១០ វិធីជួយឲ្យអ្នកជៀសឆ្ងាយពីជំងឺកូវីដ១៩

2020-03-25 07:25:00
ចំនួនមតិ 0 | ចំនួនចែករំលែក 0

ខណៈដែលជំងឺរាតត្បាតកូវីដ១៩ នៅតែបន្តឥតស្រាកស្រាន្ត ជាហេតុធ្វើឲ្យមនុស្សគ្រប់គ្នា មានការព្រួយបារម្ភនិងប្រុងប្រយ័ត្ន ដោយអនុវត្តតាមការណែនាំរបស់អ្នកជំនាញដើម្បីសុវត្ថិភាព។

ជាជំនួយបន្ថែមដែលអ្នកមិនគួរមើលរំលងនោះគឺ ការចេះការពារខ្លួនឯងឲ្យមានសុខភាពល្អ មិនងាយឆ្លងជំងឺផ្សេងៗ ដោយវិធីខាងក្រោមនេះ៖

១. ដាក់សមាជិកគ្រួសារឲ្យសម្រាកនៅផ្ទះ ប្រសិនបើមិនស្រួលខ្លួន

ការកាត់បន្ថយមិនចេញទៅខាងក្រៅ រំសាយការជួបជុំ ជាអ្វីដែលអ្នកត្រូវធ្វើខានពុំបាន។ សំខាន់ជាងនេះទៅទៀត ប្រសិនបើមាននរណាម្នាក់ក្នុងចំណោមសមាជិកគ្រួសាររបស់អ្នក មិនស្រួលខ្លួនដូចជាផ្តាសាយ គ្រុនក្តៅជាដើម គួរដាក់ឲ្យពួកគេសម្រាកនៅតែក្នុងផ្ទះ ផ្តាច់ចេញពីកន្លែងសាធារណ ដើម្បីកុំឲ្យសាយភាយរាលដាលឆ្លងដល់អ្នកដទៃ។ ប្រសិនបើស្ថានភាពជំងឺធ្ងន់ធ្ងរ គួរទុកនៅដោយឡែកសិន ដើម្បីឲ្យគ្រូពេទ្យជំនាញធ្វើការពិនិត្យតាមដានឲ្យបានត្រឹមត្រូវ។

២. ត្រៀមថ្នាំសង្កូវទុក សម្រាប់អ្នកដែលមានជំងឺក្នុងខ្លួនស្រាប់

ចំពោះអ្នកដែលត្រូវលេបថ្នាំជាប្រចាំ ព្រោះមានជំងឺក្នុងខ្លួនស្រាប់ដូចជាជំងឺហឺតឬអាឡែកហ្សីជាដើម គួរទៅជួបពិគ្រោះជាមួយគ្រូពេទ្យ ដើម្បីត្រៀមថ្នាំទុកលេបឲ្យបានទាន់ពេលវេលា ជៀសវាងការវិវត្តទៅរកស្ថានភាពកាន់តែធ្ងន់ធ្ងរ។

៣. ជូតសម្អាតសម្ភារដែលប្រើប្រាស់ជាប្រចាំ

ក្រៅពីការពារខ្លួនដោយការមិនជួបមុខគ្នាផ្ទាល់ អ្នកក៏មិនត្រូវភ្លេចពីការសម្អាតរបស់របរដែលតែងតែប៉ះនិងប្រើប្រាស់ជាប្រចាំ ដោយអាល់កុលសម្លាប់មេរោគ ទើបអាចធានានូវសុវត្ថិភាពពេញលេញ។

៤. ចម្អិនសាច់និងស៊ុតឲ្យបានឆ្អិនល្អ

អាហារដែលមានផ្ទុកនូវបាក់តេរីពុលអាចបណ្តាលឲ្យអ្នកឈឺមិនថាពេលញ៉ាំឬប៉ះនោះទេ។ ជាពិសេស សាច់សត្វគ្រប់ប្រភេទ ត្រី ស៊ុត ត្រូវចម្អិនឲ្យបានឆ្អិនល្អដើម្បីសម្លាប់បាក់តេរី មុននឹងញ៉ាំ។

៥. មិនត្រូវប៉ះពាល់សត្វព្រៃឬសត្វចិញ្ចឹមនៅកសិដ្ឋាន

សត្វគ្រប់ប្រភេទ អាចពាំនាំមកនូវវីរុសមេរោគ ដែលអ្នកមើលមិនឃើញ និងអាចជាមូលហេតុដែលបណ្តាលឲ្យអ្នកឆ្លងជំងឺផ្សេងៗផងដែរ។ ជំងឺម្យ៉ាងមានឈ្មោះថា Zoonoticអាចចម្លងពីសត្វមកកាន់មនុស្ស ដោយការប៉ះផ្ទាល់ សត្វខាំ ឬការរស់នៅជាមួយគ្នាជាដើម។ ទាំងសត្វព្រៃនិងសត្វចិញ្ចឹមកសិដ្ឋានសុទ្ធតែអាចបង្កគ្រោះថ្នាក់ក្នុងពេលដែលមានជំងឺរាតត្បាតស្រាប់បែបនេះ។ បើអ្នកប៉ះឬនៅជិតសត្វទាំងអស់នោះ គួរលាងដៃឲ្យបានស្អាត រួមទាំងសម្ភារផ្សេងៗទៀតរបស់វា។

៦. បោកគក់កន្សែងភ្លាមៗ

ទម្លាប់នៃការប្រើកន្សែងយូរមិនព្រមបោកគក់ ពិតជាគ្មានសុវត្ថិភាពនោះទេ។ កន្សែងមានមេរោគជាច្រើន ជាពិសេសប្រសិនបើអ្នកជំងឺប្រើប្រាស់វា។ គួរបោកគក់ភ្លាមៗ មិនទុកលាយឡំយូរជាមួយនឹងសម្លៀកបំពាក់ មិនថាកន្សែងជូតខ្លួនឬកន្សែងប្រើប្រាស់នៅផ្ទះបាយឡើយ។

៧. ផ្តល់ជាតិទឹកដល់រាងកាយឲ្យបានគ្រប់គ្រាន់

នៅពេលដែលអ្នកមិនស្រួលខ្លួន រាងកាយនឹងចាប់ផ្តើមស្រូបយកជាតិទឹកច្រើនជាងពេលធម្មតា ដូច្នេះអ្នកនឹងមានអារម្មណ៍ស្រេកទឹកដោយមិនដឹងខ្លួន។ ត្រូវផឹកទឹកឲ្យបានយ៉ាងហោចណាស់ ៨កែវក្នុងមួយថ្ងៃ អាចបន្ថែមជាមួយទឹកផ្លែឈើ ឬទឹកដោះគោក៏បានប៉ុន្តែគួរជៀសវាងភេសជ្ជៈមានជាតិស្ករខ្ពស់និងមានជាតិកាហ្វេអ៊ីន ដែលនាំឲ្យខូចសុខភាព ។

៨. ទិញម្ហូបអាហារទុកសាគួរនៅផ្ទះ

ក្នុងអំឡុងពេលដែលជំងឺកំពុងវាយលុក តម្រូវឲ្យអ្នកនៅក្នុងផ្ទះ គួរម្ហូបទិញអាហារទុកសាគួរនៅផ្ទះ អាចញ៉ាំបានយ៉ាងហោចណាស់ ២សប្តាហ៍ដើម្បីកាត់បន្ថយការចេញទៅខាងក្រៅ។

៩. ពាក់ស្រោមដៃនៅទីសាធារណ

ដូចដែលអ្នកបានដឹងហើយថា មេរោគគឺចម្លងលឿនតាមរយៈដៃនេះហើយ។ ការពាក់ម៉ាស់និងស្រោមដៃជារឿងចាំបាច់បំផុត។ យ៉ាងណាកុំភ្លេច លាងដៃឲ្យបានញឹកញាប់និងត្រឹមត្រូវ ទាំងពេលពាក់និងដោះស្រោមដៃចេញ។

១០. ប្រុងប្រយ័ត្នពេលទិញម៉ាស់មកពាក់

ម៉ាស់ពិតជាមានប្រយោជន៍អាចការពារអ្នកពីហានិភ័យផ្សេងៗ ប៉ុន្តែគួរពាក់ឲ្យបានត្រឹមត្រូវតាមក្បួនខ្នាត។ ជ្រើសរើសម៉ាស់ដែលមានប្រសិទ្ធភាពអាចការពារមេរោគបាក់តេរី និងបោះចោលបន្ទាប់ពីប្រើរួច៕

ចុចអានបន្ត៖ ៨ វិធីជួយបង្កើនប្រព័ន្ធសុំាឲ្យរឹងមាំប្រឆាំងនឹង COVID-19

ប្រភព៖ Brightside ប្រែសម្រួល៖ ដេត ឈុនអ៉ី