ឲ្យតែរក្សាចិត្តគំនិតមួយនេះបាន ថ្ងៃអនាគតគ្មានអ្វីដែលមិនជោគជ័យ

2021-04-08 02:00:00
ចំនួនមតិ 0 | ចំនួនចែករំលែក 0

ប្រហែលជាអ្នកធ្លាប់ស្ដាប់ហើយ រឿងដែលកំពូលមហាសេដ្ឋីចិន Jack Ma ត្រូវក្រុមហ៊ុនលក់មាន់បំពង KFC បដិសេធមិនទទួលយកធ្វើបុគ្គលិករាប់សិបដងដោយសារមិនចេះភាសាអង់គ្លេស។ តែជីវិតមនុស្សពិតជាមើលមិនឃើញពិតមែន។

ដោយនៅពេលនេះ នាយកក្រុមហ៊ុន Alibaba បានក្លាយទៅជាស្ថាបនិកដែលស្ថិតក្នុងជួរមុខអ្នកមានជាងគេនៅប្រទេសចិន។ ទ្រព្យរបស់លោកនៅពេលនេះ ទោះបីជាចាយរាប់ជំនាន់ទៀតក៏មិនអស់ដែរ។ នៅក្នុងបទសម្ភាសន៍ជាច្រើន លោកតែងតែនិយាយថា កូនសោរនៃការឈានទៅដល់ភាពជោគជ័យនេះ គឺការមិនបោះបង់។ មិនថាថ្ងៃនេះ អ្នកជួបរឿងលំបាកយ៉ាងណា តែឲ្យតែអ្នកមិនបោះបង់ នោះពេលវេលានឹងមិនធ្វើឲ្យអ្នកខកបំណងឡើយ។

គ្មានផ្លូវទៅកាន់ជោគជ័យណាដែលក្រាលដោយផ្កាកុលាបរហូតនោះឡើយ តែអ្វីដែលសំខាន់នោះគឺ ស្មារតីរបស់អ្នកនៅពេលប្រឈមមុខនឹងបញ្ហានោះទេ ដែលជាអ្នកសម្រេចក្ដីទាំងអស់។ ជាមួយមនុស្សជាច្រើន នៅពេលជួបព្យុះបក់បោកខ្លាំងពេក គេនឹងជ្រើសយកបោះបង់ចោលគ្រប់យ៉ាង ដោយលែងខ្វល់អ្វីទៀត នៅពេលនោះហើយ អ្នកកំពុងបិទទ្វារទៅដល់អនាគតរបស់ខ្លួនហើយ។ ផ្ទុយមកវិញ អ្នកដែលមិនបោះបង់ ទោះមានអ្វីកើតឡើង ជាមនុស្សដែលនឹងយកផ្លែផ្កាទៅថ្ងៃក្រោយ។

សូមអ្នកសង្កេតមើលចុះ សេដ្ឋីនៅជុំវិញពិភពលោក តើមានអ្នកណាដែលក្លាយជាអ្នកមាន ក្រោយ១ខែ ឬ១ឆ្នាំឬអត់ ដោយបើគេមិនប្រឹងពីបាតដៃទទេនោះទេ គេក៏គ្មានថ្ងៃនេះដែរ។

សូមកុំសង្កេតមើលជោគជ័យរបស់គេហើយគិតថាងាយស្រួល ដល់ពេលយើងធ្វើមិនជោគជ័យ ក៏បោះបង់ភ្លាម។ មានតែការបន្តប៉ុណ្ណោះ ទើបទោះបីជាអ្នកមិនអាចដល់គោលដៅភ្លាមៗ តែអ្នកកាន់តែខិតទៅជិតអ្វីដែលអ្នកបានកំណត់ដៅ៕