ប៉ះសំនួរពិបាក សួរថាស្ដាយអីគេជាងគេក្រោយលែងលះ Zhao Li Ying ឆ្លើយយ៉ាងអេម

2021-06-14 04:15:00
ចំនួនមតិ 0 | ចំនួនចែករំលែក 0

ទោះបីជាអ្នកកាសែតដែលដាក់សំនួរដល់ កំពូលតារាសម្ដែងស្រីចិន Zhao Li Ying ត្រូវគេវាយតម្លៃថា គ្មានវិជ្ជាជីវៈក៏ពិតមែន តែសិល្បការិនីនេះនៅតែអាចឆ្លើយបានយ៉ាងរលូន។

ខុសពីមនុស្សស្រីដទៃដែលក្រោយពេលលែងលះប្ដី តែងមានអារម្មណ៍ពិបាកចិត្ត និងមិនចង់ចេញក្រៅនោះ តារាសម្ដែងស្រីជួរមុខចិន Zhao Li Ying មានតែទទួលការងារច្រើនជាងមុន ធ្វើការគ្មានពេលសម្រាកទាល់តែសោះ។

ជាក់ស្ដែង កាលពីថ្ងៃទី ១៣ ខែមិថុនាមុននេះ អ្នកម្ដាយកូន១ បានមានវត្តមាននៅទីក្រុងសៀងហៃ ដើម្បីចូលរួមក្នុងកម្មវិធីរបស់ម៉ាកយីហោដែលនាងជាអ្នកតំណាង។ នៅទីនេះផ្ទាល់ តារាស្រីអាយុ ៣៣ឆ្នាំ ត្រូវអ្នកកាសែតម្នាក់សួរយ៉ាងកំបុតថា៖ តើនាងសោកស្ដាយអ្វីជាងគេ នៅពេលលែងលះប្ដី? សំនួរនេះបានធ្វើឲ្យអ្នកមានវត្តមានក្នុងកម្មវិធីស្រងាកចិត្តគ្រប់គ្នា។

យ៉ាងណាក្ដី តួរឿង Legend of Minglan មិនបង្អង់យូរ ហើយឆ្លើយយ៉ាងរលូនថា៖ ខ្ញុំមានសមត្ថភាពប្រែខ្លួនឯងឲ្យល្អជាងមុន ដើម្បីលុបបំបាត់នូវរាល់ការសោកស្ដាយនៅក្នុងចិត្ត។ ព្យាយាមពង្រឹងចិត្តគំនិត ធ្វើជាម្ចាស់ខ្លួនឯងឲ្យបាន មានតែធ្វើបែបនេះទើបរស់នៅបានល្អ និងមិនធ្វើឲ្យខ្លួនឯងសោកស្ដាយ។

ក្រោយពេលចម្លើយ របស់អ្នកម្ដាយកូន១ត្រូវបានគេចុះផ្សាយ អ្នកគាំទ្រជាច្រើនបានសរសើរ Zhao Li Ying ថា នាងពិតជាមាន EQ ខ្ពស់មិនធម្មតា ព្រោះអាចឆ្លើយនឹងសំនួរបែបនេះបានយ៉ាងល្អ ក្នុងរយៈពេលដ៏ខ្លី។ មិនត្រឹមតែប៉ុណ្ណោះ នៅពេលត្រូវគេសួរថា នៅពេលនេះនាងហៅតារាសម្ដែងប្រុស Feng Shaofeng ជាអ្វី នាងបានតបវិញយ៉ាងស្រទន់ថា៖ ហៅថាមិត្ត។

ការឆ្លើយតបរបស់តារាសម្ដែងស្រីកើតឆ្នាំ ១៩៨៧ បានធ្វើឲ្យទស្សនិកជនឃើញថា នាងមានចិត្តនឹងនរខ្លាំងណាស់ មិនថាកាលៈទេសៈអ្វីទេ គឺអាចប្រឈមបានទាំងអស់៕

ប្រភព៖ Kenh14 ប្រែសម្រួល៖ Caramel