រឿងសំខាន់ៗដែលមនុស្សស្រីនៅលីវយូរត្រូវប្រាប់ខ្លួនឯងជានិច្ច

2020-06-03 01:50:00
ចំនួនមតិ 0 | ចំនួនចែករំលែក 0

តើអ្នកកំពុងត្រូវមិត្តភក្ដិបង្អាប់ជាញឹកញាប់ដោយសារ គេមានសង្សារ ឬរៀបការអស់ហើយ ហើយអ្នកបន្តអាជីពនៅលីវទៀតមែនទេ? តាមពិត នៅលីវយូរមានអីមិនល្អ? ថ្ងៃនេះ កញ្ញា នឹងនាំអាទិ៍គ្នាយើងនិយាយពីរឿងសំខាន់ៗមួយចំនួនសម្រាប់ស្រីៗយើងដែលមិនទាន់មានគូត្រូវដាស់តឿនខ្លួនឯងជារឿយៗ មិនគួរបំភ្លេច។

១.វាគង់តែមានបុរសល្អម្នាក់មកដល់មិនខាន

កុំគិតថាអាយុខ្លួនចេះតែចាស់ទៅៗ ហើយអ្នកនឹងគ្មានអ្នកណាយកអី? មនុស្សទោះបីអាយុច្រើនយ៉ាងណាក៏គង់តែដល់គូមិនខាន គ្រាន់តែត្រូវរង់ចាំមើល Mr. Right មិនទាន់មកដល់តែប៉ុណ្ណោះ។ គ្រប់គ្នាសុទ្ធតែមានលក្ខណៈសម្បត្តិល្អរៀងៗខ្លួនដើម្បីទទួលបានក្ដីស្រលាញ់ដ៏ស្មោះស្ម័គ្រមួយសម្រាប់បន្តជីវិតគូឱ្យបានយូរអង្វែង។ ដូច្នេះកុំចាំបាច់អង្គុយតូចចិត្តរាល់យប់ទៀតអី។

២. កុំខ្លាចនឹងសាកទាក់ទងបុរសច្រើននាក់

ក្នុងពេលកំពុងនៅលីវបែបនេះ កុំខ្លាចក្នុងការសាកល្បងទាក់ទងបុរសដែលខ្លួនគិតថាសក្ដិសម ហើយកុំរអានឹងការបែកគ្នា ព្រោះបើពេលទាក់ទងគ្នា យើងមើលឃើញថា មិនអាចរស់នៅជាមួយគ្នាបាន ក៏លែងដៃគ្នាទៅ។ មិនចាំបាច់ទ្រាំកាន់ដៃ ទាំងគ្មានក្ដីសុខឡើយ ព្រោះនេះគ្រាន់តែជាដំណាក់កាលមើលចិត្តគ្នា មិនមានចំណងអ្វីមកចងរុំពិបាកស្រាយឯណា។

មួយវិញទៀត ការទាក់ទងមនុស្សច្រើននាក់ ក៏មិនមែនបានន័យថា អ្នកជាមនុស្សស្រីចិត្តសាវាដែរ។ បើអ្នកមិនទាន់ប្រកាសថាទទួលអ្នកណាម្នាក់នៅឡើយ គួរចំណាយពេលរាប់អានអ្នកផ្សេងទៀតដើម្បីមើលចិត្ត និងដឹងពិតប្រាកដថា អ្នកណាដែលត្រូវគ្នាជាមួយអ្នក។ ប៉ុន្តែចំណុចនេះ បើមិនប្រាកដប្រជានឹងគេ គួរកុំផ្ដល់ក្ដីសង្ឃឹមឱ្យគេគិតថាយើងស្រលាញ់គេដែរ ឬប្រើគេដើម្បីប្រៀបធៀបជាមួយអ្នកផ្សេងទៀត។ វិធីល្អ គឺរាប់អានជាមិត្តភក្ដិសិន ហើយចាំលួចមើលតាមក្រោយក៏បាន។

ចុចអាន៖ កុំឲ្យនៅអាល័យជីវិតនៅលីវ គួរធ្វើរឿងទាំងនេះឲ្យហើយសិន សឹមរៀបការ

៣. កុំទទួល ឬបង្កើតស្នេហា ព្រោះតែចង់បានប្ដី ឬខ្លាចភាពឯកោ

នៅម្នាក់ឯងគ្មានអ្វីគួរឱ្យខ្លាចទេ តែបើមានគូហើយ ត្រូវកើតទុក្ខ ឬគេធ្វើបាបទើបជារឿងដែលគួរឱ្យខ្លាចពិតប្រាកដ។ នារីៗមួយចំនួន ដោយសារខ្លាចពាក្យគេបង្អាប់ ឬខ្មាសគេ ឬអាយុច្រើនផង ទើបត្រូវបង្ខំចិត្តទទួលយកក្ដីស្រលាញ់ពីបុរសម្នាក់ដោយមិនបានពិនិត្យ និងស្វែងយល់ពីគេឱ្យច្បាស់លាស់។ ការស្វែងយល់ពីនរណាម្នាក់មិនមែនត្រឹមតែឃើញគេសង្ហា មានលុយចាយច្រើន មានការងារខ្ពង់ខ្ពស់ ឬមានគ្រួសារមានវង្សត្រកូលល្អតែមួយមុខនោះទេ។ វាត្រូវការចំណាយពេលយូរក្នុងការសាកល្បងចិត្តគេ ដោយមើលលើសកម្មភាព និងការសាកសួរពីអ្នកធ្លាប់ស្គាល់ពីគេឱ្យបានច្រើនជាងនេះ។

៤. ប្រើពេលនៅលីវនេះដើម្បីយល់ពីខ្លួនឯងឱ្យច្បាស់សិន

បើអ្នកមានសង្សារ ឬមនុស្សដែលខ្លួនស្រលាញ់ អ្នកអាចនឹងភ្លេចចំណាយពេលដើម្បីខ្លួនឯង។ អ្នកត្រូវការពេលសម្រាប់នៅក្បែរគេ ធ្វើអ្វីដើម្បីគេច្រើន រហូតភ្លេចពីខ្លួនឯងក៏មាន។ ដូច្នេះ ទាន់នៅមានពេលវេលា អាចយកពេលនេះមករៀនស្វែងយល់ពីខ្លួនឯងបន្ថែម ធ្វើអ្វីដែលខ្លួនឯងចង់បាន និងរីករាយឱ្យអស់ចិត្តសិនក៏មិនទាន់យឺតពេលដែរ។ មិនអ៊ីចឹង?

៥. ផ្ដោតលើអ្វីដែលអ្នកកំពុងមាន ជាជាងអ្វីដែលអ្នកមិនទាន់មាន

កុំយករឿងអវិជ្ជមានទាំងឡាយមកដាក់ក្នុងខួរក្បាលច្រើនពេក។ ពេលវេលានេះ អ្នកគួររីករាយនឹងអ្វីដែលខ្លួនកំពុងមាន ស្រដៀងនឹងចំណុចទី៤ខាងលើដែរ ហើយកុំយកខ្លួនឯងទៅប្រៀបធៀបនឹងអ្នកដទៃ ហើយមកអង្គុយកើតទុក្ខថា ហេតុអ្វីគេមាន ហើយយើងមិនអាចមានដូចគេធ្វើអី? ចំណាយពេលមើលថែសុខភាពខ្លួនឯងឡើងវិញ ដើរលេងជាមួយមិត្តភក្ដិឱ្យសប្បាយចិត្ត និងធ្វើអ្វីជាមួយគ្រួសារដ៏កក់ក្ដៅប្រសើរជាង៕

ចុចអាន៖ ឃើញមិត្តភ័ក្ដិមានប្ដី-កូនអស់ ខ្លួនឯងនៅលីវដដែល កុំព្រួយ នេះជាហេតុផលអ្នកគួរបន្ត Single

ប្រភព៖ bestie ប្រែសម្រួល៖ សរ សុគន្ធី