រាជិនីសន្សំ មួយថ្ងៃចាយជាង១ដុល្លារ មីមួយកញ្ចប់ចែកជា៣ អាយុ៣៣ឆ្នាំ សល់ផ្ទះ៣ខ្នង
- 2021-06-07 07:30:00
- ចំនួនមតិ 0 | ចំនួនចែករំលែក 0
រាជិនីសន្សំ មួយថ្ងៃចាយជាង១ដុល្លារ មីមួយកញ្ចប់ចែកជា៣ អាយុ៣៣ឆ្នាំ សល់ផ្ទះ៣ខ្នង
មី Udon មួយកញ្ចប់ នារីជប៉ុនរូបនេះចែកចេញជា៣ពេល បន្លែទាល់តែបញ្ចុះតម្លៃ៥០%ទើបនាងទិញ។ ក្រោយពេលសន្សំ១៥ឆ្នាំ នាងបានសល់ផ្ទះ៣ខ្នង។
មុននេះបន្តិច បណ្ដាញព័ត៌មាន Mashable បានរាយការណ៍ពីនារីជប៉ុនមួយរូបមានឈ្មោះថា Saki រស់នៅទីក្រុង Tokorazawa ខេត្ត Saitama និងដាក់រហស្សនាមឲ្យនាងថារាជិនីសន្សំលុយរបស់ប្រទេសមួយនេះ។ ខុសពីមិត្តរបស់ខ្លួនដែលអាយុ១៨ឆ្នាំនៅតែសុំលុយឪពុកម្ដាយចាយនោះ នាងបានចេញធ្វើការ ហើយមានគោលដៅដ៏ធំនោះគឺ ត្រូវតែមានផ្ទះ៣ខ្នងនៅអាយុ៣៤ឆ្នាំ។
ការគិតនោះបានក្លាយជាការពិត ដោយនៅខែឧសភាឆ្នាំ២០១៩ នៅពេលនោះ នាងមានអាយុ៣៣ឆ្នាំ បានទិញផ្ទះទី៣របស់ខ្លួនក្នុងតម្លៃ ២៧ម៉ឺនដុល្លារ។ បណ្ដាញព័ត៌មានបានឲ្យដឹងថា នៅវ័យ២៧ឆ្នាំ នាងបានទិញផ្ទះដំបូងរបស់ខ្លួនដែលមានតម្លៃ១១ម៉ឺនដុល្លារ។ ផ្ទះទី២របស់នាងទិញនៅពេលនាងមានអាយុ២៩ឆ្នាំ មានតម្លៃ១៦ម៉ឺនដុល្លារ។ នាងបានដាក់ផ្ទះទាំង២នេះឲ្យជួលទាំងអស់ដើម្បីរកចំណូលបន្ថែម។
សាមីខ្លួនបានចែករំលែកថា មួយថ្ងៃនាងចាយ ១.៨ដុល្លារ សម្រាប់អាហារ។ ដើម្បីត្បៀតចំណាយមួយនេះ នាងបំបែកមី Udon មួយកញ្ចប់ជា៣ និងស្រុះជាមួយបន្លែដែលគេបញ្ចុះតម្លៃ៥០%រួចហើយ។ នាងបានបន្ថែមថា៖ ខ្ញុំញ៉ាំអីមិនសំខាន់ទេ ឲ្យតែឆ្អែតពោះគឺបានហើយ។ នៅក្នុងទូទឹកកករបស់នាង គឺសុទ្ធតែជារបស់បញ្ចុះតម្លៃហើយទាំងអស់។ នាងប្រាប់ថា បើមិនបញ្ចុះតម្លៃគឺនាងមិនទិញឡើយ។
និយាយពីសម្លៀកបំពាក់វិញ គឺនាងពាក់ស្បែកជើងដែលម្ដាយសល់ឲ្យ និងខោអាវដែលគេបរិច្ចាគ។ កាលពីអាយុ២៩ឆ្នាំ នាងបានកាត់សក់របស់ខ្លួនឯងហើយលក់ក្នុងតម្លៃ៦០ដុល្លារ។ និយាយពីរឿងកម្សាន្តអារម្មណ៍វិញ នាងបានប្រាប់ថា នាងចូលចិត្តមើលជាងគេគឺពាណិជ្ជកម្មអចលនទ្រព្យ។ ជាមួយនឹងចំណូល២៥០០ដុល្លារ ពីផ្ទះ២ដែលនាងដាក់ជួលនោះ នាងបានយកមកទិញផ្ទះទី៣។ ផ្ទះទី៣នេះ គឺនាងនៅមួយជាន់ និង២ជាន់ទៀតគឺឲ្យជួលដូចគ្នា។ គួបផ្សំប្រាក់ខែជាភ្នាក់ងារអចលនទ្រព្យ និងផ្ទះជួលទាំង៣របស់ខ្លួន នាងមានចំណូល៤០០០ដុល្លារ ហើយសន្សំបាន ៣៩០០ដុល្លារក្នុង១ខែ។
និយាយពីតិចនិកសល់លុយទិញផ្ទះរបស់ខ្លួន Saki បានឲ្យដឹងថានោះគឺមកពីការធ្វើការដ៏ព្យាយាម និងសន្សំបានច្រើនបំផុត តាមដែលអាចធ្វើទៅបាន។ ក្រៅពីនេះ នាងកំពុងបង្កើនចំណូលដោយបើកហាងកាហ្វេឆ្មា នៅលើដំបូលផ្ទះរប់សខ្លួន ហើយឆ្មាទាំងអស់សុទ្ធតែជាឆ្មាគេបោះបង់ចោល៕