ស្ទីលស្លៀកពាក់ ១០ ប្រភេទ ធ្វើឲ្យអ្នកបាក់សម្រស់ មិនចុះចំណោមនឹងគេ
- 2019-10-08 07:20:00
- ចំនួនមតិ 0 | ចំនួនចែករំលែក 0
ស្ទីលស្លៀកពាក់ ១០ ប្រភេទ ធ្វើឲ្យអ្នកបាក់សម្រស់ មិនចុះចំណោមនឹងគេ
របៀបនៃការស្លៀកពាក់តុបតែងខ្លួន ឲ្យសមសួនត្រូវតាមកាលៈទេសៈ គឺជាអ្វីដែលមនុស្សស្រីមិនគួរធ្វេសប្រហែស។ បើអ្នកគិតចង់ជ្រើសរើសស្ទីលណា ដើម្បីតម្រូវចិត្តខ្លួនឯង ក៏មិនទាស់ខុសអីដែរ ប៉ុន្តែបើមិនខ្វល់ទាល់តែសោះពេក វាអាចនឹងធ្វើឲ្យអ្នកមើលទៅកាន់តែយ៉ាប់យឺន មិនចុះចំណោមគេឯង ថែមទាំងមិនអាចទទួលបានទំនុកចិត្តគ្រប់គ្រាន់ពីមនុស្សជុំវិញខ្លួនផងដែរ។
មានស្ទីលស្លៀកពាក់ច្រើនប្រភេទ ដូចខាងក្រោមនេះ បើជៀសបានគួរតែជៀសទៅ បើមិនចង់ឲ្យឃើញឆ្គង។
១. ស្លៀកពាក់ខោអាវហាត់ប្រាណឬហាត់យូហ្គា
ប្រហែលជាអ្នកគិតថា ខោអាវប្រភេទនេះ ពេលស្លៀកទៅពិតជាស្រួលខ្លួន ងាយស្រួលបត់បែន។ យ៉ាងណាមិញ វាស័ក្តិសមសម្រាប់តែពេលហាត់ប្រាណឬហាត់យូហ្គាតែប៉ុណ្ណោះ។ សម្រាប់ថ្ងៃធម្មតាឬពេលទៅដើរលេងខាងក្រៅ ខោអាវកីឡារឹបខ្លាំងបែបនេះ ពិតជាមើលទៅភ្លាវខុសគេតែម្តង។ ម្យ៉ាងវិញទៀត មិនខ្វះទេម៉ូដសម្លៀកបំពាក់ ដែលងាយស្រួលពាក់ ក្រៅពីខោអាវកីឡា។
២. រ៉ូបរឹបបញ្ចេញរាងខ្លាំងពេក
ស្ទីលនេះមិនត្រឹមតែមិនទាន់សម័យប៉ុណ្ណោះទេ វាថែមទាំងមានសភាពរឹបខ្លាំង បញ្ចេញរូបរាងដងខ្លួន បញ្ចេញសាច់ ជ្រុលហួសហេតុ នាំឲ្យថយចុះនូវភាពទាក់ទាញនិងតម្លៃនៃរ៉ូប។
៣. អាវមួយកំណាត់ខ្លួនឬខើចខ្លីខ្លាំង
ទោះបីអ្នកស្ថិតក្នុងវ័យបែបណា អាវខ្លីមួយកំណាត់ខ្លួនឬចោមពុង អាចធ្វើឲ្យអ្នកមើលទៅមិនសមរម្យ និងងាយទទួលរងនូវការរិះគន់ផ្សេងៗ។ ម៉ូដប្រភេទនេះដែរ ទោះបីមានតម្លៃថ្លៃយ៉ាងណា ក៏មើលទៅឆាប់សាំភ្នែក និងច្រឡំគ្នាជាមួយនឹងម៉ូដធូរថ្លៃធម្មតា។ យ៉ាងណាមិញ បើអ្នកពិតជាស្រលាញ់ស្ទីលអាវខ្លីខ្វះមិនបាន គួរប្រុងប្រយ័ត្ន ជ្រើសរើសម៉ូដណា ដែលច្នៃប្រឌិតបែបសាមញ្ញៗ។
៤. ខោអាវដែលមានរូបស្អេកស្កះឬតុក្តតាធំៗ
នៅប្រទេសមួយចំនួន រូបតុក្កតា Mickey Mouse ឬ Hello Kitty ដែលមាននៅលើសម្លៀកបំពាក់ គឺពេញនិយមខ្លាំងណាស់។ ទោះជាបែបនេះក្តី មិនថាជាខោអាវគេងយប់ ឬសម្រាប់ពាក់ចេញទៅក្រៅក៏ដោយ ឲ្យតែមានរូបផ្កាស្អេកស្កះ ឬតុក្កតាធំៗ វាហាក់បីដូចជាមិនទាន់សម័យកាល និងគ្មានលក្ខណៈជា Fashion បន្តិចសោះ។
៥. ពាក់អាវយឺតរាល់ថ្ងៃដដែលៗ
អាវយឺតមានភាពសាមញ្ញស្រស់ស្អាត ប៉ុន្តែបើអ្នកពាក់វារាល់ថ្ងៃដដែលៗពេក មិនផ្លាស់ប្តូរស្ទីលតាមកាលៈទេសៈ វានឹងបណ្តាលឲ្យបាត់បង់ភាពទាក់ទាញ។
៦. ខោខោវប៊យរហែកខ្លាំង
អាចនឹងត្រូវចិត្តមិត្តយុវវ័យមួយចំនួន ប៉ុន្តែមិនប្រាកដថា ស្ទីលដែលពេញនិយមតៗគ្នា សុទ្ធតែស័ក្តិសមសម្រាប់អ្នកឡើយ។
៧. ខោខោវប៊យខ្លីនិងមានពណ៌ទឹកប៊ិច
ខោខោវប៊យខ្លី ជាស្ទីលដែលទទួលបានប្រជាប្រិយភាព អស់រយៈពេលជាយូរមកហើយ។ បើនិយាយពីខោខោវប៊យខ្លីដែលមានពណ៌ស្រាលឬពណ៌ស គឺងាយស្រួលបំផុតនៅពេលដែលអ្នកចង់លេងជាមួយស្ទីលផ្សេងៗ ប៉ុន្តែសម្រាប់ពណ៌ទឹកប៊ិចវិញ គឺមើលទៅឆ្គងខ្លាំងណាស់ ព្រោះវាជាពណ៌ដែលមិនលេចធ្លោ និងពិបាកក្នុងការផ្គូផ្គងជាមួយនឹងពណ៌ដទៃទៀត។
៨. ប្រើកាបូបស្ពាយដែលហួសពេលកំណត់
មិនថាអ្នកប្រើកាបូបថ្លៃប៉ុណ្ណាក៏ដោយ បើវាហួសពេលកំណត់ ចេញច្រែះ របកឬរហែក វានឹងធ្វើឲ្យការតុបតែងខ្លួនរបស់អ្នកធ្លាក់ចុះមួយកម្រិតភ្លាមៗ។
៩. ខោអាវជំនាន់ឆ្នាំ ៩០
ថ្វីត្បិតតែស្ទីលស្លៀកពាក់មានការវិវត្តចុះឡើងពិតមែន ប៉ុន្តែយ៉ាងហោចណាស់ ក៏មានការប្រឌិតខុសគ្នា ឬគ្រាន់តែក្លាយបន្តិចបន្តួច។ កាលណាអ្នកយកស្ទីលជំនាន់ដើមទាំងស្រុងតែម្តង គឺពិតជាមិនអាចចុះចំណោមបានឡើយ។
១០. ខោអាវជ្រួញ
ខ្ជិលយ៉ាងណា ក៏មិនគួរធ្វេសប្រហែសដែរ ព្រោះបើអ្នកពាក់ខោអាវទាំងស្នាមជ្រីវជ្រួញអ្នកដទៃនឹងវាយតម្លៃមិនល្អ គិតថាអ្នកជាមនុស្សគ្មានរបៀប។ អាចជ្រើសរើសប្រភេទឆ្នាំងអ៊ុតស្ទីម ដែលមានភាពងាយស្រួលនិងរហ័ស៕