ស្បែកអត់ភ្លឺថ្លាមែន? សាកល្បងវិធីខាត់ស្បែកបែបធម្មជាតិនេះមើល៍ អត់ខូចស្បែកទេ

2018-01-12 03:15:03
ចំនួនមតិ 0 | ចំនួនចែករំលែក 0

ស្បែករលោងភ្លឺថ្លាគឺជាក្ដីស្រមៃរបស់នារីគ្រប់រូប។ មានផលិតផលខាត់ស្បែកជាច្រើនដែលបានដាក់លក់លើអនឡាញ ហើយមិត្តនារីយើងក៏មិនតិចនាក់ដែរដែលបានសាកល្បង អ្នកខ្លះក៏បានផលគាប់ចិត្ត អ្នកខ្លះក៏ខកចិត្តទៅវិញ។ ដោយសារផលិតផលដែលផ្សំឡើងពីសារធាតុធ្វើឱ្យសទាំងនោះភាគច្រើនមានបញ្ចូលសារធាតុគីមីដែលចូលទៅកាត់ភាពខ្មៅពីក្នុងស្បែក ទើបវាអាចប៉ះពាល់ទោះមិនច្រើនក៏តិចតួចដែរសម្រាប់ស្បែក។ ថ្ងៃនេះ វិបសាយកញ្ញាចង់ណែនាំឱ្យមិត្តនារីមកសាកល្បងវិធីធម្មជាតិវិញ ដែលអាចទទួលបានលទ្ធផលហើយ មិនភ័យរឿងប៉ះពាល់សុខភាព។ ប៉ុន្តែវិធីធម្មជាតិទាំងនេះអាចត្រូវការពេលយូរបន្តិចដើម្បីឃើញលទ្ធផល។

១- សណ្ដែកក្រហមនិងទឹកដោះស្រស់

សណ្ដែកក្រហមមានផ្ទុកសារធាតុប្រឆាំងអុកស៊ីតកម្ម ជាតិដែក ហ្វៃប៊ើ វីតាមីន C, E, B1, និង B6 ដែលល្អបំផុតសម្រាប់ស្បែក។ ប្រសិទ្ធភាពរបស់ល្បាយសណ្ដែកក្រហមគឺវាអាចចូលទៅលុបបំបាត់ស្នាមជាំខ្មៅ ធ្វើឱ្យស្បែកមានភាពភ្លឺរលោង និងសឡើងវិញ។

កិនសណ្ដែកក្រហមឱ្យម៉ត់ជាម្សៅហើយលាយជាមួយទឹកដោះស្រស់បន្តិច បង្កើតជាល្បាយខាប់ៗសម្រាប់លាបលើដងខ្លួនមុនពេលងូតទឹក រួចទុកចោលប្រមាណ១៥នាទី សឹមងូតទឹកលាងសម្អាតចេញ។ ធ្វើបែបនេះ១ទៅ២ដងក្នុងសប្ដាហ៍ ស្នាមមុនលើខ្នង និងស្នាមខ្មៅមានលើស្បែកអាចនឹងរលុបបាត់បន្តិចម្ដងៗជាមិនខាន។

ក្រៅពីនេះ សម្រាប់ស្ត្រីដែលកើតមុនលើមុខ ក៏អាចប្រើម្សៅសណ្ដែកក្រហមលាយជាមួយស៊ុត លាប២ទៅ៣ក្នុងមួយសប្ដាហ៍ ទុកចោលប្រហែល២០នាទី នោះមុននិងស្នាមជាំលើមុខក៏អាចជ្រះបាត់ដែរ។

២- ទឹកដោះស្រស់ជាមួយកាកកាហ្វេ

ក្រៅពីជួយធ្វើឱ្យស្បែកដងខ្លួនភ្លឺថ្លា អ្នកក៏អាចប្រើវិធីនេះលើស្បែកមុខបានដូចគ្នា។ ដំបូងយកកាកកាហ្វេមកលាយជាមួយទឹកដោះគោស្រស់កូរចូលគ្នារហូតក្លាយជាសាច់តែមួយ។ បន្ទាប់មកយកមកលាបលើដងខ្លួន ឬលាងមុខឱ្យស្អាតមុនលើល្បាយនេះលើផ្ទៃមុខ ទុកចោល២០នាទី សឹមលាងសម្អាតចេញជាការស្រេច។ ការធ្វើបែបនេះអាចជួយឱ្យស្បែករលោងនិងតឹងណែនជាងមុន។ អាចធ្វើវាពីរដងក្នុងមួយសប្ដាហ៍ អ្នកនឹងឃើញលទ្ធផលជាទីគាប់ចិត្ត។

៣- ទឹកដោះគោស្រស់និងដំឡូងបារាំង

ទឹកដោះគោស្រស់មានបណ្ដុំវីតាមីនច្រើនប្រភេទនិងសារធាតុខនិជដែលមានប្រយោជន៍សម្រាប់ផ្ដល់សំណើមដល់ស្បែក និងធ្វើឱ្យស្បែករលោងដូចកូនក្មេង។ ចំណែកដំឡូងបារាំងក៏មានវីតាមីនច្រើនមុខដូចគ្នា និងបេតាការូទីនដែលចាំបាច់សម្រាប់ផ្ដល់សារធាតុចិញ្ចឹមដល់ស្បែក។ ហេតុនេះការបញ្ចូលសមាសភាគទាំងពីរចូលគ្នា គឺជាគ្រឿងផ្សំដ៏ល្អមួយសម្រាប់ធ្វើឱ្យស្បែកភ្លឺថ្លាក្មេងជាងវ័យ។ លាបល្បាយនេះមុនងូតទឹកដើម្បីខាត់យកកោសិកាចាស់ចេញ ទុកចោលប្រមាណ២០នាទី រួចលាងសម្អាតចេញ។ អ្នកគួរធ្វើវាត្រឹមតែម្ដងក្នុងមួយសប្ដាហ៍បានហើយ ព្រោះស្បែកមិនអាចទទួលយកសារធាតុចិញ្ចឹមច្រើនពេកក្នុងពេលតែមួយ និងញឹកញាប់ពេកបានទេ៕

ចុចអាន៖

ប្រភព៖ onegreenplanet ប្រែសម្រួល៖ សរ សុគន្ធី