ទីតាំងប្រជ្រុយដែលបង្ហាញលក្ខណៈផ្សេងៗគ្នា ពីមនុស្សស្រី

2021-01-11 02:15:00
ចំនួនមតិ 0 | ចំនួនចែករំលែក 0

យោងតាមក្បួនទស្សន៍ទាយ ប្រជ្រុយអាចបង្ហាញពីជោគវាសនាអនាគត ចិត្តសាស្ត្រ រួមទាំងប្រភេទបុគ្គលិកលក្ខណៈរបស់មនុស្សនោះផងដែរ។ អាស្រ័យលើទីតាំងប្រជ្រុយ វាអាចស្ដែងចេញនូវរឿងដ៏គួរឲ្យចាប់អារម្មណ៍ផ្សេងៗ ដែលគ្រប់គ្នាស្ទើរតែមិនដឹង សូម្បីម្ចាស់សាមីខ្លួន។ ដូច្នេះ បើអ្នកមានប្រជ្រុយនៅទីតាំងណាមួយ អាចផ្ទៀងផ្ទាត់ដូចខាងក្រោម៖

១. លើថ្ងាស

រូបតំណាង

មនុស្សស្រីមានប្រជ្រុយនៅទីតាំងនេះ ជាមនុស្សមានសំណាងខ្លាំងណាស់។ ទោះជានាងមិនបានរៀបការជាមួយបុរសជាអ្នកមានក៏ដោយ ក៏នាងនៅតែមានទ្រព្យចាយវាយដោយបុណ្យវាសនារបស់ខ្លួនដែរ។ ជីវិតរបស់មនុស្សស្រីមានប្រជ្រុយបែបនេះ កម្រប្រទះបញ្ហាលុយកាក់ណាស់។

២. លើថ្ពាល់

រូបតំណាង

បើមានប្រជ្រុយលើថ្ពាល់ខាងស្ដាំ បង្ហាញថាអ្នកជាមនុស្សស្រីមានភ័ព្វ។ ជាញឹកញាប់ តែងទទួលបានការគោរពពីអ្នកផងទាំងពួង និងច្រើនតែមនុស្សមានយសសក្កិកោតស្ងប់ស្ងែង។ រីឯផ្លូវស្នេហាវិញ រមែងជួបតែរឿងផ្អែមល្ហែម។ ចំពោះបុគ្គលិកលក្ខណៈវិញ អ្នកជាមនុស្សមានភាពស្ងប់ស្ងាត់ដែលនេះជាភាពទាក់ទាញខ្លាំងក្លាបំផុតចំពោះមនុស្សប្រុស។ នៅពេលកសាងជីវិតអាពាហ៍ពិពាហ៍ ច្រើនតែជួបសុភមង្គល និងមានមង្គលការដែលអ្នកផងច្រណែន។

សម្រាប់មនុស្សស្រីមានប្រជ្រុយលើថ្ពាល់ខាងឆ្វេងវិញ មានផ្លូវចិត្តបែបសន្តិភាព និងតែងតែរីករាយ រួមទាំងចេះទទួលស្គាល់ការពិតដែលកើតឡើងចំពោះមុខផងដែរ។

៣. លើបបូរមាត់

រូបតំណាង

ចំពោះអ្នកមានប្រជ្រុយលើបបូរមាត់ខាងលើ ត្រូវគេចាត់ទុកជាមនុស្សពូកែនិយាយ និងមានភាពស្មោះត្រង់បំផុតក្នុងទំនាក់ទំនង។ អ្នកក៏ពូកែខាងញ៉ាំមិនធម្មតាដែរ ដូច្នេះហើយអ្នកមិនសូវបារម្ភច្រើនពីបញ្ហាហិរញ្ញវត្ថុនោះទេ។ បើនិយាយពីស្នេហាវិញ នាងតែងជាមនុស្សដែលចាប់ផ្ដើមមុន ហើយពេលខ្លះរងគ្រោះឈឺចាប់ដោយសារតែបញ្ហានេះផងដែរ។

យ៉ាងណាមិញ ចំពោះមនុស្សស្រីមានប្រជ្រុយលើបបូរមាត់ខាងក្រោម ជាមនុស្សមិនសូវរវីរវល់នឹងរឿងស្នេហាប៉ុន្មានឡើយ។ នាងជាមនុស្សចង់បានលេខ១ មិនថាពេលរៀនសូត្រ ឬធ្វើការនោះទេ។ ម្ល៉ោះហើយ មិនថាថ្នាក់លើឬអ្នកក្រោមបង្គាប់ រមែងកោតសរសើរនាងជានិច្ច ដោយសារតែសមិទ្ធផលការងាររបស់នាង រមែងទទួលបានជោគជ័យ។

៤. លើចង្កា

រូបតំណាង

អ្នកដែលមានប្រជ្រុយនៅទីតាំងនេះ ច្រើនតែជីវិតការងារ និងរឿងរ៉ាវផ្ទាល់ខ្លួនម្ដងឡើងម្ដងចុះ មិនទៀងទាត់។ នាងជាមនុស្សមិនចូលចិត្តនៅស្ងៀមមួយកន្លែងឡើយ ដែលនេះជាការចាប់អារម្មណ៍យ៉ាងពិសេសមួយពីសំណាក់មនុស្សមានភេទផ្ទុយ។ យ៉ាងណាក៏ដោយ តាមក្បួនទស្សន៍ទាយ មនុស្សស្រីមានប្រជ្រុយលើចង្កា រមែងប្រឈមនឹងជំងឺផ្សេងៗ ពិសេសគឺជំងឺបេះដូង។

៥. លើបំពង់ក

រូបតំណាង

ផ្ដោតលើទីតាំងរបស់ប្រជ្រុយមនុស្សស្រីដែលមានចំពាក់កណ្ដាលបំពង់ក ត្រូវគេចាត់ទុកថា ជាមនុស្សមានតម្លៃថ្លៃជាងមាសទៅទៀត។ នាងជួបរឿងសប្បាយរីករាយទាំងការងារ និងស្នេហា។ បើមានទីតាំងនៅជ្រុងខាងស្ដាំ ត្រូវគេយល់ថាជាមនុស្សមានភាពរឹងមាំ ចូលចិត្តសាកល្បងអ្វីថ្មីៗ ព្រមទាំងចូលចិត្តស្រាវជ្រាវដើម្បីដឹងពីរឿងរ៉ាវប្លែកៗផងដែរ។ ផ្ទុយមកវិញ សម្រាប់មានប្រជ្រុយនៅទីតាំងខាងឆ្វេង ជាមនុស្សដែលតែងត្រូវការជំនួយពីមនុស្សជុំវិញ។

រូបតំណាង

យ៉ាងណាក៏ដោយ ការទស្សន៍ទាយដោយផ្អែកលើទីតាំងប្រជ្រុយលើរាងកាយ មិនថាចេញមកល្អ ឬមិនល្អនោះទេ វាមិនទាក់ទងខ្លាំងពេកលើអនាគតរបស់នរណាឡើយ។ ភាពជោគជ័យ សុភមង្គល នឹងចូលមកឆាប់ៗលើអ្នកទាំងឡាយណាដែលខំប្រឹងប្រែង ចេះយកអសារដោយស្មោះត្រង់ជាមួយមនុស្សនៅជិតខ្លួន៕

អានបន្ត៖ ចង់ដឹងថាខ្លួនឯងជាមនុស្សបែបណា រើសយកកញ្ចក់មួយ ហើយមើលចម្លើយ

ប្រភព៖ bestie ប្រែសម្រួល៖ លឹម សុនា