ដល់វ័យ២៥ឆ្នាំ អ្នកចាប់ផ្ដើមចាស់ចិត្តចាស់គំនិតហើយបើជួបប្រទះរឿងទាំងនេះ

2021-01-20 16:00:00
ចំនួនមតិ 0 | ចំនួនចែករំលែក 0

ចូលដល់វ័យ២៥ឆ្នាំ ជាចំណុចមួយក្នុងជីវិត ដែលអាចធ្វើឲ្យមនុស្សផ្លាស់ប្តូរគំនិត និងមានភាពចាស់ទុំ។ ត្បិតតែនៅវ័យ១៨ឆ្នាំ មានឈ្មោះថាធំដឹងក្តីពេញវ័យមែនពិត តែចរិតនៅក្មេងនៅឡើយ មិនដូចជាពេលមានអាយុ២៥ឆ្នាំ ទើបជាការដឹងក្តីជាក់លាក់ពិតប្រាកដ ព្រោះជីវិតបានឆ្លងកាត់នូវបទពិសោធន៍ជាច្រើន ហើយមានការខ្វាយខ្វល់ចំពោះរឿងអនាគតជាងកាលពីមុន។

ខាងក្រោមនេះជាអ្វីដែលអ្នកនឹងជួបប្រទះ ពេលឈានចូលដល់វ័យ ២៥ឆ្នាំ។

១. កាត់បន្ថយការដើរលេងដាច់យប់

នេះចង់សំដៅទៅលើអ្នកណា ដែលចូលចិត្តដើរលេងដាច់យប់ជាញឹកញាប់ពីមុនមក ប៉ុន្តែអ្នកនឹងផ្លាស់ប្តូរដោយឯកឯង ព្រោះក្នុងវ័យនេះជាវ័យមានការងារធ្វើ ដូច្នេះបើដើរមិនដឹងពេលមិនដឹងវេលា អ្នកច្បាស់ជាបាត់បង់ការងារ ដើរទាត់ខ្យល់មិនខាន។

២. មើលទៅអ្នកដទៃដែលមានវ័យក្រោម២៣ឆ្នាំ ដូចជានៅក្មេងសេចក្តី

ពេលនោះអ្នកនឹងមានអារម្មណ៍ថា អ្នកមានភាពចាស់ទុំជាងគេ យល់ដឹងច្រើនជាងគេ ដូច្នេះអ្នកណាផ្សេងដែលមានអាយុក្រោម២៣ឆ្នាំ អ្នកចាត់ទុកថាគេមានគំនិតក្មេងខ្ចីជាងអ្នក។

៣. អ្នកចាប់ផ្តើមចេះគិតគូរថែរក្សាស្បែក

ស្បែករបស់អ្នកមិនមែនដូចកាលទើបតែពេញវ័យនោះទេ ដូច្នេះអ្នកនឹងរកវិធីថែរក្សាស្បែក ជ្រើសប្រើផលិតផលដែលអាចទប់ស្កាត់ភាពជ្រីវជ្រួញ បន្ទាប់ពីសង្កេតឃើញថាខ្លួនឯងចាស់ជាងមុន។

៤. មានគម្រោងការច្រើន

ភាពសប្បាយដោយមិនខ្វល់ពីអ្វីទាំងនឹងត្រូវកាត់បន្ថយ ព្រោះអ្នកមានរឿងរ៉ាងក្នុងចិត្ត ព្រមទាំងគម្រោងការច្រើនសម្រាប់ពេលអនាគត។

៥. អ្នកសម្រេចចិត្តដោយជំហរខ្លួនឯង

រាល់ពេលសម្រេចចិត្តអ្នកមានហេតុផល និងជំហរខ្លួនឯង ដោយមិនរងឥទ្ធិពលពីមជ្ឈដ្ឋានខាងក្រៅ ហើយក៏មិនចេះតែជឿគេផ្តេសផ្តាសនោះដែរ។

៦. អ្នកចាប់ផ្តើមចេះគិតគូរពីសុខភាព

ក្នុងវ័យនេះបើអ្នកញ៉ាំច្រើនតាមតែចិត្ត គីឡូនឹងឡើងយ៉ាងរហ័ស ធ្វើឲ្យខូចរូបរាងហើយសុខភាពវិញក៏ចុះខ្សោយទៅតាមនឹងដែរ។ ដូចនេះវាជាពេលមួយ ដែលអ្នកគិតគូរពីការថែរក្សាសុខភាពរបស់ខ្លួន។

៧. មានការផ្លាស់ប្តូរនៅក្នុងបណ្តាញសង្គម

អ្នកនឹងលែងសូវខ្វាយខ្វល់ពីការបង្ហោះរូបផ្សេងៗ ព្រមទាំងចំនួនLikeនៅលើរូបថត ហើយប្តូរពីការបង្ហោះរូបជប់លៀង ដើរលេងសប្បាយជាមួយមិត្តភ័ក្ដិ មកជាការចូលរោងការរបស់ពួកគេវិញ។

៨. អ្នកលែងសូវខ្វាយខ្វល់ពីការស្លៀកពាក់ទាក់ទាញភ្នែកអ្នកដទៃ

អ្នកជ្រើសតែសម្លៀកបំពាក់ណាសាមញ្ញធម្មតាៗ ដែលអាចស្លៀកទៅស្រួលខ្លួន ដោយមិនខ្វល់និងចង់បានការចាប់អារម្មណ៍ពីអ្នកដទៃដូចមុន។

៩. នឹកស្រណោះពីអតីតកាល

ចូលដល់វ័យនេះទោះបីមិនចង់គិត ក៏អារម្មណ៍នៅតែនឹកឃើញដល់អតីតកាល នឹកដល់កាលពីពេលនៅរៀន ជីវិតកាលពីក្មេងដែលសប្បាយមិនដែលកើតទុក្ខ មិត្តភ័ក្តិដែលធ្លាប់រាប់អាន និងអនុស្សាវរីយ៍ជាច្រើនទៀត។