ម្ចាស់ផ្ទះគាំងស្ដីមិនចេញ ពេលត្រូវចោរស្រាតរត់ពេញផ្ទះ ហើយថាខ្លួនទើបជាម្ចាស់ផ្ទះ

2021-06-23 02:38:00
ចំនួនមតិ 0 | ចំនួនចែករំលែក 0

ក្រោយពេលចោររូបនេះត្រូវបានប៉ូលិសចាប់បាន លោកបានស្រែកក្ដែងៗវិញថា លោកទើបជាម្ចាស់ផ្ទះមួយនេះ ហើយម្ចាស់ផ្ទះនេះហើយ ទើបជាចោរដែលលួចចូលផ្ទះលោក។

មុននេះបន្តិច បណ្ដាញព័ត៌មាន CBS បានរាយការណ៍ថា បុរសម្នាក់រស់នៅទីក្រុង Los Angeles សហរដ្ឋអាមេរិក បានបង្ហាញពីវីដេអូកាមេរ៉ាសុវត្ថិភាព ឃើញថា ចោរម្នាក់បានលួចចូលផ្ទះរបស់ខ្លួន ហើយស្រាតដើរពេញផ្ទះ និងចូលហែលទឹកក្នុងអាងរបស់ខ្លួនទៀតផង។

បុរសជាម្ចាស់ផ្ទះឈ្មោះ Mat Sabz បានឲ្យដឹងថា នៅពេលមកដល់ផ្ទះ គឺលោកបានឃើញចោររូបនេះរត់ពេញផ្ទះខ្លួនរួចហើយ ពេលនោះលោកក៏បានទូរសព្ទប្រាប់ប្រពន្ធ និងកូនពីរឿងនេះ។ ម្ចាស់ផ្ទះបានប្រាប់បន្ថែមថា លោកបានស្រែក ហើយគិតថា ចោរនេះនឹងភ័យរត់ចេញក្រៅ។ តែចោរនេះបែរជាមិនភ័យ ហើយស្រែកទៅលោកវិញថា លោកទើបជាចោរចូលផ្ទះរបស់គេ។

ម្ចាស់ផ្ទះ និងចោរដែលមានឈ្មោះ Paul Kiyan អាយុ ៣៤ឆ្នាំ បានប្រតាយប្រតប់គ្នា មុនពេលម្ចាស់ផ្ទះរត់ចេញក្រៅ ហើយប្ដឹងប៉ូលិស។ សំណាងល្អ នៅពេលកើតហេតុ ប្រពន្ធ និងកូនរបស់លោកមិននៅផ្ទះ។

ប៉ូលិសក្នុងតំបន់បានឲ្យដឹងថា ចោររូបនេះគឺជាជនគ្មានផ្ទះសម្បែង ហើយបានចូលលួចឥវ៉ាន់នៅក្នុងចំណតរថយន្ត តែពេលឃើញអាងហែលទឹកទំនងពេក ក៏ចូលហែលទឹក រួចស្រាតចេញដើរពេញផ្ទះ ស្របពេលម្ចាស់ផ្ទះមកដល់។ ប៉ូលិសក៏បន្ថែមដែរថា នេះមិនមែនជាលើកទី១ឡើយដែលលោកចូលផ្ទះអ្នកនៅក្នុងតំបន់នេះ៕