បានលឺសម្ដីទាំង ៥ ម៉ាត់នេះហើយនៅ?

១. អរគុណ

ស្ដាប់ទៅវាអាចជាពាក្យសាមញ្ញមួយម៉ាត់ប៉ុណ្ណោះ តែវាអាចបង្ហាញពីការដឹងគុណពីចិត្តស្រលាញ់ និង ការលះបង់របស់អ្នកទៅលើគេ។ ជាពិសេសចំពោះគូស្នេហ៏ដែលរៀបការរួច សម្ដីមួយឃ្លានេះបង្ហាញថាគេមិនដែលមើលរំលងលើទង្វើល្អរបស់អ្នក ដើម្បីសុភមង្គលគ្រួសារមួយនេះ។ ភាគច្រើន មានតែមនុស្សប្រុសដែលស្រលាញ់អ្នកពិតប្រាកដ ហើយយល់ពីតម្លៃអ្នកនោះទេ ទើបអាចយល់ពីភាពសំខាន់របស់អ្នកបាន ហេតុនេះហើយ បើសិនជាអ្នកបានលឺសម្ដីមួយម៉ាត់នេះជារឿយៗ អ្នកជ្រើសរើសមនុស្សបានត្រឹមត្រូវហើយ។

២. សុំទោស

មនុស្សប្រុសដែលមានសន្ដានចិត្តល្អ ហើយមានទំនួលខុសត្រូវខ្ពស់ មិនអៀនមាត់នោះទេក្នុងការនិយាយពាក្យមួយម៉ាត់នេះចេញទៅ ទោះជាពេលខ្លះវាមិនមែនជាកំហុសរបស់គេក្ដី គេដឹងយ៉ាងប្រាកដថា ក្នុងពេលដែលទាស់សម្ដីគ្នា បើចាំតែគិតចង់យកឈ្នះរៀងខ្លូន គឺមានតែចែកផ្លូវគ្នាដើរនោះទេ។ តែចំពោះមនុស្សប្រុសដែលមិនបានស្រលាញ់អ្នកអស់ពីចិត្តវិញ ទោះជាដឹងថា វាជាកំហុសគេក្ដី ក៏គេមិនចាប់អារម្មណ៏មកទទួលដឹងខុសនោះទេ។ នៅពេលដែលមិនបារម្ភថាអាចនឹងបាត់បង់អ្វីមួយ គេច្បាស់ជាមិនខ្វល់មកបន្ទាបខ្លួន ដើម្បីរក្សាវានោះទេ។

៣. ទុកអោយបងជួយ

មនុស្សដែលមានចិត្តស្មោះ គឺជាប្រភេទមនុស្សប្រុសដែលចូលចិត្តធ្វើជាងនិយាយ ព្រោះគេយល់ថាខ្លួនជាមនុស្សប្រុស ទោះជាគូស្នេហ៏គេជាមនុស្សរឹងមាំយ៉ាងណាក៏ត្រូវការស្មាដ៏មួយ ដើម្បីពឹងពាក់ និង ការពារខ្លួនដែរ។ ចំពោះមនុស្សប្រុសដែលរៀបការរួចវិញ រឹតតែមិនទម្រើសខ្លួន ជួយការងារផ្ទះសម្បែងមិនអោយប្រពន្ធហត់តែម្នាក់ឯងនោះទេ ធ្វើយ៉ាងណាអោយតែឃើញស្នាមញញឹមលើមុខប្រពន្ធក៏ពេញចិត្តស្ដូកទៅហើយ។

៤. បងស្រលាញ់អូន

ជាពិសេសបើសិនជាគេជាមនុស្សដែលមិនសូវចូលចិត្តនិយាយច្រើន ទោះជាធ្លាប់បានលឺពីគេតិចដងក្ដី សម្ដីមួយឃ្លានេះគឺមានបង្កប់អត្ថន័យយ៉ាងជ្រាលជ្រៅណាស់។ កុំថាមនុស្សប្រុសមិនដឹងណា គេក៏យល់ដែរថាមនុស្សស្រីពេលខ្លះអាចនឹងមិនមានទំនុកចិត្តលើខ្លួនឯង ជាពិសេសពេលរៀបការរួច។ មនុស្សស្រីជាប្រពន្ធច្បាស់ជាអាចស្ងប់ចិត្ត និង ទុកចិត្តបាននៅពេលដែលបានលឺពាក្យតែប៉ុន្មានម៉ាត់នេះ។

៥. បងនឹងព្យាយាម បើវាធ្វើអោយអូនសប្បាយចិត្ត

ចិត្តដែលស្រលាញ់នេះ អាចអោយមនុស្សប្រុសហ៊ានពុះពារ និង តស៊ូ ដែលអាចបង្ហាញយ៉ាងប្រាកដថាក្ដីស្រលាញ់ដែលគេមាននេះវាធំធេងណាស់ ធំរហូតគេសុខចិត្តពិបាកខ្លូន ដើម្បីស្នាមញញឹមរបស់អ្នក។