ចូរធ្វើជាមនុស្សស្រីក្លាហាន ហ៊ានដើរចេញពីអ្វីដែលធ្វើឲ្យខ្លួនឯងមិនសប្បាយចិត្ត
- 2021-02-21 08:10:00
- ចំនួនមតិ 0 | ចំនួនចែករំលែក 0
ចូរធ្វើជាមនុស្សស្រីក្លាហាន ហ៊ានដើរចេញពីអ្វីដែលធ្វើឲ្យខ្លួនឯងមិនសប្បាយចិត្ត
ចូរត្រូវធ្វើខ្លួនជាមនុស្សស្រីដែលមានភាពក្លាហានពិតប្រាកដ ហ៊ានដើរចេញពីអ្វីដែលមិននាំសុភមង្គលចូលមកក្នុងជីវិត ហ៊ានដើរចេញពីមនុស្សដែលធ្វើឲ្យអ្នកមិនសប្បាយចិត្ត។
ចូរធ្វើជាមនុស្សស្រីដែលអាចរក្សាភាពរឹងមាំនៅក្នុងខ្លួន ហ៊ានធ្វើចិត្តដាច់ជាមួយនឹងអ្វីដែលពិសពុលនិងនាំរឿងមិនល្អឲ្យខ្លួនឯង។
ចូរធ្វើជាមនុស្សស្រីរឹងប៉ឹង ហ៊ានបំភ្លេចមនុស្សប្រុសដែលមើលមិនឃើញពីតម្លៃ មិនផ្តល់ភាពកក់ក្តៅ មិនផ្តល់ក្តីស្រលាញ់ពេញលេញ និងមិនស័ក្តិសមទៅនឹងការលះបង់របស់អ្នកបន្តិចណាសោះ។
ចូរធ្វើជាមនុស្សស្រី ហ៊ានដើរចេញពីមនុស្សប្រុស ដែលតែងតែរិះគន់មិនពេញចិត្ត លើសម្រស់ ការតុបតែងខ្លួន ការគិត ឬសូម្បីតែការនិយាយស្តីរបស់អ្នក។ មនុស្សប្រុសដែលធ្វើឲ្យអ្នកមានអារម្មណ៍មិនល្អ មិនស្កប់ស្កល់ តូចចិត្តនឹងខ្លួនឯងស្ទើរតែគ្រប់រឿង ទោះនៅបន្តក៏គ្មានអ្វីពិសេស គ្មានន័យអីទៀតដែរ។
ចូរធ្វើជាមនុស្សស្រីរឹងមាំគ្រប់គ្រាន់ដើម្បីដើរចេញពីក្រុមមិត្តភ័ក្តិ ដែលមិនចូលរួមអបអរសប្បាយចិត្តនឹងភាពជោគជ័យរបស់អ្នក។ មនុស្សដែលនៅចាំតែអង្គុយច្រណែនឈ្នានីស បំបាក់ទឹកចិត្ត ព្រោះបារម្ភខ្លាចអ្នកល្អជាង បែបនេះទោះទុកក៏មិនចំណេញដកចេញមិនខាតឡើយ។
ចូរធ្វើជាមនុស្សស្រីរឹងមាំហ៊ានដើរចេញពីប្រភេទមនុស្សដែលមករករាប់អានតែពេលត្រូវការ ពឹងពាក់ចង់បានផលប្រយោជន៍។ មនុស្សដែលប៉ិនខាងសម្តែង ធ្វើដូចជាយកចិត្តទុកដាក់ចំពោះអ្នក តែធាតុពិត ពួកគេហុតទឹកសម្លឹងកាកសោះ។ ដាច់ខាតកុំចិត្តទន់ចំពោះទង្វើមិនស្មោះត្រង់ ក្លែងក្លាយ មុខពីរ ដែលអាចនាំហានិភ័យដល់ខ្លួនឯង។
ចូរធ្វើជាមនុស្សស្រីរឹងមាំហ៊ានដើរចេញពីមនុស្សដែលរារាំងផ្លូវអ្នកពីក្តីសុបិន រារាំងអ្នកមិនឲ្យស្វែងរកសុភមង្គលពិត និងមិនជឿជាក់លើសមត្ថភាពរបស់អ្នក។
ចូរធ្វើជាមនុស្សស្រីដែលមិនភ័យខ្លាចនឹងនិយាយពាក្យពិត ឬបង្ហាញពីអារម្មណ៍ពិត។ ព្យាយាមការពារខ្លួនឯងមិនឲ្យដួលរំលំដោយសារទង្វើអ្នកដទៃ។
ទីបំផុតអ្នកច្បាស់ជាដឹងថា ខ្លួនឯងត្រឹមជាមនុស្សទូទៅម្នាក់មិនមែនអាទិទេព ដូច្នេះគួរថែរក្សានរណាដែលអាចផ្តល់ក្តីស្រលាញ់ពិតប្រាកដ ទំនុកចិត្ត ការគោរព ពេលវេលា និងកម្លាំងចិត្តទើបមានតម្លៃ៕
ចុចអានបន្ត៖ ធំដឹងក្ដីមែនទែន គឺនៅពេលកាន់តែឈឺ កាន់តែសម្ងំមិនឲ្យអ្នកណាដឹង