សញ្ញាទាំង៩ បង្ហាញថាអ្នកកំពុងសម្លាប់សេចក្តីសុខខ្លួនដោយការគិតច្រើនហួសហេតុ

2021-01-13 02:05:00
ចំនួនមតិ 0 | ចំនួនចែករំលែក 0

តើអ្នកគិតថាអ្នកជាប្រភេទមនុស្សចូលចិត្តគិតច្រើនដែរ ឬ ទេ? ពេលអ្នកមើលទៅជុំវិញខ្លួន ហាក់បីដូចជាគេឯងមិនសូវមានបញ្ហារឿងគិតច្រើនដូចជាអ្នកសោះ។ ថ្វីដ្បិតតែតាមពិតទៅអ្នកគួរតែជាអ្នកបញ្ជាខួរក្បាលក៏ពិតមែន តែក្នុងកាលៈទេសៈខ្លះ អ្នកនឹងមានអារម្មណ៍ថាមានការលំបាកខ្លាំងនៅក្នុងការគ្រប់គ្រងវា ហើយពេលនោះហើយដែលខួរក្បាលអាចឆ្លៀតឱកាសដើម្បីគ្រប់គ្រងអ្នកវិញម្តង។ សញ្ញាទាំង៩ ខាងក្រោមនេះនឹងបង្ហាញប្រាប់ថា អ្នកជាមនុស្សគិតច្រើនជ្រុល៖

រូបតំណាង

**១. ឧស្សាហ៍គេងមិនលក់**

មានតែមនុស្សដែលមានរឿងច្រើនត្រូវគិតទេដែលពិបាកក្នុងការគេង ហើយ យប់ខ្លះភ្នែកបើកទល់ភ្លឺក៏មាន។ ការទម្លាប់គិតច្រើនមុនចូលគេង អាចបង្កឱ្យកើតទៅជាជំងឺគេងមិនលក់ដោយមិនដឹងខ្លួន។ ពេលដែលអ្នកធ្លាក់ចូលជំងឺនេះគឺមានន័យថា ភាគរយដែលខួរក្បាលអ្នកអាចធ្វើការបញ្ជាលើអ្នកក៏កាន់តែច្រើនដែរ។ ដូច្នេះ បើអ្នកមានអាការៈបែបនេះ អ្នកគួរសាកល្បងនៅការហាត់យោហ្គា សមាធិ ឬ អ្នកអាចទម្លាប់គូរគំនូរ សរសេរ ឬ អាន មុនពេលចូលគេងដើម្បីជាការបន្លប់កុំឱ្យខួរក្បាលគិតរឿងស្មុគស្មាញច្រើនជ្រុល។

២. រស់នៅក្នុងភាពភ័យខ្លាច

បើអ្នកជាមនុស្សដែលតែងតែមានភាពភ័យខ្លាចពីរឿងគ្រប់សព្វពេកនោះក៏ជាសញ្ញាបង្ហាញថាអ្នកជាមនុស្សគិតច្រើនពេកដែរ។ ដើម្បីជួយឱ្យអ្នកធូរស្រាលពីសភាពដែលជានិច្ចកាលតែងរស់នៅក្នុងភាពព្រួយបារម្ភ និង ភ័យខ្លាចនោះ អ្នកគួររៀនត្រឡប់មករស់នៅក្នុងបច្ចុប្បន្នកាលហើយរៀនទទួលយកនូវអ្វីដែលបានកើតឡើង ហើយ កុំទាន់គិតពីរឿងដែលមិនទាន់កើតឡើងច្រើនហួសហេតុ។

រូបតំណាង

៣. វិភាគល្អិតល្អន់ហួសហេតុ

បញ្ហាចម្បងរបស់មនុស្សគិតច្រើនគឺ ពួកគេគិតថាពួកគេអាចគ្រប់គ្រងអ្វីៗគ្រប់យ៉ាង។ យ៉ាងណាមិញ ការពិតមិនដូចការគិតឡើយ បើអ្នកខំគិតនិងរំពឹងអ្វីៗទុកមុននោះ វាមិនត្រឹមតែខាតបង់ពេលវេលា នោះទេថែមទាំងលេបយកនៅក្តីសុខរបស់អ្នកនាពេលបច្ចុប្បន្នទៀតផង។

៤. ខ្លាចភាពបរាជ័យ

ថ្វីដ្បិតតែពិបាក តែមនុស្សគិតច្រើនតែងចង់បានអ្វីដែលល្អឥតខ្ចោះ មិនថារឿងតូច រឿងធំឡើយ គឺពួកគេតែងប្រាថ្នាបាននូវលទ្ធផលដែលជាទីគាប់ចិត្ត។ ពេលខ្លះ ដោយសារមូលហេតុនេះហើយទើបធ្វើឱ្យពួកគេស្អប់នូវភាពបរាជ័យ មិនចង់ជួបឡើយ ក៏ប៉ុន្តែពួកគេមិនចាប់ អារម្មណ៍នោះទេថា ភាពភ័យខ្លាចនោះច្រើនធ្វើឱ្យពួកគេសម្រេចចិត្តខុសក្នុងរឿងជាច្រើន។

រូបតំណាង

៥. តែងមិនជឿជាក់លើខ្លួនឯង

ដោយសារតែការប្រាថ្នានូវភាពល្អឥតខ្ចោះនោះ វាតែងធ្វើពួកគេគិតគូគ្រប់ចំណុចទាំងអស់មុននឹងធ្វើអ្វីមួយ ហើយ ច្រើនមិនសូវមានទំនុកចិត្តលើខ្លួនឯងព្រោះខ្លាចខុស។ មនុស្សគិតច្រើន តែងចំណាយពេលសម្រេចចិត្តធ្វើអ្វីមួយច្រើនជាងអ្នកដទៃ ព្រោះពួកគេត្រូវការពេលយូរក្នុងការវិភាគឱ្យល្អិតល្អន់។ ផ្ទុយទៅវិញ ទោះជាចំណាយពេលច្រើនជាងគេក៏ពិតមែន តែពួកគេក៏នៅតែមិនសូវមានទំនុកចិត្តនឹងជម្រើសរបស់ខ្លួនគេដែរ។

៦. ឧស្សាហ៍ឈឺក្បាល

ការឈឺក្បាលគឺជាសញ្ញាមួយដែលបង្ហាញថាខួរក្បាលរបស់អ្នកចង់សម្រាកហើយ ព្រោះវាបានធ្វើការច្រើនហួសកំណត់។ បើមានអាការៈបែបនេះ អ្នកគួរទុកពេលសម្រាកខួរក្បាលខ្លះ ដោយការហាត់ប្រាណ ស្តាប់តន្រ្តី ឬ មើលរឿងសប្បាយៗដែលអាចឱ្យខួរក្បាលរបស់អ្នកធូរស្បើយឡើងវិញ។

រូបតំណាង

៧. ស្ពឹកសាច់ដុំ និង សន្លាក់

តើអ្នកដឹងទេថាការគិតច្រើនមិនមែនប៉ះពាល់តែផ្នែកខួរក្បាលតែមួយមុខនោះទេ វាថែមទាំងធ្វើឱ្យរាងកាយរបស់អ្នកចុះខ្សោយខុសធម្មតាទៀងផង តួយ៉ាងគឺធ្វើឱ្យអ្នកគ្មានកម្លាំងកំហែង និង ឈឺចុកចាប់រាងកាយ ជាពិសេសទៅលើសាច់ដុំ និងសន្លាក់។ បើមានអាការៈបែបនេះ ព្យាយាមពត់ខ្លួន ឬ ធ្វើលំហាត់ប្រាណឱ្យបានទៀងទាត់ដើម្បីឱ្យរាងកាយមានសភាពរឹងមាំឡើងវិញ។

៨. រាងកាយចុះខ្សោយ

ចំណុចនេះគឺមានលក្ខណៈស្រដៀងទៅនឹងចំណុចមុនដែរ តែផ្តោតលើថាមពលនៃរាងកាយរបស់អ្នកវិញម្តង។ ពេលខួរក្បាលអ្នកធ្វើការគិតស្មុគស្មាញច្រើន វានឹងចាប់ផ្តើមបញ្ជាឱ្យរាងកាយរបស់អ្នកស្តាប់តាមវា ពោលគឺគិតរឿងមិនល្អច្រើន រាងកាយក៏ហត់នឿយតាមនោះដែរ។ ពេលអ្នកជួបបញ្ហាបែបនេះ គួរប្រញាប់ហ្វឹកហាត់ស្មារតីរបស់អ្នកឱ្យគិតរឿងល្អៗវិញ និង ទម្លាប់ធ្វើអ្វីដែលផ្តល់នូវភាពរីករាយដល់ខ្លួនឯង។ ពេលនោះអ្នកនឹងមានថាមពលខ្លាំងជាងគំនិតអវិជ្ជមានទាំងអស់នោះ ហើយនឹងអាចគ្រប់គ្រងវាបាន។

រូបតំណាង

៩. ភ្លេចរស់នៅក្នុងបច្ចុប្បន្នកាល

ពេលខ្លះ ការគិតរឿងពីអតីតកាល និង អនាគតកាល វាធ្វើឱ្យមនុស្សភ្លេចអបអរនឹងបច្ចុប្បន្នកាលរបស់ខ្លួន។ បើអ្នកចាប់អារម្មណ៍ថាអ្នកកំពុងមានសញ្ញានេះ អ្នកគួរត្រឡប់មកស្រឡាញ់ និង ពេញចិត្តនូវអ្វីដែលអ្នកកំពុងជួបប្រទះវិញ ជៀសជាងទៅគិតពីអតីតកាលដែលមិនអាចត្រឡប់ ឬ អនាគតកាលដែលមិនទាន់សូម្បីតែកើតមានឡើង៕

អានបន្ត៖ ពាក្យទាំង ៥ហាមនិយាយ ទៅកាន់មនុស្សកំពុងបាក់ទឹកចិត្ត

ប្រភព៖ powerofpositivity ប្រែសម្រួល៖ Siyou Tang