Zhang Zi Yi ហៅតារាស្រករក្រោយថា បន្ទាបតម្លៃតារាសម្ដែង ព្រោះមូលហេតុនេះ

2021-01-05 13:30:00
ចំនួនមតិ 0 | ចំនួនចែករំលែក 0

តារាចម្រៀងស្រី Aria Jin ត្រូវបានកំពូលតារាសម្ដែងស្រីជើងចាស់ចិន Zhang Zi Yi ស្ដីឲ្យថា មិនផ្ដោតអារម្មណ៍លើជំនាញរបស់ខ្លួន ដោយចង់សម្ដែងរឿងទាំងគ្មានការផ្ចង់អារម្មណ៍ដិតដល់។ បណ្ដាញព័ត៌មាន Sina កាលពីថ្ងៃទី ២ ខែមករាបានរាយការណ៍ថា ថ្មីៗនេះ តារាចម្រៀងស្រី Aria Jin បានចូលប្រលងក្នុងកម្មវិធី I Am Actor រដូវកាលទី៣ ដែលមានរាជិនីភាពយន្ត Zhang Zi Yi ជាគណកម្មការ។ ចូលប្រលងនៅក្នុងវគ្គនេះ ស្រីស្អាត២១ឆ្នាំ សម្ដែងតួអង្គដណ្ដើមប្ដីគេឈ្មោះ Lin You You ក្នុងរឿង Just Thirty។

យ៉ាងណាក្ដី ការបង្ហាញសមត្ថភាពរបស់នាងត្រូវគណកម្មការចុចឲ្យឈប់សម្ដែងកណ្ដាលទី។ ក្រោយមកតួរឿង Memoirs of a Geisha បានបញ្ចេញមតិថា៖ តារារលកក្រោយនេះមិនផ្ដោតលើការច្រៀង តែបែរចង់មកសម្ដែងទៅវិញ ទាំងគ្មានការត្រៀមទុកអ្វីសោះ។

“ហេតុអ្វីដាច់ខាតត្រូវធ្វើតារាសម្ដែង តើអាជីពជាតារាសម្ដែងអន់ថយណាស់មែនទេ? ហេតុអ្វីអ្នកណាក៏ចង់លូកបែបនេះ? ពួកខ្ញុំសុទ្ធតែគោរពការសម្ដែងនៅទីនេះទាំងអស់ តែអ្នកទាំងអស់មានដឹងទេថា ដើម្បីយកបានតួមួយ ពួកខ្ញុំត្រូវលះបង់អ្វីខ្លះ ទើបបង្កើតបានតួដែលគេមិនបំភ្លេចបានមួយ។ បើពួកអ្នកទាំងអស់គ្នាគ្មានជំនឿចិត្តនោះទេ មិនបាច់ឈរលើឆាកនេះទេ” Zhang Zi Yi បញ្ចេញមតិ។

តាម Sina អ្វីដែលធ្វើឲ្យ តារាសម្ដែងលំដាប់ A ខាងលើខឹងនោះគឺ នៅពេលនេះ តារាចម្រៀងជាច្រើនកំពុងតែលូកចូលមកវិថីសម្ដែង ទាំងខ្លួនគ្មានសមត្ថភាព។ ជាក់ស្ដែងស្រីស្អាត ២១ឆ្នាំខាងលើ ល្បីឈ្មោះដោយសារកម្មវិធី Youth With You តែក្រោយពេលកម្មវិធីចប់ នាងមិនបានឡើងច្រៀងអ្វីទេ តែបែរជាចង់បង្វែរទៅចាប់អាជីពសម្ដែងវិញ ទាំងមុននោះមិនមានបទពិសោធន៍សោះ៕

ប្រភព៖ news.zing.vn ប្រែសម្រួល៖ Caramel