តិចនិកខ្លីៗ ជួយឱ្យអ្នកឆាប់គេងលក់ស្កប់ស្កល់

2020-05-29 07:00:00
ចំនួនមតិ 0 | ចំនួនចែករំលែក 0

មនុស្សដែលមិនបានគេងលក់ស្កប់ស្កល់តែងឆាប់ខឹងមួម៉ៅ ពិបាកអត់ធ្មត់ មានអារម្មណ៍មិនភ្លឺស្វាងស្រស់ថ្លានិងបាត់បង់ភាពរឹងមាំ។ មូលហេតុទាំងនេះអាចបណ្តាលមកពីការលេបថ្នាំ ឬការគិតច្រើន និងភាពតានតឹងធុញថប់ជាដើម។ សូម្បីតែទម្លាប់រស់នៅនិងការហូបចុកមិនល្អ ក៏អាចបង្កទៅជាបញ្ហាបែបនេះដែរ។ ខាងក្រោមនេះ ជាតិចនិកខ្លីៗ អាចជួយឱ្យអ្នកឆាប់គេងលក់ លែងបញ្ឈរភ្នែកឬរសាប់រសល់ច្រើនដូចមុនទៀត។

តិចនិក ១០វិនាទី ដើម្បីគេងលក់

បិទភ្នែករបស់អ្នក ដោយពុំចាំបាច់ប្រឹង និងព្យាយាមបន្ធូរភាពតានតឹងលើផ្ទៃមុខជាមុន ហើយត្រូវដកដង្ហើមចេញចូលយឺតៗនិងវែងៗ។

បន្ធូរផ្នែកស្មា និងដៃ ដោយទម្លាក់ឲ្យស្របនឹងដងខ្លួន ហើយលាត្រដាងឲ្យធូរស្រាល។
បន្ធូរផ្នែកទ្រូងដោយការដកដង្ហើមឱ្យបានវែងនិងយឺតៗ។
បន្ធូរផ្នែកជើង ត្រគាកនិងប្រអប់ជើង ដោយចាប់ផ្តើមពីផ្នែកជើងខាងស្តាំមុនគេ។
ក្នុងរយៈពេល១០ វិនាទី អ្នកនឹងងងុយគេងមិនខាន។

តិចនិក ៦០វិនាទី ដោយប្រើវិធី ៤-៧-៨

វិធីនេះបានបង្កើតឡើងដោយលោកវេជ្ជបណ្ឌិត Andrew Weil សម្រាប់គ្រប់គ្រងផ្លូវដង្ហើម។ បើអ្នកអាចអនុវត្តបានរាល់ថ្ងៃ អ្នកនឹងមានអារម្មណ៍ធូរស្បើយអាចគេងលក់ឆាប់រហ័ស។

ជំហានដំបូង ត្រូវដកដង្ហើមចេញ ឬបញ្ចេញតាមមាត់ក៏បាន។
ជំហានបន្ទាប់ ត្រូវបិទមាត់និងបង្ហើបតិចៗ នៅពេលត្រូវដកដង្ហើមបញ្ចេញតាមមាត់មកវិញ ឲ្យបាន៤ដង។
បន្ទាប់មកទៀត ត្រូវទប់ដង្ហើមបន្តិចសិន រាប់ឲ្យគ្រប់៧ដង ចាំដកធម្មតាវិញ។

ចុងក្រោយបង្អស់ ត្រូវដកដង្ហើមឲ្យខ្លាំងៗ ដោយបញ្ចេញសំឡេងមកជាមួយ ហើយរាប់ឱ្យគ្រប់ ៨ដង សឹមឈប់។

តិចនិក ៦០វិនាទី ដោយប្រើវិធីសម្រួលសាច់ដុំ

សម្រាប់វិធីនេះបានបង្កើតដោយលោក Edmund Jacobson តាំងពីឆ្នាំ១៩៣០មកម្ល៉េះ ព្រោះគាត់ជឿជាក់ថា ការសម្រួលសាច់ដុំ អាចជួយដល់ដំណេកបានយ៉ាងមានប្រសិទ្ធភាព។

ដាក់ដៃឱ្យត្រង់ (ធ្វើដូចជាពេលពត់ខ្លួន) រយៈពេល ៥វិនាទី បន្ទាប់មកត្រូវសម្រាករយៈពេល ១០វិនាទី។
សម្រួលផ្នែកថ្ងាស ដោយមិនគិតច្រើនជ្រួញចិញ្ចើម។
សម្រួលភ្នែកនិងថ្ពាល់។
សម្រួលសាច់ដុំមាត់ ថ្គាម។
សម្រួលផ្នែកក ឱ្យបានធូរស្រាលដោយមិនបាច់ប្រឹង។

តិចនិក ១២០វិនាទី ដោយការសំងំ

នេះជាវិធីមួយ ដែលជួយការពារអ្នកមិនឱ្យគិតរវើរវាយច្រើន។ ទោះបីគេងមិនលក់ក៏ដោយ ត្រូវតាំងចិត្តសំងំស្ងៀម ហើយគិតថាអ្នកនឹងគេងលក់ឆាប់ៗ។

តិចនិក ១២០វិនាទី ដោយគិតដល់កន្លែងស្ងប់ស្ងាត់

មូលហេតុចម្បងដែលបណ្តាលឲ្យគេងមិនលក់ គឺដោយសារតែអ្នកតានតឹងធុញថប់ខ្លាំងពេក ដូច្នោះហើយ អ្នកគួរតែគិតដល់រូបភាពល្អៗ កន្លែងស្ងប់ស្ងាត់ បង្កើនសន្តិភាពផ្លូវចិត្ត ដើម្បីឲ្យឆាប់គេងលក់។

តិចនិក ១២០វិនាទី ដោយការបន្ថយកម្តៅក្នុងរាងកាយ

អ័រម៉ូនម្យ៉ាងឈ្មោះថា មេឡាតូនីន មានតួនាទីសំខាន់ក្នុងការបន្ថយកម្តៅក្នុងរាងកាយ នៅពេលដែលអ្នកគេង។ ប្រសិនបើរាងកាយឡើងកម្តៅ វានឹងធ្វើឲ្យអ្នកពិបាកគេងខ្លាំងណាស់។ ដំណោះស្រាយ រួមមាន ការបើកបង្អួច ស្លៀកសម្លៀកបំពាក់រលុងស្រួលខ្លួន និងផឹកទឹកត្រជាក់១កែវ មុនពេលចូលគេង។

ជំងឺគេងមិនលក់ អាចបង្កទៅជាបញ្ហាធំៗដូចជា កើតជំងឺទឹកនោមផ្អែម ឡើងសម្ពាធឈាម និងការឈឺចុកចាប់ផ្សេងៗ។ ក្រៅពីវិធីរៀបរាប់ខាងលើ នៅមានវិធីបន្ទាប់បន្សំមួយចំនួនទៀត ក៏អាចជួយឱ្យអ្នកឆាប់គេងលក់ផងដែរ។