ជីវិតប្តីប្រពន្ធថ្មោងថ្មីងាយបែកគ្នាបំផុត បើឆ្លងមិនផុត៣ដំណាក់កាលនេះបាន
- 2022-08-15 05:10:00
- ចំនួនមតិ 0 | ចំនួនចែករំលែក 0
ជីវិតប្តីប្រពន្ធថ្មោងថ្មីងាយបែកគ្នាបំផុត បើឆ្លងមិនផុត៣ដំណាក់កាលនេះបាន
ទោះស្រលាញ់គ្នាក្បាលក្រាបដល់កន្ទេលក៏ដោយ ជីវិតប្តីប្រពន្ធងាយរងការប៉ះទង្គិចបំផុត រហូតអាចឈានដល់ការលែងលះបាន នៅដំណាក់កាលទាំង៣នេះ។
១. ឆ្នាំដំបូងក្រោយរៀបការ
ពេលមនុស្ស២នាក់រស់នៅក្រោមដំបូលផ្ទះតែមួយ ទាំងចំណុចខ្សោយនិងខ្លាំងរបស់ដៃគូម្នាក់ៗត្រូវបានលាតត្រដាង មិនថាអត្តចរិត របៀបរស់នៅ ទស្សនៈផ្សេងៗ គឺអាចខុសពីការរំពឹងទុកទាំងអស់។ ប្រសិនបើអ្នករំពឹងខ្លាំងពេកលើដៃគូក្រោយរស់នៅជាមួយគ្នា អាចនឹងមានរឿងខ្លះខកចិត្ត ដោយសារតែវាមិនដូចការគិតទាំងអស់នោះទេ។ ក្រៅពីនេះ ឆ្នាំដំបូង គូស្វាមីភរិយាថ្មីថ្មោងតែងមានបញ្ហាខ្លះៗពីហិរញ្ញវត្ថុ ហេតុនេះពេលខ្លះអាចកើតជម្លោះ ឬឈានដល់ការលែងលះទៀតក៏ថាបាន។
២. ឆ្នាំដំបូងក្រោយផ្តល់កំនើតកូនរួច
អំឡុងពេលភរិយាកំពុងពពោះ ជាពេលដែលស្វាមិមួយចំនួនឆ្លៀតឱកាសរកក្រៅដោយសារតែប្រពន្ធមិនអាចបំពេញតម្រូវការផ្លូវភេទបាន។ ក្រោយផ្តល់កំនើតកូនរួច ភរិយារវល់ថែទាំកូន ហើយមិនសូវមានពេលច្រើនជាមួយស្វាមីឡើយ ដែលជាហេតុធ្វើឲ្យរឿងមិនយល់ចិត្តគ្នាអាចកើតឡើងអំឡុងពេលនេះ។ ម្យ៉ាងទៀត ភរិយាតែងចង់ឲ្យស្វាមីជួយមើលកូនតូចដែរ តែបុរសខ្លះមិនសូវអើពើទេដោយគេគិតថានេះជាភារកិច្ចរបស់ប្រពន្ធ ។ មិនតែប៉ុណ្ណោះ នៅពេលមានកូនតូច ការចំណាយផ្សេងៗក្នុងគ្រួសារក៏លើសមុនដែរ ដែលជាហេតុធ្វើឲ្យគ្រួសារខ្លះប្រែជាមិនយល់ចិត្តគ្នា។
៣. ៧ឆ្នាំ ក្រោយរៀបការ
អ្នកជំនាញនិយាយថា អំឡុងពេលរៀបការបាន៧ឆ្នាំហើយ ដំណាក់ការលំបាកនឹងចូលមកម្តងទៀត ហើយបើស្វាមីភរិយាមិនដឹងពីដំណោះស្រាយទេ ផ្លូវបំបែកងាយទៅរកណាស់។ ហេតុផលដោយសារពួកគេស្គាល់ចរិតគ្នាច្បាស់ពេក ហើយទម្លាប់ប្រចាំថ្ងៃអាចដដែរៗ គួរឲ្យធុញ។ ឆ្លងកាត់រយៈពេល៧ឆ្នាំ រឿងឈ្លោះគ្នាក៏ច្រើនដោយសារបញ្ហាកូនៗ សេដ្ឋកិច្ច ការងារ ឬផ្លូវភេទជាដើម។ ដើម្បីដោះស្រាយបញ្ហានេះ គូស្វាមី ភរិយា គួររក្សាចិត្ត រឬម្ងាប់ចិត្តសម្រាប់ជីវិតអាពាហ៍ពិពាហ៍មួយនេះ ដោយចេះលំហែកាយនាំកូនៗទៅដើរលេង មើលកុន បង្កើតបទពិសោធន៍អ្វីថ្មីៗ ឬនិយាយពីផែនការជីវិតគ្រួសារម្តងទៀតជាមួយប្តីនិងប្រពន្ធឲ្យបានច្បាស់៕