បុរសឥណ្ឌាស្ដាយពេលត្រូវឆ្នោត៣លានដុល្លារ ព្រោះគេសុំលុយច្រើនពេក
- 2022-10-04 09:50:00
- ចំនួនមតិ 0 | ចំនួនចែករំលែក 0
បុរសឥណ្ឌាស្ដាយពេលត្រូវឆ្នោត៣លានដុល្លារ ព្រោះគេសុំលុយច្រើនពេក
បុរសម្នាក់មកពីប្រទេសឥណ្ឌា សង្ឃឹមថាខ្លួនមិនដែលត្រូវឆ្នោត ដោយសារចំនួនអ្នកទូរសព្ទមកសុំជំនួយធ្វើឲ្យលោកហត់នឿយ។
កាលពីថ្ងៃទី ២៨ ខែកញ្ញាមុននេះ បណ្ដាញព័ត៌មាន BBC បានរាយការណ៍ថា បុរសម្នាក់ឈ្មោះ Anoop រស់នៅរដ្ឋ Kerala ប្រទេសឥណ្ឌា បានឈ្នះឆ្នោតជាតិនៃរដ្ឋដែលលោកកំពុងរស់នៅដោយរង្វាន់ឡើងដល់ ៣លានដុល្លារ នេះក៏ជាតួរលេខធំជាងគេសម្រាប់ឆ្នោតរដ្ឋនេះដូចគ្នា។
យ៉ាងណាក្ដី ក្រោយឈ្នះឆ្នោតលេខ១នេះ លោកបានប្រាប់ថា ប្រសិនបើលោកឈ្នះឆ្នោតលេខ៣ដែលមានប្រាក់រង្វាន់តិចជាង ប្រហែលជាប្រសើរជាងនេះ។ ជាក់ស្ដែង លោកបានទិញឆ្នោតកាលពីថ្ងៃទី ១៨ ខែកញ្ញា មួយថ្ងៃមុនពេលលោកចេញទៅប្រទេសម៉ាឡេស៊ីដើម្បីធ្វើការ។
លុយឈ្នះឆ្នោត បានជួយឲ្យលោកសងបំណុល និងមានជីវភាពប្រសើរជាងមុន។ បានសប្បាយមិនទាន់ប៉ុន្មាន ១សប្ដាហ៍ក្រោយឈ្នះឆ្នោត លោកបានបង្ហោះវីដេអូសូមអង្វរជនប្លែកមុខឈប់ទូរសព្ទមកលោកសុំជំនួយតទៀត ព្រោះលោកហត់នឹងលើកទូរសព្ទខ្លាំងណាស់។
បុរសរូបនេះ បានបន្ថែមថា ក្រោយឈ្នះឆ្នោត លោកមិនអាចទៅណាទាំងអស់ សូម្បីតែពេលកូនលោកឈឺក៏លោកមិនអាចជូនកូនទៅពេទ្យបានដែរ ព្រោះមានអ្នកចាំជួបលោកច្រើនពេក។ លោកក៏ត្រូវអ្នកជិតខាងរិះគន់ ដោយសារមានអ្នកចាំនៅមុខផ្ទះច្រើនពេករាល់ថ្ងៃ៕