ចំណុចពិសេសនៅក្នុងខ្លួនមនុស្សស្រីរឹងមាំនិងឯករាជ្យ ដែលនាំឲ្យបុរសទប់ចិត្តមិនលង់មិនបាន
- 2020-05-22 09:20:00
- ចំនួនមតិ 0 | ចំនួនចែករំលែក 0
ចំណុចពិសេសនៅក្នុងខ្លួនមនុស្សស្រីរឹងមាំនិងឯករាជ្យ ដែលនាំឲ្យបុរសទប់ចិត្តមិនលង់មិនបាន
មនុស្សស្រីដែលមានភាពរឹងមាំ មានភាពឯករាជ្យ និងពេញដោយក្តីរីករាយ មើលទៅហាក់ដូចជារីកដុះដាលកាន់តែច្រើននាសម័យបច្ចុប្បន្ននេះ។ មានមនុស្សស្រីមួយចំនួនកំពុងជួបឧបសគ្គកើតទុក្ខមិនស្រណុកចិត្ត ឯមនុស្សស្រីផ្សេងទៀតវិញ ក៏កំពុងព្យាយាមបណ្តុះស្លាប ដើម្បីហើរចេញពីកន្លែងងងឹត ឆ្ពោះទៅកាន់ទីដែលមានពន្លឺត្រចះត្រចង់។
មនុស្សស្រីរឹងមាំនិងឯងរាជ្យ អាចមកពីនាងធ្លាប់ជាមនុស្សទន់ខ្សោយ ធ្លាប់ជាជនរងគ្រោះត្រូវគេធ្វើបាបឬមើលស្រាល ធ្លាប់ជាមនុស្សមិនសូវចេះសប្បាយចិត្តកាលពីមុន។ ប៉ុន្តែនាងនៅតែមានជំហរ អាចពឹងអាស្រ័យលើខ្លួនឯងយ៉ាងមុតមាំ ដើម្បីកែប្រែជីវិត ឲ្យស្រស់បំព្រង ឲ្យជាគំរូល្អសម្រាប់នារីដទៃទៀត។
ដោយសារភាពអស្ចារ្យនិងចំណុចពិសេសរាប់មិនអស់ ទើបបាជាមនុស្សស្រីប្រភេទនេះ អាចធ្វើឲ្យបុរសពិបាកទប់ចិត្ត មិនលង់ស្រលាញ់មិនបាន។
នាងអាចចេញទៅខាងក្រៅញ៉ាំអីដោយមិនចាំបាច់មានវត្តមានខាងប្រុសគ្រប់ពេលវេលា។ នាងមិនទាមទារត្រូវឲ្យមានអ្នកកំដរគ្រប់ទីកន្លែង។ នាងមិនអាក់អន់ស្រពន់ចិត្តពេលអង្គុយញ៉ាំអាហារក្នុងហាងតែម្នាក់ឯង និងមិនប្រកាន់ពេលដែលនាំទៅកន្លែងតាមផ្លូវសាមញ្ញៗនោះទេ។
ទោះមានមនុស្សបុរសជាច្រើនកំពុងតម្រង់ជួរតាមសុំស្រលាញ់ ក៏នាងមិនសូវយកអារម្មណ៍ទៅខ្វាយខ្វល់ជាមួយដែរ ព្រោះនាងតែងមានកន្លែងជាច្រើនដែលត្រូវទៅ មានរឿងជាច្រើនដែលត្រូវធ្វើ ដើម្បីបំពេញន័យក្នុងជីវិត។
នាងអាចធ្វើដំណើរទៅក្រៅប្រទេសដោយមិនចាំបាច់មានដៃគូទៅអមជាមួយ។ នាងយល់ថាដំណើរកម្សាន្តដោយខ្លួនឯង អាចនាំឲ្យនាងមានគំនិតថ្មីៗ ទទួលបានបទពិសោធល្អៗ និងកាន់តែក្លាហានជាងមុន។
នាងមិនសូវចូលចិត្តទីកន្លែងដែលមានមនុស្សកុះករ រញ៉េរញ៉ៃច្រើននោះទេ។ ជាពិសេសនៅកន្លែងល្បី ឬឆើតឆាយដែលមានភ្ញៀវទេសចរច្រើនលើសលប់ មិនមែនជាចំណង់ចំណូលចិត្តរបស់នាងឡើយ។ នាងចង់កម្សាន្តក្នុងបរិយាកាសខុសប្លែកពីគេ និងមានភាពស្ងប់ស្ងាត់។
នាងមិនចេះខូចចិត្តកើតទុក្ខយូរទេ ព្រោះនាងដឹងច្បាស់ថាគួរដើរចេញដោយរបៀបណា។ អ្វីដែលគ្មានតម្លៃគួរបោះចោលកុំស្តាយ និងមិននៅស៊ូទ្រាំរក្សាទុក នាំតែអសារបង់នោះទេ។
នាងអាចទិញកាដូជូនខ្លួនឯង ដោយមិនចាំបាច់ទន្ទឹងរង់ចាំពីបុរសណាម្នាក់ឡើយ។ នាងតែងចេះលើកទឹកចិត្តខ្លួនឯង រាល់ពេលសម្រេចកិច្ចការអ្វីមួយបានជោគជ័យ។
នាងមិនត្រូវការសង្សារលេងសើច ប៉ុន្តែត្រូវការដៃគូពិតប្រាកដក្នុងជីវិត។ ហេតុនេះហើយ នាងមិនមែនចេះតែបង្កើតទំនាក់ទំនងស្នេហាផ្តេសផ្តាសឡើយ។ នាងចង់បានមនុស្សប្រុសដែលអាចជឿជាក់បាន មានភាពច្បាស់លាស់ អាចយកជាគូជីវិតបាន។
មានហេតុផលនិងគុណសម្បត្តិរាប់មិនអស់ទៀត ដែលធ្វើឲ្យបុរសចាប់ចិត្តស្រលាញ់ ប្រាថ្នាចង់បាន និងមានមោទកភាព ប្រសិនបើគាត់អាចបានអ្នកជាដៃគូនៅថ្ងៃណាមួយ៕
ចុចអានបន្ត៖ ចង់មានសិទ្ធិគ្រងបេះដូងមនុស្សស្រីរឹងមាំ ប្រុសៗត្រូវដឹងចំណុចទាំង ៨ នេះសិន