នារីវ័យ២៦ឆ្នាំ សន្សំលុយបាន១០ម៉ឺនដុល្លារក្រោយ៣ឆ្នាំកន្លះ ដោយសារញ៉ាំដំឡូង និងម្នាស់
- 2021-03-15 05:45:00
- ចំនួនមតិ 0 | ចំនួនចែករំលែក 0
នារីវ័យ២៦ឆ្នាំ សន្សំលុយបាន១០ម៉ឺនដុល្លារក្រោយ៣ឆ្នាំកន្លះ ដោយសារញ៉ាំដំឡូង និងម្នាស់
ខណៈមិត្តរួមការងារទាំងអស់ រកតែប្រាក់ខែចាយឲ្យតែគ្រប់ខែមិនបាននោះ នារីវ័យក្មេងរូបនេះ បានសល់លុយមួយចំនួនដែលអ្នកវ័យស្របាលគ្នាមិនដែលហ៊ានគិតដល់។
រឿងរ៉ាវចាយវាយសន្សំសំចៃ មិនញ៉ាំបាយហាង មិនទិញរបស់ប្រេន ហើយសល់លុយជាង១០ម៉ឺនដុល្លាររបស់នារីវ័យ ២៦ឆ្នាំ ឈ្មោះ Jeraldine Phneah មកពីប្រទេសសាំងហ្គាពួរបានធ្វើឲ្យយុវវ័យភ្ញាក់ខ្លួនព្រើត។
រៀបរាប់ពី តិចនិកក្នុងការសន្សំរបស់ខ្លួន ស្ត្រីរូបនេះបានឲ្យដឹងថា ខ្លួននឹងមិនទិញអ្វីទាំងអស់ ប្រសិនបើវាមិនចាំបាច់។ សម្រាប់របស់របរប្រើប្រាស់ឯកជនវិញ នាងមិនដែលទិញឲ្យលើសពី៥០ដុល្លារឡើយ។ នៅក្នុងផ្ទះរបស់ខ្លួន នារីកើតឆ្នាំ ១៩៩៤ មិនមើលទូរទសស្សន៍ ហើយម៉ាស៊ីនត្រជាក់វិញបើកតែខែក្ដៅខ្លាំងប៉ុណ្ណោះ។ សូម្បីតែថ្ងៃបុណ្យចូលឆ្នាំចិន ដែលគេតែងទិញខោអាវថ្មីនោះ ក៏នាងមិនដាក់ភ្នែកមើលដែរ។
មិនត្រឹមតែប៉ុណ្ណោះ ដើម្បីកុំឲ្យខ្លួនឃ្លាន និងទិញរបស់ដែលគេ Sponsor លើបណ្ដាញសង្គមនោះ នាងថែមទាំងបាន Block ស្ប៉តទាំងអស់នោះនៅលើកុំព្យូទ័ររបស់ខ្លួនទៀតផង។ សម្រាប់អាហារថ្ងៃត្រង់វិញ ខុសពីមិត្តរួមការងារដែលតែងតែចេញទៅបាយហាងនោះ នាងស្ងោរដំឡូង និងម្នាស់មកញ៉ាំជាប្រចាំដើម្បីសន្សំលុយបាយថ្ងៃត្រង់។ លុយ៧០%របស់នាង គឺត្រូវបានវិនិយោគលើភាគហ៊ុន។ នេះគឺជាមូលហេតុដែលធ្វើឲ្យក្នុងរយៈតែ៣ឆ្នាំកន្លះ នាងអាចសល់លុយដល់១០ម៉ឺនដុល្លារ តួរលេខដែលអ្នកមានវ័យស្មើគ្នា បានត្រឹមស្រមៃ។
សូម្បីតែអាពាហ៍ពិពាហ៍របស់នាង ក៏សន្សំសំចៃដូចគ្នាដោយ នាងទិញផ្កាពីហាងមិនល្បីឈ្មោះ និងទៅក្រេបទឹកឃ្មុំនៅប្រទេសវៀតណាម។ ជាធម្មតា សម្រាប់ផ្ទះដែលមាន៣បន្ទប់នៅសាំងហ្គាពួរ ថ្លៃទឹកភ្លើងត្រូវចំណាយជាមធ្យម ១៣០ដុល្លារក្នុង១ខែ តែផ្ទះនាងប្រើអស់តែ ៥០ដុល្លារប៉ុណ្ណោះ គឺទាបជាងគេដល់ទៅជាងពាក់កណ្ដាល៕