៦៤ ថ្ងៃដែលនៅសេសសល់របស់ឪពុកម្ដាយអ្នក

2021-03-04 00:00:00
ចំនួនមតិ 0 | ចំនួនចែករំលែក 0

ជីវិតរស់នៅពីមួយថ្ងៃទៅមួយថ្ងៃកាន់តែរវល់ ធ្វើឲ្យពេលវេលាដែលកូនៗបាននៅជាមួយអ្នកមានគុណកាន់តែតិច ប្រការនេះដែរបានធ្វើឲ្យគេគណនាឃើញថា ចំនួនថ្ងៃដែលនៅសេសសល់សម្រាប់កូនម្នាក់ៗអាចនៅក្បែរអ្នកមានគុណរបស់ខ្លួនគឺតិចបំផុត។

នៅលើបណ្ដាញសង្គមចិន កំពុងតែទាក់ទាញចំណាប់អារម្មណ៍បានជាខ្លាំងក្រោយពេលគណនាឃើញរយៈពេលដែលអ្នកអាចនៅក្បែរអ្នកមានគុណរបស់ខ្លួនដូចតទៅ៖ ប្រសិនបើពេលចូលឆ្នាំ អ្នកទៅផ្ទះ៧ថ្ងៃ និងចំណាយពេលច្រើនបំផុត១១ម៉ោងដើម្បីជជែកគ្នា។ ហើយបើឪពុកម្ដាយអ្នកអាយុ៦០ឆ្នាំ ហើយពួកគាត់អាចរស់ដល់៨០នោះ អ្នកមានពេលតែ១៥៤០ម៉ោងនៅក្បែរគាត់ប៉ុណ្ណោះ ដែលស្មើនឹងរយៈពេល ៦៤ថ្ងៃដ៏តិចតួចបំផុត។

ទោះបីជាការគណនានេះមិនអាចត្រឹមត្រូវសម្រាប់មនុស្សគ្រប់រូបក៏ដោយ តែតួលេខ៦៤ថ្ងៃនេះ អាចត្រូវជាមួយមនុស្សភាគច្រើន។ ការលើកឡើងនេះក៏បានបង្ហាញឲ្យឃើញថាពេលវេលារវាងកូនចៅ និងឪពុកម្ដាយនៅជាមួយគ្នា កាន់តែតិចទៅៗ ពីមួយថ្ងៃទៅមួយថ្ងៃ។

ការស្ទង់មតិមួយនៅប្រទេសចិន សម្រាប់មនុស្សអាយុចាប់ពី ២៥ ដល់៥០ឆ្នាំ បង្ហាញឲ្យឃើញថា៖ ៦៣% នៃពួកគេជួបអ្នកផ្ទះតិចជាង ៣ដងក្នុង១ឆ្នាំ។ ជាមធ្យមនឹងចំណាយ ៧៨ម៉ោងក្បែរពួកគេមានន័យថា នៅក្បែរតែ ៣ថ្ងៃ និង៦ម៉ោងប៉ុណ្ណោះ។

អ្នកកាសែត Jie Shu Man បានលើកឡើងថា៖ ខ្ញុំជឿជាក់ថាកូនៗជាច្រើនពិតជាចង់ធ្វើជាកូនកត្តញ្ញូ តែដោយសារសម្ពាធសង្គម ធ្វើឲ្យពួកគេមិនអាចបំពេញកាតព្វកិច្ចនេះបានពេញលេញឡើយ។ រយៈពេលក្នុងជីវិតរបស់អ្នកនៅវែង តែរយៈពេលរបស់អ្នកមានគុណ មិននៅច្រើនទេ។ ប្រសិនបើអ្នកមាននៅម៉ាក់ប៉ា តែគ្មានពេលនៅក្បែរគាត់ សូមឲ្យអ្នកយ៉ាងហោចណាស់ក៏អាចទូរសព្ទទៅនិយាយជាមួយគាត់ដែរ៕

ប្រភព៖ vnexpress ប្រែសម្រួល៖ Caramel