ខំស្រលាញ់មនុស្សដែលនៅអាល័យអ្នកចាស់ ដូចទឹកនៅលើស្លឹកឈូក

2022-01-16 14:06:00
ចំនួនមតិ 0 | ចំនួនចែករំលែក 0

មនុស្សស្រីតែងមានគំនិតរ៉ូមេនទិកថា ឲ្យតែខ្លួនស្រលាញ់គេអស់ពីចិត្ត ទោះបីជាគេចិត្តរឹងដូចថ្មយ៉ាងណាក៏នឹងទន់មកវិញដែរ។ យ៉ាងណាមិញ មនុស្សគិតមិនដូចទេវតាគិតឡើយ ទោះពេលខ្លះខំប្រឹងអស់ពីសមត្ថភាពក៏មិនប្រាកដថានឹងទទួលបានផលមកវិញដែរ។

រូបតំណាង

ជានិច្ចកាលនារីៗតែងមានគំនិតសាមញ្ញថា ឲ្យតែយើងលះបង់ច្រើនចំពោះគេ គេនឹងអាណិតស្រលាញ់វិញ ហើយក៏មានមនុស្សស្រីមិនតិចដែរ ដែលមិនដឹង ឬធ្វើមិនដឹងតែម្ដងថា ខ្លួនឯងគ្រាន់តែជាតួជំនួស ជាអ្នកបំពេញចន្លោះរបស់គេ ឬគ្រាន់តែជាឧបករណ៍សម្រាប់គេបន្លប់ចិត្តតែប៉ុណ្ណោះ។ តែនៅព្រមទទួលយក ព្រោះគិតថានេះគឺជាវិធីស្រលាញ់របស់គេ។ តែស្នេហាគឺជាការអត់ឱន តែមិនមែនន័យថាឆោតល្ងង់ទេ។

ការអត់ឱនធ្វើឲ្យយើងសប្បាយចិត្ត ព្រោះអាចលើកលែងឲ្យគេ កែលម្អរឡើងវិញ។ តែឆោតល្ងង់គឺជាការភ័យខ្លាច ព្រួយបារម្ភ ប្រើគ្រប់វិធីដើម្បីចងជើងគេ សុខចិត្តបន្ទាបតម្លៃខ្លួនឯងដើម្បីដោះដូរយកស្នាមញញឹមមួយ ទោះវាមិនបានចេញពីចិត្តគេក៏ដោយ។ ហើយក៏គ្មានមនុស្សស្រីណាមានចិត្តអត់ធ្មត់គ្រប់គ្រាន់ដើម្បីចាំតែអត់អោនឲ្យគេរហូតនោះទេ នៅពេលដែលបេះដូងគេនៅតែសំលឹងឃើញតែមនុស្សអតីតនោះ។

មានតែមនុស្សស្រីឆោត និងគ្មានភាពជឿជាក់តែប៉ុណ្ណោះដែលសុខចិត្តដើរតួជំនួស សុខចិត្តនៅក្បែមនុស្សម្នាក់ដែលមិនស្រលាញ់ខ្លួន ហើយក៏មានតែមនុស្សប្រុសអន់ទេ ដែលយកគេមកធ្វើតួជំនួស ទាំងដែលចិត្តខ្លួននៅអាល័យអ្នកចាស់។ ការពិតពាក្យដែលគេនិយាយថាស្រលាញ់យើងនោះ គឺសំដៅដល់មនុស្សអតីតរបស់គេដែលលែងមានឱកាសនិយាយទៀតតែប៉ុណ្ណោះ។ គេយកយើងមកដើម្បីបន្លប់ចិត្ត បន្លប់ភាពឯកា ឬគ្រាន់តែយកឌឺអ្នកចាស់ ទាំងនៅស្រលាញ់គេតែប៉ុណ្ណោះ។

ស្នេហាត្រូវដើរទន្ទឹមជាមួយនឹង ការគិត និងបេះដូង។ កុំបណ្ដោយឲ្យបេះដូងដឹកមុខរហូត ព្រោះអ្នកនឹងចាញ់ ហើយខាតបង់ប៉ុណ្ណោះ។ ពេលខ្លះត្រូវស្ដាប់ខួរក្បាលរបស់យើងផង ថាយើងកំពុងដើរត្រូវឬអត់ ហើយការលះបង់របស់យើងវាស័ក្ដិសមនឹងគេទទួលយកអត់៕