Jackson Yee បំបែក Wang Yi Bo និង Xiao Zhan ត្រូវគេដៀមដាន
- 2022-06-14 02:40:00
- ចំនួនមតិ 0 | ចំនួនចែករំលែក 0
Jackson Yee បំបែក Wang Yi Bo និង Xiao Zhan ត្រូវគេដៀមដាន
ទោះបីជាមានអាយុទើបតែ២១ឆ្នាំ តែកំពូលតារាសម្ដែង និងចម្រៀងចិន Jackson Yee ទទួលបានសមិទ្ធិផលធំៗ ធ្វើឲ្យតារាសម្ដែងប្រុសដទៃរងការរិះគន់។
កាលពីថ្ងៃទី ១៣ ខែមិថុនាកន្លងទៅនេះ បណ្ដាញព័ត៌មាន Sina បានរាយការណ៍ថា តារាសម្ដែងប្រុសលំដាប់ A ចិន Jackson Yee បានបំបែកកំណត់ត្រាដែលមិនទាន់មានសិល្បករណាអាចធ្វើបាន។ តាមនោះដែរ សមាជិកក្រុមចម្រៀង TFBOYS បានក្លាយទៅជាតារាសម្ដែងក្មេងបំផុត ជាប់ជាបេក្ខភាពតារាសម្ដែងប្រុសឆ្នើមបំផុត ក្នុងកម្មវិធីប្រគល់ពានភាពយន្ត One Hundred Flowers សម្រាប់ស្នាដៃឈ្មោះ Nice View របស់លោក។ តាមនោះដែរ ប្រុសស្អាតកើតឆ្នាំ ២០០១ ទទួលបានសំឡេងឆ្នោតខ្ពស់ និងបានចូលប្រកួតវគ្គផ្ដាច់ព្រ័ត្រជាមួយតារារៀមច្បងជាច្រើនរូប។
ដោយសារតែ សមិទ្ធិផលរបស់ Jackson Yee ទទួលបាននេះ គឺជាការប៉ងប្រាថ្នារបស់តារាផ្សេងទៀតជាច្រើន ដូចនេះហើយ តារារួមជំនាន់របស់លោក ត្រូវបានទស្សនិកជន និងអ្នកជំនាញរិះគន់មិនតិចឡើយ។ តាមនោះដែរ តារាសម្ដែងប្រុសជួរមុខដូចជា Xiao Zhan, Wang Yi Bo និង Yang Yang សុទ្ធតែត្រូវគេរិះគន់ទាំងអស់ ក្រោយព័ត៌មានខាងលើត្រូវបានចុះផ្សាយ។
ជាក់ស្ដែង ប្រុសស្អាតទាំងបីខាងលើ ទទួលបានតែពានរង្វាន់ប្រជាប្រិយភាពប៉ុណ្ណោះ ដោយមិនទាន់ទទួលបានពានរង្វាន់វិជ្ជាជីវៈទទួលស្គាល់ពីសមត្ថភាពសូម្បីតែមួយ។ មូលហេតុគឺភាគច្រើន ប្រុសស្អាតទាំងបី ទទួលតែគម្រោងរឿងភាគដោយកម្រទទួលគម្រោងភាពយន្ត ធ្វើឲ្យពួកគេពិបាកឈោងយករង្វាន់ធំៗ៕