Wallace Huo ព្រួយបារម្ភព្រោះ ចៀវៃមានទម្លាប់ផឹកស្រាច្រើនពេក
- 2020-12-30 02:35:00
- ចំនួនមតិ 0 | ចំនួនចែករំលែក 0
Wallace Huo ព្រួយបារម្ភព្រោះ ចៀវៃមានទម្លាប់ផឹកស្រាច្រើនពេក
ចូលរួមក្នុងកម្មវិធីថ្មីបំផុត តារាសម្ដែងស្រីជើងចាស់តៃវ៉ាន់ Ruby Lin បានបង្ហើបឲ្យដឹងថា ស្វាមីរបស់នាងបារម្ភជាខ្លាំងនៅពេលដឹងថាប្រពន្ធថតកម្មវិធី ត្បិតលោកដឹងថានាងចូលចិត្តញ៉ាំស្រា។
កាលពីថ្ងៃទី ២៩ ខែធ្នូកន្លងទៅនេះ បណ្ដាញព័ត៌មាន Sina បានឲ្យដឹងថាតារាសម្ដែងស្រីជួរមុខតៃវ៉ាន់ Ruby Lin បានទទួលពាក្យចូលរួមក្នុងកម្មវិធីចំអិនអាហារថ្មី។ នៅក្នុងកម្មវិធីនេះ អ្នកម្ដាយកូន១ បានបង្ហាញពីទេពកោសល្យធ្វើនំដ៏ល្អរបស់ខ្លួន។
យ៉ាងណាក្ដី អ្វីដែលធ្វើឲ្យអ្នកគ្រប់គ្នាចាប់អារម្មណ៍នោះគឺ អំឡុងពេលរង់ចាំនំឆ្អិននេះ ស្រីស្អាត៤៤ឆ្នាំបានគាស់ស្រាសាំប៉ាញ ញ៉ាំជាមួយមិត្តរួមកម្មវិធីជាច្រើនកែវ។ ក្រោយពេលផឹកបានច្រើនបន្តិច តួរឿងព្រះនាងយេយេបានឲ្យដឹងថា តាមការពិតទៅ នៅពេលដឹងថានាងទទួលពាក្យចូលរួមក្នុងកម្មវិធីនេះ ប្ដីរបស់នាង ដែលជាតារាសម្ដែងប្រុស Wallace Huo មិនសូវត្រេកអរប៉ុន្មានឡើយ ដោយដឹងទម្លាប់របស់ប្រពន្ធថា ចូលចិត្តញ៉ាំស្រា។ ហើយត្រូវថតកម្មវិធីធ្វើម្ហូបបែបនេះទៀត គឺជៀសមិនផុតពីការផឹកស្រាឡើយ។ បើនៅផ្ទះ គឺតែងតែមានលោកនៅដាស់តឿនកុំឲ្យនាងផឹកជ្រុល តែនៅពេលថតកម្មវិធីម្នាក់ឯងបែបនេះ គឺនាងពិបាកហាមខ្លួនឯងខ្លាំងណាស់។
ជាក់ស្ដែងដូចសម្ដីនាងនិយាយមែន ស្រាសាំប៉ាញមួយដប គឺតារាកើតឆ្នាំ ១៩៧៦ ផឹកតែមួយភ្លែតគឺអស់តែម្ដង។ មនុស្សជាច្រើនបានបញ្ចេញមតិថា ស្រីស្អាតខាងលើអាយុជ្រេដែរហើយ មិនគួរញ៉ាំគ្រឿងស្រវឹងច្រើនពេកនោះឡើយ៕