អ្នកគាំទ្រព្រួយបារម្ភព្រោះរឿងថ្មីរបស់ Xiao Zhan និង Yang Zi បែកធ្លាយមុនថ្ងៃចាក់ផ្សាយ

2021-08-02 09:15:00
ចំនួនមតិ 0 | ចំនួនចែករំលែក 0

ហ្វេនរបស់តារាសម្ដែងជួរមុខចិន Yang Zi និង Xiao Zhan កំពុងព្រួយបារម្ភថា ចំនួនអ្នកមើលរឿងថ្មីរបស់អ្នកទាំង២នឹងធ្លាក់ចុះ ព្រោះសាច់រឿងត្រូវបែកធ្លាយ។

កាលពីថ្ងៃទី ១ សីហាកន្លងទៅនេះ បណ្ដាញព័ត៌មាន Sina បានរាយការណ៍ថា រូបភាពជាច្រើនសន្លឹកនៃរឿងភាគ The Oath of Love ដែលមានការចូលរួមសម្ដែងពីតារាជួរមុខ Xiao Zhan និង Yang Zi បានបែកធ្លាយជាច្រើនសន្លឹកលើបណ្ដាញសង្គម។

ប្រភពដដែលបានឲ្យដឹងថា រូបភាពដែលត្រូវគេបញ្ចេញនេះសុទ្ធតែកម្រងរូបស្ថិតក្នុងឈុតឆាកសំខាន់ៗដូចជា ឈុតតួឯកទាំង២រៀបការជាដើម អាស្រ័យហេតុនេះហើយ អ្នកគាំទ្ររបស់សិល្បករទាំង២កំពុងតែព្រួយបារម្ភជាខ្លាំង ត្បិតពួកគេដឹងថារឿងមាន Happy Ending រួចទៅហើយ ដូចនេះចំនួនអ្នកដែលមានចម្ងល់ក៏ដូចជាចង់ទស្សនារឿងក៏អាចធ្លាក់ចុះតាមនោះដូចគ្នា។

មុននោះដែរ អ្នកគាំទ្ររបស់តារាលំដាប់ A ទាំង២បានត្រេកអរជាខ្លាំង នៅពេលដឹងថា រឿងខាងលើមានកាលបរិច្ឆេទចាក់ផ្សាយហើយ គឺនៅថ្ងៃទី៨ ខែសីហាខាងមុខនេះ។ យ៉ាងណាក្ដី ដោយសារតែរូបភាពក្នុងរឿងត្រូវទម្លាយចេញក្រៅមុនពេលចាក់ផ្សាយ ពួកគេខ្លាចថា ទស្សនិកជនដែលកំពុងទន្ទឹងរង់ចាំនេះ នឹងធ្លាក់ចុះនៅពេលរឿងចាក់ផ្សាយមែនទែន៕