នៅពេលបុរសចង់សាងអនាគតរួមគ្នានឹងនារីណាម្នាក់ គាត់មិនស្ទាក់ស្ទើរធ្វើរឿងទាំងនេះឡើយ

2021-08-04 01:55:00
ចំនួនមតិ 0 | ចំនួនចែករំលែក 0

អ្នកទាំងពីរកំពុងស្រលាញ់គ្នា តែមិនច្បាស់ថា តើគាត់ចង់បានទំនាក់ទំនងយូរអង្វែងជាមួយអ្នកឬអត់។ សាកចូលមើលចំណុចខាងក្រោមនេះ នឹងដឹងច្បាស់មិនខាន។

១. ធ្វើឲ្យអ្នកមានអារម្មណ៍ថា អ្នកជាមនុស្សស្រីតែមួយគត់ក្នុងលោកនេះ

បុរសដែលចង់មានអនាគតជាមួយអ្នក គាត់នឹងធ្វើឲ្យអ្នកយល់ថា អ្នកជាមនុស្សស្រីតែមួយគត់ក្នុងលោកនេះ។ នៅក្នុងចិត្តរបស់គាត់ គ្មាននារីណាផ្សេងសំខាន់ដូចអ្នកឡើយ។

២. គាត់មានគម្រោងអនាគតជាមួយអ្នក

បុរសដែលចង់រួមដំណើរជាមួយអ្នក គាត់នឹងមិនស្ទាក់ស្ទើរក្នុងការបង្កើតគម្រោងអនាគតជាមួយអ្នកនោះទេ។

៣. គាត់ប្រើពាក្យ "យើង" និង "របស់ពួកយើង"

វិធីដែលគាត់និយាយក្នុងពេលបច្ចុប្បន្ននិងអនាគត នឹងស្តែងចេញតាមរយៈការតាំងចិត្តនិយាយដើម្បីបញ្ជាក់ពីការចង់បានទំនាក់ទំនងរយៈពេលយូរជាមួយអ្នក។ មនុស្សប្រុសដែលចង់សាងអនាគតជាមួយអ្នក គាត់នឹងប្រើពាក្យ "យើង" និង"របស់ពួកយើង" ជំនួសឲ្យ "អ្នក" និង"របស់អ្នក" នៅពេលជជែកគ្នាពីបច្ចុប្បន្ន និងអនាគត។

៤. គាត់បើកទំព័រជីវិតថ្មីជាមួយអ្នក

គាត់នឹងចាប់ផ្តើមគ្រប់យ៉ាងជាមួយអ្នក ដោយមិនលាក់លៀមពីទំនាក់ទំនងរបស់អ្នកទាំងពីរជាមួយមិត្តភក្កិ ឬសាច់ញាតិឡើយ។ គាត់នឹងចែករំលែករឿងរ៉ាវពាក់ព័ន្ធរបស់គាត់ ឲ្យអ្នកបានដឹង។

៥. តែងតែគាំទ្រអ្នកជានិច្ច

គាត់តែងតែគាំទ្រអ្នកអស់ពីចិត្តមិនថាពេលណាក៏ដោយដែលអ្នកត្រូវការ ហើយតែងតែនៅក្បែរអ្នកនិងមិនបោះបង់ចោលអ្នកឡើយ ទោះបីជាស្ថានការណ៍លំបាកម៉េចក៏ដោយ។

៦. យកគំនិតរបស់អ្នកមកត្រិះរិះ

បុរសដែលចង់សាងអនាគតរួមគ្នាជាមួយអ្នក នឹងតែងតែស្តាប់តាមដំបូន្មានរបស់អ្នក។ នេះជាសញ្ញាបង្ហាញថា គាត់សម្របខ្លួនជាមួយអ្នកនៅពេលអ្នកព្យាយាមផ្តល់ជាមតិយោបល់ទៅលើរឿងដែលមានសារៈសំខាន់សម្រាប់គាត់។

៧. ប្រាប់អ្នកពី Password

ដោយសារតែចង់បង្កើតភាពជឿជាក់ខ្លាំងឲ្យអ្នក គាត់មិនរារែកនឹងប្រាប់អ្នកពី Password ទូរសព្ទ អ៊ីម៉ែល FB ឬ IG របស់គាត់ឡើយ។ នេះជាសញ្ញាមួយដ៏ធំសម្បើមបញ្ជាក់ថា គាត់ចង់សាងអនាគតជាមួយអ្នកខ្លាំងបំផុត។

៨. ចង់ឲ្យអ្នកជួបគ្រួសាររបស់គាត់

ការទៅជួបឪពុកម្តាយនិងបងប្អូនបង្ហាញថា គាត់ច្បាស់លាស់នឹងទំនាក់ទំនងនេះជាមួយអ្នកហើយ។ លើសពីនេះ បើគាត់នាំអ្នកទៅជួបរាល់សមាជិកគ្រួសារទាំងអស់របស់គាត់ដូចជា យាយតា មីងមា បងប្អូនជីដូនមួយថែមទៀត គឺជាសញ្ញាច្បាស់១០០០% ថាគាត់ចង់បានអ្នកជាអនាគតភរិយារបស់គាត់។

៩. ចំណាយពេលវេលារីករាយជាមួយអ្នក

គាត់តែងឆ្លៀតពេលទំនេរ ដើម្បីកុំឲ្យអ្នកមានអារម្មណ៍ថាធុញទ្រាន់នឹងជីវិត ដែលនេះជាសញ្ញាដ៏អស្ចារ្យសម្រាប់អ្នកទាំងពីរ។

១០. គាត់ឲ្យសូម្បីតែសោរផ្ទះរបស់គាត់

មនុស្សប្រុសភាគច្រើនតែងតែចង់បានទីកន្លែងផ្ទាល់ខ្លួន ។ ដូច្នេះប្រសិនបើគាត់ឲ្យសូម្បីតែសោរផ្ទះក៏ឲ្យដល់អ្នកដែរនោះ ជាសញ្ញាដ៏ធំមួយបង្ហាញថា គាត់ពិតជាចង់ជជែកពីអនាគតជាមួយអ្នកខ្លាំងបំផុត៕

ប្រភព៖ emdep ប្រែសម្រួល៖ លឹម សុនា