ប្រើផលិតផលថែរក្សាស្បែកឲ្យត្រូវតាមម៉ោងទាំងនេះ ស្បែកនឹងស្អាតមិនចាញ់តារាកូរ៉េឡើយ
- 2020-07-22 07:05:00
- ចំនួនមតិ 0 | ចំនួនចែករំលែក 0
ប្រើផលិតផលថែរក្សាស្បែកឲ្យត្រូវតាមម៉ោងទាំងនេះ ស្បែកនឹងស្អាតមិនចាញ់តារាកូរ៉េឡើយ
អ្នកមានដែលឆ្ងល់ទេថា ហេតុអ្វីប្រើផលិតផលតែមួយតែស្បែកគេស្អាតជាង ហើយស្បែកយើងនៅអាក្រក់ដដែលដែរទេ។ មូលហេតុគឺម៉ោងដែលយើងលាបមិនត្រូវនឹងក្បួនខ្នាតនៅក្នុងម៉ោងថែរក្សាស្បែក។ ដើម្បីទទួលបានលទ្ធផលអតិបរិមា អ្នកគួរលាបផលិតផលនានាតាមម៉ោងខាងក្រោម៖
១. ម៉ោង៦ព្រឹក ពេលវេលាមាសសម្រាប់លាងស្បែកគ្មានសារជាតិកាត់
មនុស្សជាច្រើនប្រើហ្វូមលាងមុខពេលយប់ និងពេលព្រឹកតែមួយ ដោយមិនបែងចែកឡើយ។ យ៉ាងណាក្ដី នៅពេលព្រឹកទើបក្រោកពីដំណេក ដែលស្បែកមិនបានចេញក្រៅជាប់ធូលីហុយអីនោះ យើងមិនគួរប្រើហ្វូមដែលមានជាតិកាត់ខ្លាំងពេកនោះទេ ដែលអាចធ្វើឲ្យស្ងួតមុខខ្លាំង បាត់ជាតិប្រេងធម្មជាតិពីមុខ ធ្វើឲ្យឆាប់ជ្រីវជ្រួញ។
២. ម៉ោង ៨ព្រឹក ពេលល្អបំផុត
មុនចេញពីផ្ទះ មនុស្សមួយចំនួនតែងលាបឡេ ឬសេរ៉ូមដើម្បីឲ្យស្បែកមានសំណើមពេញមួយថ្ងៃ។ យ៉ាងណាក្ដី តាមស្បែកមនុស្សខុសគ្នា យើងអាចរំលងជំហានមួយចំនួន។ ប៉ុន្តែអ្នកដាច់ខាតមិនអាចរំលងជំហានឡេការពារកម្ដៅថ្ងៃបានឡើយ។ កាំរស្មីអ៊ុយត្រាចាប់ផ្ដើមខ្លាំងឡើងនៅម៉ោង ៩ ដូចនេះល្អបំផុត គឺអ្នកគួរលាបឡេនេះនៅម៉ោង ៨ព្រឹក។
៣. ម៉ោង ១២ថ្ងៃ ពេលល្អបំផុតក្នុងការបន្ថយកម្ដៅស្បែក
ម៉ោង ១២ថ្ងៃត្រង់គឺជាពេលដែលក្ដៅបំផុតនៅក្នុងថ្ងៃ ហើយក៏ពេលកម្ដៅស្បែកឡើងខ្លាំងបំផុតដែរ។ នៅពេលស្បែកក្ដៅខ្លាំង គឺងាយកើតជាមេឡានីន ដែលធ្វើឲ្យស្បែកខ្មៅស្រអាប់ ជាំ អេចម៍រុយ។ ដើម្បីកាត់បន្ថយបញ្ហានេះ អ្នកអាចស្ព្រាយបាញ់មុខដើម្បីបន្ថយកម្ដៅស្បែក។
៤. ម៉ោង ៤រសៀល ពេលល្អបំផុតសម្រាប់ផ្ដិតខ្លាញ់ពីមុខ
ជឿជាក់ថា ផាត់មុខពីព្រលឹម រហូតដល់ម៉ោងនេះ ខ្លាញ់ប្រាកដជាចេញមកច្រើនហើយ។ បើខ្លាញ់នៅលើមុខច្រើនពេក ក្រៅពីបាត់សោភណ្ឌភាពននោះ ក៏ងាយធ្វើឲ្យបិទរោមញើស ក្លាយជាមុនក្បាលខ្មៅ និងឡើងមុនផងដែរ។ វិធានការដែលល្អបំផុតនោះគឺ បើក្រដាសផ្ដិតជាតិខ្លាញ់ជំនួសឲ្យការតប់ម្សៅថែម។ ព្រោះវាមិនត្រឹមតែធ្វើឲ្យស្បែកស្រឡះនោះទេ វាថែមទាំងមិនកកម្សៅដូចគ្នា។
៥. ម៉ោង ៨ ដល់១០ ពេលល្អបំផុតសម្រាប់ថែស្បែក
ក្រោយបំពេញការងារនៅខាងក្រៅហត់ពេញមួយថ្ងៃ ម៉ោងខាងលើ គឺពេលវេលាដែលសមស្របបំផុតក្នុងការលុបគ្រឿងសំអាងទាំងអស់ ហើយចាប់ផ្ដើមលាបផលិតផលថែរក្សាស្បែកមកវិញ។ ដើម្បីសារជាតិថែរក្សាស្បែកជ្រាបចូលស្បែកបានល្អ អ្នកគួរលាបមុនចូលគេងយ៉ាងតិច ២ម៉ោង៕