បង្ហាញអត្តសញ្ញាណតារាប្រុសដែលសង្ហាខ្លាំងពេក ធ្វើឲ្យគ្រូមិនឲ្យចូលរៀនម៉ោងកីឡា

2021-06-22 03:05:00
ចំនួនមតិ 0 | ចំនួនចែករំលែក 0

ដោយសារតែមានរូបសម្បត្តិស្អាតលើសអ្នកដទៃខ្លាំងពេក ជីវិតនៅពេលសិក្សារបស់តារាសម្ដែងប្រុសរូបនេះ គឺវេទនាខ្លាំង ដោយសារតែត្រូវបានគេចោមរោមខ្លាំងពេក ដល់ថ្នាក់គ្រូក៏វិលមុខ។

មុននេះបន្តិច បណ្ដាញព័ត៌មាន Sina បានចុះផ្សាយអំពីប្រវត្តិរូបដ៏ល្បីររបស់តារាសម្ដែងប្រុសម្នាក់ ដោយសារតែស្អាតហួសហេតុពេកបាននាំទុក្ខមកដល់ខ្លួន។ តាមនោះដែរ ប្រុសស្អាតដែលធ្លាប់ជាជនរងគ្រោះនៃភាពសង្ហានេះគឺ តារាសម្ដែងប្រុស Li Yifeng។

ប្រភពខាងលើ បានយោងតាមសម្ដីមិត្តរបស់ ប្រុសស្អាតអាយុ៣៤ឆ្នាំនេះថា កាលថ្នាក់វិទ្យាល័យ សិល្បកររូបនេះគឺវេទនាខ្លាំងណាស់ ដោយសារតែភាពសង្ហារបស់លោកល្បីខ្លាំងពេក។ រាល់សប្ដាហ៍សំបុត្រសារភាពស្នេហ៍របស់លោកគឺគរដូចភ្នំ។ ហើយសិស្សស្រីមកពីសាលាផ្សេងសុខចិត្តពួនក្នុងគុម្ពឈើ ដើម្បីចាំជួបមុខលោក។ មានសិស្សស្រីម្នាក់បានឲ្យដឹងថា គ្រាន់តែលក់របស់របរដែលប្រុសស្អាតនេះធ្លាប់ប្រើដូចជា ប៊ិច សៀវភៅ ឬក្រដាសជូតមាត់ដែលលោកប្រើហើយនោះ ក៏នាងរកលុយបានមិនស្ទើរដែរ។

យ៉ាងណាក្ដី អ្វីដែលធ្វើឲ្យគេមិនជឿនោះគឺ មួយសាលាសិស្សរាប់ពាន់នាក់ មានតែ Li Yifeng ម្នាក់ប៉ុណ្ណោះ ដែលមានឯកសិទ្ធិមិនចាំបាច់ចូលរៀនម៉ោងកីឡា ព្រោះនៅពេលដែលលោកចូលរៀនម៉ោងនេះ នឹងធ្វើឲ្យឆោឡោពេញមួយសាលា គ្មានអ្នកណាអាចរៀនសូត្របានទាំងអស់។ ចាប់ពីពេលនោះមក គ្រូកីឡារបស់លោក ហាមដាច់ខាតមិនឲ្យលោកចូលរៀនម៉ោងនេះឡើយ។ ក្រៅពីនេះ គ្រូបន្ទុករបស់លោកត្រូវរៀបឲ្យលោកអង្គុយនៅកណ្ដាលសិស្សប្រុស បើមិនដូចនោះទេ សិស្សស្រីនឹងច្រណែនឈ្លោះគ្នាមិនខាន។

ក្រោយពេលរឿងនេះត្រូវបានចុះផ្សាយ ទស្សនិកជនជាច្រើនបានលាន់មាត់ថា ជីវិតពេលនៅរៀនរបស់ប្រុសស្អាតកើតឆ្នាំ ១៩៨៧ មិនខុសពីរឿងភាពយន្តនោះទេ គឺមានគ្រប់រសជាតិទាំងអស់៕