ដាក់ខ្នោះដៃគ្នាដើម្បីបង្ហាញក្ដីស្រលាញ់ បាន៤ខែសុំកាត់ចោលព្រោះបែកគ្នាវិញ
- 2021-06-22 02:36:00
- ចំនួនមតិ 0 | ចំនួនចែករំលែក 0
ដាក់ខ្នោះដៃគ្នាដើម្បីបង្ហាញក្ដីស្រលាញ់ បាន៤ខែសុំកាត់ចោលព្រោះបែកគ្នាវិញ
គូស្នេហ៍ពីប្រទេស Ukraine ធ្លាប់ទទួលបានចំណាប់អារម្មណ៍ជាខ្លាំង នៅពេលពួកគេហ៊ានដាក់ខ្នោះដៃគ្នាដើម្បីបាននៅជាប់គ្នាគ្រប់ពេល ពេលនេះបានសុំឲ្យគេកាត់ខ្នោះចោល ព្រោះចង់ដើរផ្លូវរៀងខ្លួនហើយ។
កាលពីថ្ងៃបុណ្យនៃក្ដីស្រលាញ់ឆ្នាំនេះ នាង Viktoria Pustovitova និងលោក Alexander Kudlay មកពីប្រទេស Ukraine បានធ្វើឲ្យមហាជនភ្ញាក់ផ្អើលជាខ្លាំង នៅពេលគូសង្សារនេះ បានហ៊ានដាក់ខ្នោះដៃគ្នា ដើម្បីកុំឲ្យឃ្លាតឆ្ងាយគ្នា ១វិនាទីណាទាំងអស់។ ពួកគេបានរស់នៅដោយរួមមាន ការផ្លាស់ខោអាវ គេង ញ៉ាំ និងទៅបន្ទប់ទឹកជាមួយគ្នាជាង ៤ខែមកហើយ។
យ៉ាងណាក្ដី គូស្នេហ៍មួយនេះ ទ្រាំលែងបានហើយ ទើបកាលពីមុននេះបន្តិច ពួកគេបានមកទីក្រុង Kharkov ដើម្បីពឹងគេឲ្យកាត់ខ្នោះដៃនេះចេញ។ ពួកគេបានធ្វើសកម្មភាពនេះ នៅមុខកាមេរ៉ាជាច្រើន និងត្រូវអ្នកកាសែតសួរសំនួរផងដែរ។
តំណាងរបស់ Guiness ប្រទេសខាងលើក៏បញ្ជាក់ផងដែរថា ពួកគេគឺជាគូស្នេហ៍ដែលបានពាក់ខ្នោះជាមួយគ្នាបានយូរជាងគេ។ យ៉ាងណាក្ដី អ្នកទាំង២ខាងលើ មិនត្រឹមតែកាត់ខ្នោះចេញពីគ្នានោះឡើយ គឺពួកគេបានសម្រេចចិត្តថា នឹងបែកគ្នា ចែកផ្លូវគ្នាដើរ ពីពេលនេះតទៅ នឹងមិនមើលមុខគ្នាទៀតឡើយ។ អ្នកទាំង២ក៏បានបង្ហាញការរំភើបជាខ្លាំង នៅពេលបានកាត់ខ្នោះដៃនេះចោល។
ខាងស្រីបានបង្ហាញប្រាប់ថា នាងបានរង់ចាំថ្ងៃត្រលប់ទៅរស់នៅបែបធម្មតានេះយូរមកហើយ នាងសង្ឃឹមថា នេះគឺជាមេរៀនដែលគូស្នេហ៍ប្រទេស Ukraine នានាអាចមើល និងកុំជាន់ដានរបស់នាង។ ឯខាងប្រុសវិញ បានវាចាថា អ្នកទាំង២មិនទាន់ស្វែងយល់ពីគ្នាច្បាស់ ដូចនេះហើយ ពេលរស់នៅជាមួយគ្នា ធ្វើឲ្យពួកគេដឹងថា ពួកគេមានការគិតខុសគ្នា។ អ្នកទាំង២នឹងយកខ្នោះដៃនេះទៅដេញថ្លៃ ដោយរំពឹងថានឹងទទួលបានទឹកប្រាក់ ១១ម៉ឺនដុល្លារ៕