បុរសដែលមានប្រពន្ធ៣៩នាក់ និងកូន៩៤នាក់ បានទទួលមរណភាពហើយ

2021-06-17 02:45:00
ចំនួនមតិ 0 | ចំនួនចែករំលែក 0

លោក Ziona Chana ដែលត្រូវបានគេជឿជាក់ថា ជាមនុស្សប្រុសដែលមានប្រពន្ធ និងកូនច្រើនជាងគេលើលោកនោះ បានស្លាប់ហើយ។

មុននេះបន្តិច បណ្ដាញព័ត៌មាន India Express បានរាយការណ៍ថា លោក Ziona Chana ដែលជាមនុស្សប្រកាន់ខ្ជាប់ប្រពន្ធច្រើននៅប្រទេសឥណ្ឌាបានទទួលមរណភាពហើយ បន្សល់នូវប្រពន្ធចំនួន ៣៩នាក់ និងកូន៩៤នាក់។ មេគ្រួសារអាយុ ៧៦ឆ្នាំរូបនេះ រស់នៅក្នុងផ្ទះតែមួយ ដែលមានសមាជិក ២០០នាក់។

ប្រភពដដែលបានឲ្យដឹងថា លោកបានធ្លាក់ខ្លួនឈឺតាំងពីថ្ងៃទី ៦ ខែមិថុនា និងមិនអាចញ៉ាំអ្វីបានទាំងអស់។ លោកបានស្លាប់នៅមន្ទីរពេទ្យ Trinity ទីក្រុង Aizawl កាលពីថ្ងៃទី ១៣ ខែមិថុនា ដោយសារសម្ពាធឈាមខ្ពស់ និងទឹកនោមផ្អែម។ ក្រៅពីចំនួនប្រពន្ធ និងកូនដ៏ច្រើនខាងលើ លោកក៏មានកូនប្រសារចំនួន ១៤នាក់ ចៅចំនួន ៣៣នាក់ និងចៅទួតម្នាក់។ អាហារពេលល្ងាចរបស់ពួកគេត្រូវចំណាយមាន់ ៣០ក្បាល ដំឡូងបារាំង ៤៥គីឡូ និងអង្ករ១០០គីឡូ។

ក្រៅពីនេះ គ្រួសារខាងលើក៏ត្រូវរស់នៅក្នុងផ្ទះដែលមានបន្ទប់ឡើងដល់ ១០០បន្ទប់។ លោក Ziona ចាប់ផ្ដើមយកប្រពន្ធដំបូង តាំងពីលោកមានវ័យទើបតែ១៧មកម្ល៉េះ និងយកប្រពន្ធចុងក្រោយកាលពីឆ្នាំ ២០១១៕