អ៊‍ីចឹងសោះ បានលាបក្រចកមិនដែលស្អាតដូចគេ

2019-07-10 07:35:00
ចំនួនមតិ 0 | ចំនួនចែករំលែក 0

ការលាបក្រចកជាអ្វីដែលមនុស្សស្រីចូលចិត្តបំផុតដើម្បីឱ្យម្រាមដៃ និងម្រាមជើងរបស់ពួកគេមើលទៅគួរឱ្យទាក់ទាញ។ ប៉ុន្តែស្រ្តីភាគច្រើនតែមានកំហុសឆ្គងក្នុងពេលលាបក្រចកដែលធ្វើឱ្យពួកគេមិនពេញចិត្ត ហើយគិតថាហេតុអ្វីបានជាលាបក្រចកមិនដែលស្អាតដូចគេអ៊‍ីចឹង។

តោះចង់ដឹងកំហុសឆ្គងទាំងនោះមានអ្វីខ្លះសូមពិនិត្យមើលចំណុចខាងក្រោមនេះ៖

១. លាបក្រចកនៅពេលដែលក្រចកមានសភាពគគ្រិច អ្វីដែលអ្នកត្រូវធ្វើគឺលាងសម្អាតដៃរបស់អ្នកឱ្យបានស្អាត។ ធូលីដី ភាពសើម និងថ្នាំក្រចកដែលលាងមិនទាន់ជ្រះនឹងធ្វើឱ្យការលាបថ្នាំក្រចករបស់អ្នកជាប់មិនបានល្អនោះទេ។ ម្យ៉ាងវិញទៀតអ្នកត្រូវតែលាងសម្អាតក្រចកដៃរបស់អ្នកដោយប្រើច្រាសជាមួយនឹងសាប៊ូរួចដុសសម្អាតក្រចកដៃរបស់អ្នកឱ្យស្អាតជាមុនសិន។

២. មិនបានសម្អាតក្រចកជាមុន មុនពេលដែលអ្នកលាបក្រចក អ្នកត្រូវសម្អាតក្រចករបស់អ្នកដោយយកសំឡីជ្រលក់ជាមួយនឹងទឹកលាងក្រចករួចជូតសម្អាតថ្នាំក្រចក និងធូលីដីដែលមានជាប់នៅលើក្រចករបស់អ្នក។

៣. មិនបានលាបទឹករលោងជាមុន ស្រទាប់ដំបូងបង្អស់នឹងធ្វើឱ្យថ្នាំក្រចកជាប់ពណ៌បានល្អ។ ម្យ៉ាងវិញទៀត ការសិក្សាបានបង្ហាញថាទឹករលោងមានសភាពជាប់ល្អជាងថ្នាំលាបក្រចកធម្មតា។

៤. លាបក្រចកមិនត្រូវតាមក្បួន អ្នកត្រូវលាបថ្នាំក្រចកជាបីផ្នែកផ្សេងគ្នា។ ដំបូងអ្នកត្រូវលាបនៅផ្នែកកណ្ដាលនៃក្រចករបស់អ្នក បន្ទាប់មកលាបផ្នែកទាំងសងខាង។ អ្នកត្រូវចាំរយៈពេល២នាទី មុននឹងលាបស្រទាប់ទី ២។ អ្នកត្រូវចាំថាអ្នកមិនត្រូវលាបច្រើនស្រទាប់ពេកនោះទេ ព្រោះថាកាលថាអ្នកលាបច្រើនស្រទាប់ពេក វានឹងធ្វើឱ្យថ្នាំក្រចករបស់អ្នកងាយនឹងរបកមកទាំងផ្ទាំងតែម្ដង។

៥. មិនបានលាបទឹករលោងជាលើកចុងក្រោយ នៅពេលដែលការលាបថ្នាំក្រចករបស់អ្នកត្រូវបានបញ្ចប់អ្នកត្រូវតែលាបទឹករលោងជាថ្មីម្ដងទៀតដើម្បីរក្សាពណ៌ក្រចករបស់អ្នកឱ្យជាប់ពណ៌បានយូរ។ ទឹករលោងដែលឆាប់ស្ងួតមិនស័ក្ដិសមនឹងប្រើនៅពេលនេះទាល់តែសោះ ព្រោះថាកាលណាអ្នកប្រើវានៅពេលអ្នកលាបថ្នាំក្រចកទើបនឹងរួច វាអាចធ្វើឱ្យមានសភាពរលុប។ អ្វីដែលអ្នកគួរតែជ្រើសរើសមកលាបនៅពេលនេះគឺទឹករលោងដែលស្ងួតយឺតព្រោះថាវាអាចឱ្យថ្នាំក្រចករបស់អ្នកជាប់បានល្អ និងមិនងាយរលុប។

៦. ធ្វើការងារដោយមិនបានគិតគូពីក្រចករបស់អ្នក ស្ដាប់មើលទៅវាហាក់ដូចជាមិនមែនជាបញ្ហាចោទប៉ុន្មានទេ។ ប្រសិនបើអ្នកលាងចាន និងឆ្នាំងអ្នកត្រូវតែពាក់ស្រោមដៃដើម្បីកុំឱ្យខូចក្រចក។ អ្នកគួរប្រុងប្រយ័ត្នជាមួយនឹងអ្វីដែលនឹងអាចធ្វើឱ្យថ្នាំ ក្រចករបស់អ្នករលុប ឬរបក។ ដើម្បីធ្វើឱ្យថ្នាំក្រចករបស់អ្នកនៅជាប់បានយូរ អ្នកត្រូវតែលាបទឹករលោងចំនួនមួយស្រទាប់ជារៀងរាល់ថ្ងៃដើម្បីធ្វើឱ្យក្រចករក្សាពណ៌បានយូរ៕

ចុចអាន៖ ចង់ផាត់ភ្នែកស្អាតដូចតារាស្រីកូរ៉េ ត្រូវគូរ eyeliner ឲ្យស្ដើងដូចជាអត់គូរ

ប្រភព៖ Goodhousekeeping ប្រែសម្រួល៖ ដេត ធន្នី