៤ ដំណោះស្រាយធ្វើឲ្យអ្នកលែងគិតថា៖ ហេតុអ្វីគេម្នាក់ៗសុទ្ធតែមានសុភមង្គលជាងខ្ញុំ

2020-06-15 03:00:00
ចំនួនមតិ 0 | ចំនួនចែករំលែក 0

មានពេលខ្លះ ក្ដីសុខគឺគ្រាន់តែសាមញ្ញថា បោះចោលអស់រាល់គំនិតអវិជ្ជមានទាំងឡាយដែលកំពុងវិលជុំវិញក្បាលយើង ហើយគិតពីក្ដីសុខតូចៗដែលនៅជុំវិញយើងវិញ។

មនុស្សមួយចំនួនជួបប្រទះបញ្ហាដោយសាររកសុភមង្គលឲ្យខ្លួនឯងមិនឃើញ។ ពួកគេនៅតែវិលវល់ចុះឡើង ហើយក្ដីព្រួយបារម្ភមានមិនចប់ ទាំងដែលពួកគេមិនសូវមានបញ្ហាអ្វីពិតប្រាកដសោះ។ តាមការពិត ការពិបាកចិត្តនោះមិនមែនចេញពីខ្លួនយើងឡើយ តែដោយសារតែមជ្ឈដ្ឋានជុំវិញខ្លួន។ ខាងក្រោមនេះគឺជាវិធីមួយចំនួន ដែលយើងអាចរកសេចក្ដីសុខដាក់ខ្លួន ដោយមិនច្រណែននឹងអ្នកដទៃ។

១. ផ្អាកប្រើបណ្ដាញសង្គមមួយរយៈសិន

មនុស្សគ្រប់គ្នា មានគោលដៅ និងផ្លូវដើរខុសគ្នាៗ។ ការដែលអ្នកដើរយឺតជាងគេ មិនប្រាកដថាគេនឹងដល់គោលដៅមុនយើងឡើយ។ កុំស្រងាកចិត្តពេលឃើញគេបង្ហោះចូលហាងធំៗ ជិះឡានទំនើបៗ ព្រោះយើងមានដឹងឯណាថាពីក្រោយរូបទាំងនោះ គេមានទុក្ខអ្វីខ្លះ។ ដូចនេះហើយ ដើម្បីរំងាប់ចិត្ត អ្នកអាចចាកចេញពីគ្រប់បណ្ដាញសង្គមមួយរយៈសិន។

២. នៅក្បែរតែមនុស្សធ្វើល្អដាក់យើង

នៅពេលនៅក្បែរមនុស្សដែលមិនឲ្យតម្លៃយើង ចាំតែធ្វើបាបយើង យើងនឹងមានអារម្មណ៍ថា ផែនដីគឺពិតជាអយុត្តិធម៌ខ្លាំងណាស់ ព្រោះជួបតែមនុស្សអាក្រក់។ តែអ្នកមានដែលគិតថា នៅមានមនុស្សល្អជាច្រើនទៀតដែលនៅក្បែរខ្លួនយើង បារម្ភពីយើង។ ដច្នេះហើយ ប្រសិនបើគេមិនពេញចិត្តយើង ច្រណែនឈ្នានីសយើង អ៊ីចឹងយើងគ្រាន់តែមិនរវល់នឹងគេ ដើរចេញពីគេ គឺរកក្ដីសុខបានហើយ។

៣. យកសុភមង្គលរបស់ខ្លួនឯងជាឥទ្ធិភាពទី១

មនុស្សយើងមិនតិចរូបឡើយ ដោយសារតែសម្ពាធសង្គម មាត់អ្នកផង សុខចិត្តលះបង់ក្ដីសុខខ្លួនឯងដើម្បី ឲ្យបានឈ្មោះថា ចូលស្ទឹងតាមបទ។ តែការដែលចូលស្ទឹងតាមបទនេះ បែរជាធ្វើឲ្យយើងរងចិត្តផ្លូវចិត្តទៅវិញ។ ជាក់ស្ដែង យើងមិនចង់បានគ្រួសារសោះ តែដោយសារខ្លាចមាត់អ្នកដទៃ ក៏ទ្រាំលេបថ្មលេបគ្រោះយកតាមគេ។ ចុងបញ្ចប់ដូចយកថ្មមកសង្កត់ដើមទ្រូងខ្លួនឯង។

៤. លើកលែងឲ្យខ្លួនឯង និងអ្នកដទៃ

នៅពេលយើងធ្វើខុសអ្វីមួយ មិនថាតូច ឬធំ តែងមានកូនចិត្តវិប្បដិសារី ហើយចងចាំមិនភ្លេច។ តែត្រូវចាំថា កំហុសគឺជាម្ដាយនៃជោគជ័យ បើយើងមិនខុស ជោគជ័យក៏មិនមកដែរ។ ហើយនៅពេលដែលកំហុសត្រូវបានសាងរួចហើយ ទោះស្ដាយក្រោយក៏កែប្រែមិនបានដែរ។ នៅពេលគេធ្វើខុសលើយើង ហើយយើងចង់សងសឹកនោះ ប្រាកដជាតឹងទ្រូងលើសដើម។ ដូចនេះហើយ ត្រូវចេះរៀនលើកលែង ឲ្យខ្លួនឯង និងអ្នកដទៃដើម្បីចិត្តបានធូរស្រាល៕

ប្រភព៖ Kenh14 ប្រែសម្រួល៖ Caramel