Jiyeon ក្រុម T-ara ទម្លាយរឿងអតីតលួចប្រើទូរសព្ទ ព្រោះក្រុមហ៊ុនបិទសិទ្ធ
- 2021-03-25 03:53:00
- ចំនួនមតិ 0 | ចំនួនចែករំលែក 0
Jiyeon ក្រុម T-ara ទម្លាយរឿងអតីតលួចប្រើទូរសព្ទ ព្រោះក្រុមហ៊ុនបិទសិទ្ធ
នៅពេលទើបបង្ហាញខ្លួនដំបូង សមាជិកក្រុមចម្រៀងកូរ៉េល្បីឈ្មោះ T-ara ត្រូវក្រុមហ៊ុនហាមមិនអោយប្រើទូរសព្ទ ដោយសមាជិក Jiyeon ត្រូវលាក់ទូរសព្ទក្នុងអាវទ្រនាប់ តែនៅត្រូវអ្នកគ្រប់គ្រងចាប់បាន។
នៅក្នុងកម្មវិធីទូរទស្សន៍ On/Off ភាគថ្មីបំផុត តារាចម្រៀង និងសម្ដែងកូរ៉េល្បីឈ្មោះ Jiyeon គឺជាតារាកិត្តិយសថ្មីបំផុត។ នៅក្នុងភាគនេះដែរ ម្ចាស់បទ Roly Poly បានចែករំលែកពីអំឡុងពេលទើបចូលសិល្បៈរបស់ខ្លួន។ ជាក់ស្ដែង នៅពេលទើបបង្ហាញខ្លួន សមាជិកទាំងអស់របស់ក្រុម T-ara មិនត្រូវបានអនុញ្ញាតឲ្យប្រើទូរសព្ទដៃឡើយ ព្រោះខ្លាចបែកឆ្វេង ឬអាចទាក់ទងនឹងតារាប្រុសផ្សេងទៀតជាដើម។
យ៉ាងណាក្ដី ដោយសារតែទ្រាំមិនបាន ក្រុមចម្រៀងល្បីឈ្មោះនេះ ក៏លួចប្រើដោយដាក់ចូលទៅក្នុងអាវក្នុង។ យ៉ាងណាក្ដី ស្រីស្អាត ២៧ឆ្នាំបានឲ្យដឹងថា ក្រដាសខ្ចប់ភ្លើងមិនជិតឡើយ ដោយទោះបីជាបានលាក់ក្នុងអាវក្នុងហើយមែនពិត តែអ្នកគ្រប់គ្រងរបស់ពួកនាងនៅតែរកឃើញដដែរ។ តារាចម្រៀងកើតឆ្នាំ ១៩៩៣ បានបន្ថែមថា៖ ខ្ញុំចំណាយពេលពាក់កណ្ដាលជីវិតជាមួយសមាជិកក្រុម T-ara នៅពេលខ្ញុំមានអាយុតែ ១៥ឆ្នាំ។ សមាជិក Hyo Min និង Eunjung បានបន្ថែមថា៖ ពួកខ្ញុំរស់នៅដោយពឹងផ្អែកលើគ្នា ខ្ញុំសង្ឃឹមថា Jiyeon ធ្វើអ្វីក៏បានសម្រេចទាំងអស់។
បច្ចុប្បន្ននេះ សមាជិកក្រុម T-ara ទាំងអស់ផ្ដោតអារម្មណ៍លើសកម្មភាពរៀងៗខ្លួន ដោយ Hyomin សង្កត់ធ្ងន់លើផ្នែកចម្រៀង រីឯ Eunjung និង Jiyeon បង្វែមកចាប់អាជីពជាតារាសម្ដែងវិញ។ រឿងភាគថ្មីរបស់ប្អូនពៅគេរូបនេះ នឹងចេញផ្សាយនៅពេលឆាប់នេះមានឈ្មោះ Witch J៕