ភ្លេចៗខ្លួន ទម្លាប់អស់ទំាងនេះធ្វើឲ្យអ្នកឆាប់ចាស់ទ្វេដង មិត្តនារីគួរផ្លាស់ប្តូរ
- 2020-05-22 04:00:00
- ចំនួនមតិ 0 | ចំនួនចែករំលែក 0
ភ្លេចៗខ្លួន ទម្លាប់អស់ទំាងនេះធ្វើឲ្យអ្នកឆាប់ចាស់ទ្វេដង មិត្តនារីគួរផ្លាស់ប្តូរ
និយាយពីរឿងសម្រស់ចំពោះសុភាពនារី តើនរណាមិនថែរក្សាសម្រស់ខ្លួនឲ្យបានស្រស់ស្អាត? ការថែរក្សាសម្រស់ពេលខ្លះមិនមែនជាការងាយស្រួលឡើយប្រសិនបើអ្នកមិនមានភាពឧស្សាហ៍។ គ្មាននរណាមិនចេះចាស់នោះទេ លើពិភពលោកនេះ គ្រាន់តែអ្នកខ្លះមានតិចនិចថែរក្សាសម្រស់ឲ្យនៅក្មេងស្អាតជាងអាយុតែប៉ុណ្ណោះ។ ថ្ងៃនេះ ប្រិយមិត្តនឹងបានដឹងពីទម្លាប់មួយចំនួនដែលគួរតែកាត់បន្ថយដើម្បីរក្សាសម្រស់ឲ្យស្រស់ស្អាតជាងវ័យនិងកាត់បន្ថយភាពចាស់។ ទម្លាប់ដែលអ្នកមិនគួរអនុវត្តបន្តទៀតនោះរួមមាន៖
១. មិនជូតសម្អាតបបូរមាត់
មិត្តនារីភាគច្រើន ពេលចេញក្រៅផ្ទះច្រើនតែលាបក្រេមដើម្បីបន្ថែមភាពស្រស់ស្អាត។ តែនៅពេញមួយថ្ងៃ អ្នកមិនដឹងថាលាបប៉ុន្មានដងនោះទេ ដូច្នោះ អ្នកមិនមានពេលជូតសម្អាតនោះទេ វាជាហេតុដែលងាយបង្កឲ្យបបូរមាត់របស់អ្នកឆាប់ខ្មៅ។ យ៉ាងនេះហើយ អ្នកគួរជូតសម្អាតរាល់ពេលអ្នកជូតក្រេមចេញពីមាត់។
**២. ប៉ះពាល់ផ្ទៃមុខជារឿយៗ**
នៅក្នុងមួយថ្ងៃៗ ដៃរបស់អ្នកប៉ះរបស់ផ្សេងៗគ្នាងាយបង្កបាក់តេរីមិនតិចឡើយនៅលើដៃ។ ប្រសិនបើអ្នកចេះតែយកដៃមកប៉ះលើផ្ទៃមុខជាញឹកញាប់នោះ វាប្រៀបដូចជាអ្នកយកបាក់តេរីមករស់នៅលើមុខរបស់អ្នកអញ្ចឹង។ ជាលទ្ធផល អ្នកនឹងឆាប់កើតមុខលើផ្ទៃមុខជាក់ជាមិនខាន។
៣. ចូលចិត្តឱនប្រើទូរសព្ទរយៈពេលយូរៗ
ប្រសិនបើអ្នកឱនក្បាលចុចទូរសព្ទយូរៗ ខ្នងនិងស្មារបស់អ្នកនឹងចាប់ផ្តើមឈឺតែម្តង។ វាជារឿងពិតសម្រាប់អ្នកចូលចិត្តប្រើឱនចុចទូរសព្ទរយៈពេលវែង ងាយនឹងកោងខ្នង ឡើងផ្នត់នៅចង្ការនិងក។ ដូច្នោះហើយ គប្បីកាត់បន្ថយការឱនចុចទូរសព្ទយូរៗដើម្បីរក្សាសម្រស់អ្នក។
៤. ចូលចិត្តទទួលទានអាហារពុំផ្តល់សារធាតុចិញ្ចឹម
សម្រាប់អ្នកចូលចិត្តបរិភោគចំណី ភាគច្រើនគឺចូលចិត្តអាហារមានរសជាតិមុតៗដូចជាអាហារចៀននិងហឹរ។ អាហារប្រភេទអស់ទំាងនោះសុទ្ធតែជាចំណូលចិត្តរបស់អ្នកហើយ។ ការបរិភោគអាហារផ្ទុកជាតិខ្លាញ់ច្រើននិងរសជាតិហឹរនោះបង្កឲ្យស្បែកឆាប់ខូច ស្បែកមានខ្លាញ់ច្រើន ងាយកើតមុន រួមទំាងស្បែកគ្រើមថែមទៀតផង។
៥. មិនសូវផឹកទឹក
មនុស្សសម័យថ្មីមួយចំនួនមានទម្លាប់ទទួលទានទឹកតិច វាងាយធ្វើឲ្យរាងកាយខ្វះជាតិទឹកនៅក្នុងខ្លួន។ អ្នកគប្បីទទួលទានទឹកឲ្យបានគ្រប់គ្រាន់ក្នុងមួយថ្ងៃយ៉ាងហោចណាស់ ២ លីត្រ ព្រោះការទទួលទានទឹកគ្រប់គ្រាន់នឹងជួយដល់ស្បែកអ្នកមានសំណើមនិងភ្លឺរលោងបែបធម្មជាតិ។
៦. ទម្លាប់មិនទៅបញ្ចេញចោលលឿនៗ
មនុស្សមួយចំនួនមានទម្លាប់មិនល្អក្នុងការបញ្ចេញចោលដូចជាពេលឈឺនោមមិនប្រញាប់ទៅភ្លាមៗនោះទេ តែបែរជាទុកឲ្យយូរខ្លំាងទើបទៅបន្ទប់ទឹក។ ការរក្សាទុកបែបនោះនឹងបណ្តាលឲ្យជាតិពុលកើនឡើងនៅក្នុងរាងកាយ ប៉ះពាល់ការរំលាយអាហារដល់ថ្លើមនិងក្រលៀន និងបង្កភាពធាត់ហួសនៅម្តុំចង្កេះផងដែរ។ ដូច្នោះ ប្រសិនបើអ្នកត្រូវបញ្ចេញចោលភ្លាមៗ អ្នកគប្បីទៅបន្ទប់ទឹកឲ្យទាន់ពេលវេលា។
៧. ចូលគេងយប់ជ្រៅជាប្រចំា
វាជារឿងធម្មតាទៅហើយសម្រាប់មនុស្សវ័យក្មេងចូលគេងយប់ជ្រៅជារៀងរាល់ថ្ងៃ។ តែអ្នកត្រូវចងចំាថា ការចូលគេងយឺតជាទម្លាប់ប្រចំាថ្ងៃ វានឹងបង្កឲ្យស្បែកងាយខូច ស្ងួត មិនស្អាតនិងមិនចែងចំាង។ អ្វីដែលលើសពីនេះគឺភ្នែកខ្មៅជារង្វង់នឹងមករកអ្នកដោយឯងៗតែម្តង។ អ្នកគប្បីចូលគេងឲ្យបានលឿន យ៉ាងតិចណាស់ ៧ ម៉ោងក្នុងមួយថ្ងៃ។
ជាទីបញ្ចប់ ប្រសិនបើអ្នកមានទម្លាប់មួយណាដូចខាងលើ គប្បីគិតពិចារណាក្នុងការកាត់បន្ថយដើម្បីរក្សាសម្រស់ឲ្យបានស្រស់ស្អាត៕
រូបភាព៖ Pinterest
ចុចអានបន្ត៖
មកដឹងវិធីធ្វើម៉ាសផ្កាស្មៅធម្មជាតិ ជួយបឺតជាតិពុល ធ្វើឲ្យមុខស បំបាត់មុន