ក្នុងនាមជាប្រពន្ធឆ្លាតវៃ នឹងមិនបង្ហោះរឿងទាំងនេះនៅលើបណ្ដាញសង្គមឡើយ
- 2021-02-25 03:05:00
- ចំនួនមតិ 0 | ចំនួនចែករំលែក 0
ក្នុងនាមជាប្រពន្ធឆ្លាតវៃ នឹងមិនបង្ហោះរឿងទាំងនេះនៅលើបណ្ដាញសង្គមឡើយ
បណ្ដាញសង្គមប្រៀបបានដូចជាកាំបិតមុខ២ ប្រសិនបើអ្នកប្រើដោយឆ្លាតវៃ វានឹងផ្ដល់ប្រយោជន៍ តែបើអ្នកប្រើវាទាំងងប់ងល់ វានឹងនាំមកនូវរឿងដែលអ្នកនឹកស្មានមិនដល់។ ខាងក្រោមនេះគឺជារឿងទាំងឡាយដែលដែលក្នុងនាមជាប្រពន្ធ ដាច់ខាតមិនគួរចែករំលែកលើបណ្ដាញសង្គម។
១. និយាមដើមប្ដី
ដោយសារតែឈ្លោះគ្នា មិនចុះសម្រុងគ្នាមួយឆាវធ្វើឲ្យចិត្តមនុស្សស្រីក្ដៅទប់មិនជាប់ ក៏បង្ហោះរឿងអាក្រក់មួយរបស់ប្ដីលើបណ្ដាញសង្គមឲ្យមនុស្សរាប់ពាន់អ្នកបានដឹង ទាំងមុននោះប្ដីបានធ្វើរឿងល្អៗឲ្យយើងជាច្រើនរាប់មិនអស់។ មានរឿងអ្វីល្អក់កករនឹងគ្នា ហេតុអ្វីមិននិយាយប្រាប់គ្នាត្រង់ ចាំបាច់យកមកហែកហួរលើបណ្ដាញសង្គមធ្វើអ្វី។
២. ឈ្លោះគ្នាជាមួយខាងប្ដី
មិនថាអ្នកណាក៏ដោយ ក៏នឹងប៉ះពារជាមួយនឹងសាច់ខាងប្ដីជៀសមិនផុត ទោះតិចច្រើនក្ដី។ តែការដែលឈ្លោះគ្នាហើយ យកមកបង្ហោះលើបណ្ដាញសង្គម នឹងធ្វើឲ្យរូបភាពដែលល្អរបស់អ្នកបាក់ស្រុតទាំងស្រុងតែម្ដង។ អ្នកអាចឈ្លោះគ្នាតែជាមួយម្នាក់មែនពិត តែនៅពេលដែលអ្នកបង្ហោះហើយ គ្រួសារខាងប្ដីទាំងនោះ នឹងស្អប់អ្នកជាក់ជាមិនខាន។
៣. រឿងលុយកាក់ក្នុងគ្រួសារ
រឿងដែលត្រណមបំផុតមិនគួរបង្ហោះលើបណ្ដាញសង្គម គឺរឿងលុយកាក់ក្នុងគ្រួសារតែម្ដង។ មិនថាអ្នកខ្វះលុយ ឬមានលុយច្រើននោះទេ គ្មានរឿងអ្វីដែលអ្នកគួរបង្ហោះឲ្យគេឯងដឹងឡើយ។ នៅពេលអ្នកដែលបង្ហោះថាគ្មានលុយ មានតែគេមើលស្រាល ហើយបើបង្ហោះថាមានលុយច្រើន នោះនឹងធ្វើឲ្យមិនមានសុវត្ថិភាព។ ដូចនេះហើយ ទោះក្នុងហេតុផលណាក៏ដោយ ក៏អ្នកមិនគួរបង្ហាញរឿងនេះលើបណ្ដាញសង្គមនោះដែរ។
៤. បង្ហោះរឿងស្រពិចស្រពិល ដៀមដាន
នេះគឺជារឿងដែលគ្រោះថ្នាក់បំផុត នៅពេលអ្នកបង្ហោះរឿងមិនច្បាស់លាស់។ ព្រោះទោះបីជាគ្រួសារអ្នកកំពុងមានសុភមង្គលក៏ដោយ តែបើអ្នកហ៊ានបង្ហោះស្រពិចស្រពិលភ្លាម នោះអ្នកផ្សេងនឹងគិតថា គ្រួសារអ្នកកំពុងតែមានរឿងរកាំរកូសជាមិនខាន។ មានរឿងអី និយាយត្រង់នឹងគ្នា កុំបង្ហោះរឿងដែលធ្វើឲ្យគេសន្និដ្ឋាន៕