ធំដឹងក្ដីមែនទែន គឺនៅពេលកាន់តែឈឺ កាន់តែសម្ងំមិនឲ្យអ្នកណាដឹង

2020-02-28 08:00:00
ចំនួនមតិ 0 | ចំនួនចែករំលែក 0

ចង់មានជីវិតរស់នៅស្រួល អ្នកត្រូវប្រកួតប្រជែង។ អ្នកខ្លះព្យាយាមដល់ទីបញ្ចប់ មិនចោលពាក់កណ្ដាលទីឡើយ ទោះមានឧបសគ្គច្រើនយ៉ាងណាក៏ពួកគេមិនប្រាប់អ្នកណាដែរ គឺសុខចិត្តសម្ងំរងតែម្នាក់ឯង។

គ្មានវិថីជីវិតរបស់អ្នកម្នាក់ដែលកើតមកគឺរលូននោះឡើយ ទោះបីជាអ្នកកើតមកក្នុងត្រកូលអ្នកមាន ក៏មានវិបត្តិរបស់អ្នកមានដែរ។ នៅតាមដងវិថីនេះ អ្នកត្រូវរៀនសម្របខ្លួនតាម ព្រោះទៅថ្ងៃមុខ យើងមិនដឹងឡើយថា ត្រូវប្រឈមនឹងរឿងអ្វីខ្លះទៀតទេ។

ជីវិតមនុស្សម្នាក់ៗ ប្រៀបដូចជាកូនទាមួយក្បាលដែរ មើលនៅលើមាត់បឹងគឺស្ងប់ស្ងាត់ តែនៅខាងក្រោម ជើងវាប្រឹងហែលយ៉ាងខ្លាំងទម្រាំអាចទៅមុខរួច។ គ្មានអ្នកណានៅសុខៗហើយទទួលបានសមិទ្ធិផលឡើយ បើមិនឆ្លងកាត់ ភាពលំបាក។ បើនៅពេលបច្ចុប្បន្ន អ្នកមិនប្រឹងសង្វាតទេ អ្នកនឹងមានតែភាពស្ដាយក្រោយ នៅពេលគិតឡើងវិញនៅពេលចាស់ទៅ។

ប្រសិនបើគ្រាន់តែជួបការលំបាកបន្តិច ហើយយកស្រាមករំដោះទុក្ខ បន្ទាប់មកស្រែកយំ ហើយអាចដោះស្រាយបញ្ហានោះ មួយពិភពលោកនេះនឹងក្លាយជាសេពសុរាហើយ។ ការពិតទៅ ការយកគ្រឿងស្រវឹងមកធ្វើជាមិត្តនេះ មិនត្រឹមតែមិនអាចដោះស្រាយបញ្ហាបានទេ គឺថែមទាំងធ្វើឲ្យវាយ៉ាប់ជាងមុនទៀតផង។

អ្នកមិនទាន់មានបទពិសោធម៍ ជួបរៀងបន្តិចបន្តួច នឹងស្រែឆោឡោ ទាក់ទាញចំណាប់អារម្មណ៍។ គឺធ្វើយ៉ាងម៉េចឲ្យគេមើលមកដូចខ្លួនលំបាកខ្លាំង។ ផ្ទុយមកវិញ អ្នកដែលឆ្លងកាត់ច្រើនហើយ ជួបឧបសគ្គកាន់តែច្រើន ពួកគេកាន់តែស្ងាត់ ដើម្បីដោះស្រាយបញ្ហាទាំងអស់នោះ ឲ្យដាច់ស្រេច។ ហើយពេលជួបរឿងកាន់តែពិបាកចិត្ត គេរឹតតែសម្ងំ មិនចង់ឲ្យអ្នកណាដឹងឡើយ ព្រោះពួកគេដឹងថា មនុស្សដឹងច្រើនក៏គ្មានធ្វើអ្វីបាន ហើយរឹតតែធ្វើឲ្យពួកគេវ៉ល់ជាងមុនទៅទៀត។