សម្ដី៧ឃ្លាដែលបុរសៗចង់ឮបំផុតពីមនុស្សស្រីជាទីស្រឡាញ់ តែមិនហ៊ានហាមាត់ប្រាប់
- 2017-12-16 12:00:00
- ចំនួនមតិ 0 | ចំនួនចែករំលែក 0
សម្ដី៧ឃ្លាដែលបុរសៗចង់ឮបំផុតពីមនុស្សស្រីជាទីស្រឡាញ់ តែមិនហ៊ានហាមាត់ប្រាប់
មនុស្សប្រុសភាគច្រើន ពិបាកនឹងបង្ហាញអារម្មណ៍ពិតរបស់ខ្លួនណាស់នៅក្នុងទំនាក់ទំនងស្នេហា។ សូម្បីតែតម្រូវការកំប៉ិកកំប៉ុកសោះ ក៏មិនហ៊ានទាមទារពីមនុស្សស្រីជាទីស្រឡាញ់ដែរ។ នេះក៏ព្រោះតែគាត់គិតថា ពេលដែលប្រាប់អ្នកទៅ គាត់អាចក្លាយជាមនុស្សប្រុសទន់ជ្រាយ រញ៉ាំរញ៉ូវ រឿងច្រើនដូចស្រី ខុសពីស្តង់ដារដែលអ្នករំពឹងទុក។ ស្នេហាមិនអាចផ្អៀងតែម្ខាងបែបនេះទេ ដើម្បីជាគន្លឹះខ្លះៗ ខាងក្រោមនេះជាអ្វីដែលអ្នកត្រូវដឹង សម្ដី៧ឃ្លាដែលគូស្នេហ៍អ្នក ចង់ឮបំផុតចេញពីមាត់អ្នក៖
១. បងមានរឿងលំបាក លាក់ក្នុងចិត្តតែឯងឬអត់?
មនុស្សប្រុសក៏ចង់ចែករំលែករឿងមិនល្អ រឿងពិបាកចិត្ត ប្រចាំថ្ងៃប្រាប់មនុស្សនៅក្បែរដែរ។ ប្រសិនអ្នកអាចបើកចំហចិត្ត សួរពីសុខទុក្ខ របស់គាត់រៀងរាល់ថ្ងៃ គាត់និងមានអារម្មណ៍ធូរស្រាល រីករាយ ដែលអ្នកតែងតែខ្វល់ខ្វាយពីគាត់។
២. អូនមានភាពកក់ក្ដៅណាស់ ពេលនៅក្បែរបង
ទោះអ្នកជាមនុស្សស្រីរឹងមាំ និងឯករាជ្យប៉ុណ្ណា ប៉ុន្តែអ្នកក៏ត្រូវចេះលើកទឹកចិត្តគាត់ដែរ។ មនុស្សប្រុសតែងគិតថាគាត់មានតួនាទីការពារនារីដែលខ្លួនស្រឡាញ់ ដូច្នេះពាក្យមួយឃ្លានេះពិតជាមានន័យណាស់សម្រាប់មនុស្សប្រុស។
៣. អូនជឿជាក់លើបង
ពេលដែលគាត់បរាជ័យ ឬធ្វើមិនបានល្អ អ្នកមិនគួរចាំតែស្ដីបន្ទោសគ្រប់ពេលនោះទេ។ អ្នកត្រូវចេះលួងលោម ហើយប្រាប់ថាអ្នកនៅតែជឿជាក់លើគាត់ បែបនេះទើបជាការជំរុញទឹកចិត្តដែលត្រឹមត្រូវ និងមានប្រសិទ្ធភាព។
៤. តោះទៅដើរលេងឆ្ងាយៗ ជាមួយគ្នា!
មនុស្សប្រុសក៏ចេះនឿយហត់ ដែលត្រូវចាំតែជាអ្នកបបួល ឬរៀបគម្រោងពេលចង់ដើរលេងឆ្ងាយៗជាមួយគ្នា។ ហេតុនេះប្រសិនបើ ពេលខ្លះអ្នកក្លាយជាអ្នកបបួលគាត់ម្ដង នោះគាត់ប្រាកដជារំភើប និងត្រេកអរខ្លាំងជាមិនខាន។
៥. បងជាបុរសដែលអូនត្រូវការតែម្នាក់ប៉ុណ្ណោះ
ពេលខ្លះមនុស្សប្រុសក៏អាចគ្មានភាពជឿជាក់គ្រប់គ្រាន់លើខ្លួនឯង ឬភ័យខ្លាចថ្ងៃណាមួយអ្នកជួបមនុស្សល្អជាង រួចបោះបង់គាត់ចោល។ ដើម្បីសាងទំនុកចិត្តឲ្យគាត់ សម្ដីមួយឃ្លានេះ ពិតជាចាំបាច់បំផុត។
៦. អូនមានមោទនភាពណាស់ដែលមានបងជាគូ
បង្ហាញគាត់ថាវត្តមានរបស់គាត់ សំខាន់ និងមានតម្លៃប៉ុណ្ណាសម្រាប់ជីវិតអ្នក។ ពាក្យសម្ដីសរសើរ ដែលពោរពេញដោយមោទនភាពបែបនេះ មនុស្សប្រុសណាដែលថាមិនញញឹមពេលបានឮនោះ។
៧. អូនស្រឡាញ់បងជាងអ្នកណាៗទាំងអស់
ចុងក្រោយ ឧស្សាហ៍ប្រាប់គាត់ថាអ្នកស្រឡាញ់គាត់ខ្លាំង។ អ្នកទាំងពីរត្រូវរំលឹកប្រាប់គ្នាឲ្យបានញឹកញាប់ នោះភាពផ្អែមល្ហែម និងមិនងាយបាត់បង់ឡើយ ទោះជារស់នៅជាមួយគ្នារយៈពេលយូរប៉ុណ្ណាក៏ដោយ៕
ចុចអាន៖វិធីសាស្ត្រចងបេះដូងមនុស្សប្រុសឲ្យស្រឡាញ់អ្នកកាន់តែខ្លាំងពីមួយថ្ងៃទៅមួយថ្ងៃ