ស្ត្រីជាប្រពន្ធម្នាក់ សុខចិត្តបញ្ចប់ជីវិតមង្គលការ១០ឆ្នាំចោល ដោយសារប្ដីញៀនស្ទូចត្រីខ្លាំងពេក
- 2022-12-16 04:25:17
- ចំនួនមតិ 0 | ចំនួនចែករំលែក 0
ស្ត្រីជាប្រពន្ធម្នាក់ សុខចិត្តបញ្ចប់ជីវិតមង្គលការ១០ឆ្នាំចោល ដោយសារប្ដីញៀនស្ទូចត្រីខ្លាំងពេក
ដោយដាក់ចំណង់ចំណូលចិត្តស្ទូចត្រីរបស់ខ្លួនខ្ពស់ជាងការមើលថែទាំគ្រួសារ បុរសម្នាក់មកពីប្រទេសចិនត្រូវបានប្រពន្ធដាក់ពាក្យសុំលែងលះ។
កាលពីថ្ងៃទី ១៤ ខែធ្នូកន្លងទៅនេះ បណ្ដាញព័ត៌មាន Sohu បានរាយការណ៍ថា នារីចិនម្នាក់មកពីខេត្ត San Dong បានដាក់ពាក្យបណ្ដឹងលែងលះប្ដីរបស់ខ្លួន ក្រោយទ្រាំទ្រលែងបានអស់រយៈពេល១០ឆ្នាំ ព្រោះប្ដីនាងញៀននឹងការស្ទូចត្រីខ្លាំងពេក។
នារីវ័យ ៣៥ឆ្នាំ ត្រកូល Zhang បានឲ្យដឹងថា ខណៈនាងត្រូវធ្វើការងារផ្ទះ និងមើលថែទាំកូនផងនោះ ប្ដីនាងរវល់តែចុចទូរសព្ទដើម្បីស្វែងរកន្លែងស្ទូចត្រីបន្តទៀត។
“ព្រឹកថ្ងៃណាក៏ខ្ញុំត្រូវក្រោកមុនម៉ោង ៦ព្រឹកដើម្បីចំអិនម្ហូបឲ្យកូន និងប្ដី ហើយបាយម្ហូបរួចអស់ហើយ ទើបប្ដីខ្ញុំងើប។ បាយល្ងាចក៏ដូចគ្នា ក្រោយពេលបាយល្ងាច គឺប្ដីខ្ញុំចេញទៅស្ទូចត្រីដល់កណ្ដាលអធ្រាត្រទើបចូលផ្ទះវិញ។ រយៈពេល១០ឆ្នាំមកនេះ គឺខ្ញុំទ្រាំលែងបានហើយ” នារីត្រកូល Zhang ឲ្យដឹង។
ក្រោយពេលជួបដើម្បីផ្សះផ្សារបីដង ខាងប្រុសត្រកូល Sun នៅទីបំផុត ក៏យល់ព្រមនឹងការសុំលែងលះរបស់ប្រពន្ធខ្លួន។ ចៅក្រម Fu Honglian អ្នកកាត់ក្ដីការលែងលះនេះបានឲ្យដឹងថា ទោះបីជាការស្ទូចត្រីមិនមែនជាអំពើអាក្រក់ក៏ដោយ តែអ្វីៗទាំងអស់គួរមានការកំណត់ មិនគួរលើសពេកនោះឡើយ៕
ប្រែសម្រួល៖ Caramel