់ពីជីវិត

ប្រភព៖ akerufeed ប្រែសម្រួល៖ ដេត ឈុនអ៉ី