មេរៀនល្អៗដែលនារីសម័យថ្មីគួរចេះ មុនពេលទាក់ទងបុរសណាម្នាក់
- 2020-07-03 10:35:00
- ចំនួនមតិ 0 | ចំនួនចែករំលែក 0
មេរៀនល្អៗដែលនារីសម័យថ្មីគួរចេះ មុនពេលទាក់ទងបុរសណាម្នាក់
កុំទាន់អាលប្រញាប់មានទំនាក់ទំនងស្នេហាជាមួយបុរសណាម្នាក់អី បើអ្នកមិនទាន់បានរៀនសូត្រពីមេរៀនល្អៗនៅទឡើយ។
ប្រាកដណាស់ប្រសិនបើអ្នកជានារីសម័យថ្មី អ្នកច្បាស់ជាដឹងថា រាល់ការណាត់ជួបក្នុងលក្ខណៈជាស្នេហាមិនមែនជារឿងងាយស្រួលឡើយ។ ស្នេហ៍ពិតកាន់តែពិបាករក និងទាមទារនូវភាពអត់ធ្មត់ ការចំណាយពេលវេលា ការសង្កេតតាមដានទម្រាំអាចសម្លឹងឃើញនរណាម្នាក់ដែលខ្លួនត្រូវចិត្ត។ ដរាបណាអ្នកបានជួបហើយនោះ គួរដឹងពីចំណុចទាំងនេះ មុននឹងឈានចូលដល់ការចាប់ផ្តើម។
មិនក្រអើតក្រទមពេក ប៉ុន្តែក៏មិនគួរប្រគល់ស្នេហាឲ្យគេដោយងាយពេកដែរ
របស់ដែលបានមកដោយងាយស្រួលពេក មិនមែនជាអ្វីដែលមនុស្សប្រុសប្រាថ្នាចង់បានឡើយ។ បុរសភាគច្រើនតែងចង់ធ្វើអ្វីគ្រប់យ៉ាង ឬបង្ហាញពីការលះបង់ដើម្បីទទួលបានក្តីស្រលាញ់ពីអ្នក។ យ៉ាងណាមិញ ក្នុងកាលៈទេសៈបែបនេះ មិនមែនមានន័យថាអ្នកត្រូវតែបញ្ចេញចរិតក្រអើតក្រទម ធ្វើមិនអើពើនោះទេ។ គួរបង្ហាញសញ្ញាចាប់អារម្មណ៍ខ្លះៗត្រលប់ទោវិញ ប៉ុន្តែត្រូវទុកពេលបន្តិចសិនដើម្បីឲ្យគាត់បញ្ចេញសមត្ថភាពនិងអារម្មណ៍ពិត មុននឹងយល់ព្រមប្រគល់ស្នេហាទៅឲ្យ។
ត្រូវដឹងថាមនុស្សប្រុសភាគច្រើនមិនមែនទាក់ទងនារីតែម្នាក់ក្នុងពេលតែមួយ
គាត់អាចនឹងមានទំនាក់ទំនងជាមួយនារីដទៃទៀត ក្នុងអំឡុងពេលដែលកំពុងតែទាក់ទងជាមួយនឹងអ្នក។ ហេតុនេះហើយគួរត្រៀមចិត្តទុកមុន មិនថាអ្នកចូលចិត្តឬអត់ក៏ដោយ តែបញ្ហានេះតែងជៀសមិនផុត ក្នុងដំណាក់កាលដែលមនុស្សពីរនាក់ ត្រឹមជាសង្សារនឹងគ្នា។
កុំវាយតម្លៃថាមនុស្សប្រុសទាំងអស់សុទ្ធតែមិនល្អ
មិនខុសពីមនុស្សស្រីប៉ុន្មានទេ មនុស្សប្រុសមានអាក្រក់ហើយក៏នៅមានអ្នកល្អដែរ។ អ្នកមិនអាចមើលតែមួយផ្នែកតូចរួចវាយតម្លៃទាំងអស់ដាច់ខាត។ ក្នុងជីវិតប្រចាំថ្ងៃតែងមិនខ្វះទេប្រភេទមនុស្សចម្រុះខុសៗគ្នា គ្រាន់តែមិនអាចមើលដឹងតែសំបកក្រៅ មានតែពេលវេលាប៉ុណ្ណោះទើបអាចបកស្រាយនូវការពិតបាន។
ត្រូវប្រកាន់ជំហរជាខ្លួនឯងជានិច្ច
ទោះបីស្ថិតក្នុងទំនាក់ទំនងស្នេហាជាមួយបុរសណាក៏ដោយ ស្រលាញ់គេខ្លាំងយ៉ាងណាក៏ដោយ ដាច់ខាតកុំភ្លេចស្រលាញ់ខ្លួនឯងសោះ ជាពិសេសមិនត្រូវព្យាយាមផ្លាស់ប្តូរបុគ្គលិក្ខណៈទាំងស្រុង ដើម្បីតែតម្រូវចិត្តដៃគូឡើយ។
ដំណោះស្រាយដោយការនិយាយតទល់គ្នាមានប្រសិទ្ធភាពជាងការសរសេរតាមទូរសព្ទ
ការនិយាយឬសរសេរផ្ញើតាមទូរសព្ទមិនមែនជាដំណោះស្រាយល្អទេ នៅពេលអ្នកទាំងពីរមានបញ្ហា។ ជំនួសមកវិញដោយការនិយាយទល់មុខ មើលក្រសែភ្នែក ទើបមានប្រសិទ្ធភាព។
មានដំណាក់កាលជាច្រើនដែលត្រូវឆ្លងកាត់មុននឹងស្គាល់ភាពជោគជ័យ
ការណាត់ជួបតែមួយលើកមិនមែនមានន័យថាអ្នកអាចស្គាល់ភាពជោគជ័យចំពោះរឿងស្នេហាទេ។ អ្នកត្រូវលះបង់ពេលវេលា កម្លាំងកាយនិងចិត្ត មិនរំពឹងខ្ពស់ហួសប្រមាណ ទម្រាំអាចកសាងក្តីស្នេហ៍រឹងមាំមួយ។ ត្រូវចាំថាគ្រប់រឿងល្អៗទាំងអស់នៅក្នុងជីវិត គឺមិនមែនអាចរកបានដោយងាយស្រួល៕
ចុចអានបន្ត៖ ខូចចិត្តដោយសារស្នេហាមែនទេ? នេះជាវិធីកាត់ចិត្តប្រើពេលតែ ១០ ថ្ងៃប៉ុណ្ណោះ