ធ្លាប់តែឡើងឆាក២ម៉ែត្រ ពេលនេះ Fan Bingbing វិលមកអង្គុយកៅអីជួរមុខ អង្គរក្សជាង១០នាក់
- 2021-05-11 02:05:00
- ចំនួនមតិ 0 | ចំនួនចែករំលែក 0
ធ្លាប់តែឡើងឆាក២ម៉ែត្រ ពេលនេះ Fan Bingbing វិលមកអង្គុយកៅអីជួរមុខ អង្គរក្សជាង១០នាក់
ទោះបីជាសកម្មភាពនៅក្នុងវិស័យភាពយន្តមិនទាន់ត្រូវបានស្ដារឡើងវិញទាំងស្រុងមែនពិត តែនៅក្នុងវិស័យហ្វេសសិនវិញ កំពូលតារាសម្ដែងស្រីចិន Fan Bingbing នៅតែមានឈ្មោះបោះសំឡេងជានិច្ច។
កាលពីថ្ងៃទី ១០ ខែឧសភាកន្លងទៅនេះ បណ្ដាញព័ត៌មាន Sohu បានឲ្យដឹងថា កំពូលតារាសម្ដែងស្រីចិន Fan Bingbing ក្រោយត្រូវរិះគន់ច្រើនកាលពីខែមុន ព្រោះចូលរួមក្នុងកម្មវិធីដែលមានឆាកប្រវែងត្រឹម២ម៉ែត្រនោះ នៅពេលនេះបានចូលរួមកម្មវិធីធំវិញហើយ។
ជាក់ស្ដែង ស្រីស្អាតវ័យ ៣៩ឆ្នាំ បានមានវត្តមាននៅទីក្រុងសៀងហៃ ដើម្បីចូលរួមកម្មវិធីបង្ហាញម៉ូដសម្លៀកបំពាក់ដ៏ធំមួយ។ អ្វីដែលគួរឲ្យចាប់អារម្មណ៍នោះគឺ តួរឿងមហិច្ឆិតាអ៊ូម៉ីនាង ត្រូវបានគេរៀបឲ្យអង្គុយនៅកៅអីជួរមុខ ជាប់បុគ្គលដែលមានឈ្មោះល្បីក្នុងវិស័យហ្វេសសិន។ មិនត្រឹមតែប៉ុណ្ណោះទេ នៅពេលចុះពីលើឡានឈានចូលសាលខាងក្នុង រាជិនីកម្រាលព្រំក្រហមក៏ត្រូវបានអមដំណើរដោយកងអង្គរក្សជាង១០នាក់។
រូបភាពនេះគឺផ្ទុយគ្នាទាំងស្រុង ពីរូបភាពដែលកាលពីខែមុន ស្រីស្អាតខាងលើចូលរួមក្នុងកម្មវិធីមួយដែលមានឆាកត្រឹមតែ ២ម៉ែត្រប៉ុណ្ណោះ។ តាមនេះដែរ គេអាចឃើញថា ទោះបីជាក្រោយរឿងគេចពន្ធ កេរ្តិ៍ឈ្មោះក្នុងវិស័យភាពយន្តមិនទាន់បានល្អដូចមុនមែនពិត តែកេរ្តិ៍ឈ្មោះនាងក្នុងវិស័យសម្លៀកបំពាក់ មិនសូវត្រូវប៉ះពាល់ឡើយ៕