ទង្វើ ៤ បង្ហាញថាអ្នកកំពុងតែបំផ្លាញខ្លួនឯង ដោយមិនដឹងខ្លួន

2021-10-14 02:15:00
ចំនួនមតិ 0 | ចំនួនចែករំលែក 0

នៅក្នុងជីវិតរស់នៅសព្វថ្ងៃ មនុស្សម្នាក់ៗតែងខំប្រឹងឈោងចាប់ក្ដីស្រមៃ ដើម្បីទទួលបាននូវជោគជ័យ។ ស្របគ្នានេះដែរ ដើម្បីចង់បានជោគជ័យ និង ផលប្រយោជន៍ផ្ទាល់ខ្លួនមនុស្សមួយចំនួនបែរជាហានធ្វើអ្វីគ្រប់យ៉ាង មិនគិតពីផលវិបាកចំពោះមនុស្សជុំវិញខ្លួនទាល់តែសោះ។ យ៉ាងណាមិញ ពួកគេមិនបានដឹងទេថា ទង្វើខ្លះមិនត្រឹមតែមិនបានជួយអ្នកឲ្យជោគជ័យ ហើយថែមទាំងបង្ហាញប្រាប់គេឯងថាអ្នកកំពុងតែបំផ្លាញខ្លួនឯងទៀតផង តួយ៉ាងដូច ៥ ចំណុចខាងក្រោម៖

រូបតំណាង

**១. ចូលចិត្តប្រៀបធៀប**

បើអ្នកជាមនុស្សចូលចិត្តប្រៀបប្រដូចខ្លួនឯងទៅអ្នកដទៃ ឬ ប្រៀបធៀបមនុស្សម្នាក់ទៅមនុស្សម្នាក់ទៀត នោះអ្នកជាមនុស្សដែលមិនសូវមានការគិតទូលំទូលាយនៅឡើយទេ។ មនុស្សម្នាក់ៗសុទ្ធតែមានខ្សែជីវិតផ្សេងៗគ្នា រឿងដែលពួកគេឆ្លងកាត់ក៏ខុសៗគ្នា ដូច្នេះ យកល្អគប្បីចេះអបអរនូវអ្វីដែលខ្លួនមាន ហើយស្រឡាញ់អ្នកជាខ្លួនអ្នក។

២. គិតថាខ្លួនល្អឥតខ្ចោះ

ជាការពិត រៀនធ្វើជាមនុស្សទឹកកន្លះកែវគឺប្រសើរជាងធ្វើជាមនុស្សទឹកពេញកែវ។ ពោលគឺ ទោះអ្នកពូកែយ៉ាងណាក្ដី គួររៀនចេះដាក់ខ្លួន ហើយទទួលយកនូវមេរៀន និងគំនិតល្អៗ ថ្មីៗរបស់គេឯងមកដាក់ក្នុងខ្លួនបន្ថែមទើបជាការល្អ ជៀសជាងតាំងខ្លួនជាមនុស្សចេះដឹងគ្រប់សព្វហើយមិនព្រមទទួលយកគំនិតអ្នកណាទាំងអស់ក្រៅពីគំនិតរបស់ខ្លួន ព្រោះយល់ថាគ្មានអ្នកណាម្នាក់មានសមត្ថភាពលើសខ្លួននោះឡើយ។

រូបតំណាង

៣. ចូលចិត្តនៅមួយកន្លែង

ជាការពិត អ្នកណាក៏ចូលចិត្តនៅកន្លែងដែលសុខស្រួល គ្មានហានិភ័យ គ្មានការខ្វាយខ្វល់អ្វីនោះដែរ តែដឹងអត់ថាកន្លែងដែលសុខស្រួលនោះច្រើនគ្មានផ្ដល់នូវភាពរីកចម្រើនដល់អ្នក? ជាក់ស្ដែង អ្នកគួររៀនសាកល្បងនូវអ្វីដែលថ្មី ហើយខុសពីអ្វីដែលអ្នកធ្លាប់ឆ្លងកាត់ខ្លះ ព្រោះថាជីវិតមានរឿងច្រើនណាស់ដែលអ្នកអាចរៀនសូត្របាន។ ការនៅមួយកន្លែងគ្មានអ្វីខុសពីការឃុំខ្លួនឯងពីការឈោងចាប់ភាពជោគជ័យពិតប្រាកដនោះទេ។

៤. រស់តាមការរំពឹងទុករបស់គេ

ប្រសិនបើជានិច្ចកាលអ្នកតែងសម្រេចចិត្តធ្វើអ្វីមួយតាមការរំពឹងរបស់អ្នកដទៃ ឬ មនុស្សជុំវិញខ្លួនមិនថាគ្រួសារ មិត្តភក្ដិ ឬ មិត្តប្រុស ដោយមិនបានធ្វើតាមបេះដូងរបស់ខ្លួននោះអ្នកកំពុងតែរស់នៅតាមការរំពឹងទុករបស់គេហើយ។ ការធ្វើបែបនេះក្នុងរយៈពេលយូរនឹងអាចបំផ្លាញនូវភាពជោគជ័យពិតរបស់អ្នក ព្រោះអ្នករមែងចាំតែធ្វើតាមគំនិត និង ការយល់ស្របរបស់អ្នកដទៃដែលមិនមែនជាខ្លួនអ្នកផ្ទាល់៕