៦ចំណុចផ្ញើជូនខ្លួនឯងជាទីស្រលាញ់ (សម្រាប់អ្នកត្រូវការកម្លាំងចិត្ត)

2021-02-13 13:35:00
ចំនួនមតិ 0 | ចំនួនចែករំលែក 0

ជូនចំពោះខ្លួនឯងជាទីស្រលាញ់!

គ្មានជីវិតរបស់អ្នកណាអាចដូចបំណងបានគ្រប់យ៉ាងនោះទេ។ នៅពេលជួបរឿងលំបាក រឿងដែលធ្វើឲ្យកើតទុក្ខ ការស្ដាប់ពាក្យណែនាំ លើកទឹកចិត្តពីអ្នកដទៃគឺជារឿងល្អ ប៉ុន្តែអ្នកដែលជួយដោះទុក្ខឲ្យខ្លួនយើងបានល្អបំផុត គឺមានតែយើងខ្លួនឯងនេះហើយ។ ខ្ញុំចង់ប្រាប់អ្នក (ខ្លួនឯង) ថា នៅពេលជួបរឿងមិនល្អ សូមសាកល្បងអានអ្វីដែលខ្ញុំផ្ញើជូនខាងក្រោមនេះ៖

១. កុំបារម្ភ គ្រប់យ៉ាងនឹងប្រសើរឡើង

ទេវតាតែងមានយុត្តិធម៌សម្រាប់គ្រប់គ្នាជានិច្ច។ នៅពេលណាលោកបិទផ្លូវមួយ លោករមែងបើកផ្លូវមួយទៀតទុកឲ្យយើងហើយ។ មិនថាបញ្ហាលំបាកកម្រិតណា វាតែងមានដំណោះស្រាយជានិច្ច។ ត្រូវជឿថា ភ្លៀងមិនមែនធ្លាក់លើយើងតែម្នាក់ទេ នៅមានអ្នកដទៃច្រើនទៀតដែលអាចទទឹកភ្លៀងដូចយើងដែរ។

២. កុំខ្លាច មេឃមិនរលំសង្កត់យើងទេ

ដរាបណាយើងនៅមានការតស៊ូ ជ័យជម្នះគឺស្ថិតក្នុងដៃយើងពាក់កណ្ដាលបាត់ទៅហើយ។ បើយើងខ្លាច ចូរហ៊ានធ្វើនូវអ្វីដែលយើងខ្លាច ទើបភាពភ័យខ្លាចនោះរលាយបាត់។ កុំខ្លាចបរាជ័យ ព្រោះបរាជ័យនេះហើយដែលធ្វើឲ្យយើងចេះប្រយ័ត្នប្រយែងកាន់តែល្អនៅពេលខាងមុខ។

៣. កុំខូចចិត្ត គ្មាននរណាមិនធ្លាប់ខុសនោះទេ

លើលោកនេះ គ្មាននរណាមិនធ្លាប់ធ្វើអ្វីខុសទេ ប៉ុន្តែពេលធ្វើខុស ត្រូវប្រញាប់កែប្រែ កុំរវល់តែត្រាំត្រែងក្នុងភាពខុសឆ្គងដដែលៗនោះ។ ការឃាំងខ្លួនឯងជាមួយភាពខុសឆ្គងដោយមិនព្រមងើបមកកែប្រហែ គឺជាការបាត់បង់ដ៏ធំ។ ចង់ប្រាប់ថា មានមនុស្សច្រើនណាស់ដែលចង់ឃើញយើងបរាជ័យ ដូច្នេះចូរកុំធ្វើឲ្យគេបានដូចបំណងឲ្យសោះ។

៤. កុំអស់សង្ឃឹម ឱកាសយើងនៅមាន

អ្នកដែលធ្វើអ្វីមួយជោគជ័យ គឺដោយសារគេជឿថាវានឹងជោគជ័យ។ ក្ដីសង្ឃឹមគឺជាទ្រព្យសម្បត្តិដ៏មានតម្លៃដែលមនុស្សយើងត្រូវតែមាន។ នៅពេលយើងជួបអ្វីអយុត្តិធម៌ សូមកុំរវល់តែស្ដីបន្ទោសនោះបន្ទោសនោះ តែចូរកែប្រែ ដោះស្រាយ នូវអ្វីដែលអាចដោះស្រាយបាន បើដោះស្រាយមិនបាន ក៏បណ្ដោយទៅតាមយថាកម្មទៅចុះ។ ចង់ប្រាប់ថា មនុស្សដែលបង្កើតឱកាសបាន គឺជាមនុស្សក្លាហាន មនុស្សដែលរង់ចាំឱកាសគឺជាមនុស្សល្ងង់។ បរាជ័យតែម្ដង មិនមែនមានន័យថាយើងនឹងបរាជ័យមួយជីវិតនោះឡើយ។

៥. កុំកុហកខ្លួនឯង រឿងមួយចំនួនគួរបណ្ដោយវាទៅតាមធម្មជាតិរបស់វាទៅ

បញ្ហាក្នុងជីវិតមនុស្ស ពេលខ្លះក៏ប្រៀបដូចជាការបន្ទោបង់ បើទោះបីយើងព្យាយាមបញ្ចេញយ៉ាងណា ពេលខ្លះវាក៏ចេញមកតែខ្យល់។ ប្រៀបដូចជាការព្យាយាមខ្លះ ដែលទោះបីយើងព្យាយាមប៉ុណ្ណា ផលដែលយើងទទួលបានអាចនឹងមិនបានដូចអ្វីដែលយើងរំពឹងទុកឡើយ។ ព្យាយាមឲ្យអស់ពីសមត្ថភាព លទ្ធផលយ៉ាងណាក៏រីករាយនឹងទទួលយក រឿងណាដែលធ្វើមិនបាន ក៏បណ្ដោយតាមហ្នឹង ព្រោះបើប្រឹងឱបក្រសោបវា វានាំតែឈឺចាប់ទទេៗនោះទេ។

៦. កុំឆេវឆាវ រៀនបើកចិត្តខ្លួនឯងឲ្យទូលាយជាងមុនបន្តិច

យើងអាចនឹងត្រូវជួបមនុស្សមានបំណងមិនល្អ ប៉ុន្តែកុំទាន់ឆេវឆាវ ព្រោះកំហឹងគឺប្រៀបដូចជាការយកកំហុសអ្នកដទៃមកដាក់ទោសខ្លួនឯងដែរ។ អត់ធ្មត់បន្តិច ធ្វើចិត្តឲ្យត្រជាក់ ថយក្រោយបន្តិច យើងនឹងបានឃើញពិភពមួយដែលស្រស់ស្អាត។ ភាពស្រស់ស្រាយ មិនឆាប់ខឹង គឺជាដើមទុនយ៉ាងសំខាន់ក្នុងការរស់នៅជាមួយមនុស្សក្នុងសង្គម។ ចិត្តទូលាយគឺជាស្ពាននាំយើងទៅរកការយោគយល់ និងការជឿទុកចិត្ត។ ការសម្លឹងមើលលោកក្នុងផ្លូវល្អ កើតចេញពីការបើកចិត្តទូលាយ ការសម្លឹងមើលលោកដោយផ្អែកលើការពិត កើតចេញពីការយល់សច្ចធម៌នៃជីវិត។

ខ្ញុំដឹងថាអ្នកហត់នឿយប៉ុណ្ណា

ខ្ញុំដឹងថាគ្រូពេទ្យក៏គង់មានថ្ងៃឈឺដូចគ្នា

ហើយបើអ្នកលែងសល់អ្នកណា ត្រូវចាំថា ខ្ញុំនៅតែនៅក្បែរអ្នកជានិច្ច ៕