Zheng Shuang ត្រូវគេសង្ស័យថា ដៀមដាម Yang Mi វះកាត់កែសម្ផស្ស
- 2020-12-28 02:55:00
- ចំនួនមតិ 0 | ចំនួនចែករំលែក 0
Zheng Shuang ត្រូវគេសង្ស័យថា ដៀមដាម Yang Mi វះកាត់កែសម្ផស្ស
ដោយសារតែសម្ដីតែមួយឃ្លារបស់តារាសម្ដែងស្រីល្បីឈ្មោះចិន Zheng Shuang បានធ្វើឲ្យអ្នកគាំទ្ររបស់នាង និងអ្នកគាំទ្ររបស់កំពូលតារាសម្ដែងស្រី Yang Mi ឈ្លោះគ្នាយ៉ាងអឺងកងលើបណ្ដាញសង្គម។
ថ្ងៃបុណ្យណូអែលឆ្នាំនេះ តារាស្រីចិនដែលល្បីផ្ទុះជាងគេគឺគ្មានអ្នកណាក្រៅពីតារាសម្ដែងស្រីជួរមុខចិន Zheng Shuang នោះឡើយ។ ដោយតាមនោះដែរ នៅក្នុងកម្មវិធីមួយដែលខ្លួនចូលរួម មនុស្សជាច្រើនបានសង្ស័យថា នាងបានដៀមដាមដល់តារារៀមច្បង គឺស្រីស្អាត Yang Mi ថាហ៊ានស៊ីមិនហ៊ានសង។
តាមនោះដែរ នៅក្នុងកម្មវិធីអំពីសម្រស់មួយ ស្រីស្អាតវ័យ ២៩ឆ្នាំបានសួរទៅអ្នកជំនាញថា តើការដកធ្មេញថ្គាម អាចធ្វើឲ្យមុខតូចបានទេ។ អ្នកជំនាញបានឆ្លើយទៅកាន់នាងវិញថា៖ មិនអាចធ្វើឲ្យមុខតូចដូចការចាក់ថ្នាំបានឡើយ។ នៅពេលនេះ តួរឿង Love O2O បានសួរបន្ថែមថា៖ ចុះម៉េចមានអ្នកថាដកធ្មេញថ្គាមហើយ នឹងធ្វើឲ្យមុខតូចនោះ? នៅពេលនេះ អ្នកជំនាញនិយាយអ្វីមិនចេញ ត្រូវសម្ងំយ៉ាងយូរទើបសួរថា៖ មិនមែនអ្នកនៅក្នុងសិល្បៈនិយាយទេឬ?
ដោយសារតែសំនួរចាក់ដោតខាងលើ មនុស្សជាច្រើនកំពុងសង្ស័យថា ស្រីស្អាតកើតឆ្នាំ ១៩៩១ កំពុងដៀមដាមរៀមច្បង Yang Mi ដោយកាលពី១០ឆ្នាំមុន អ្នកម្ដាយកូន១ធ្លាប់ប្រាប់ថា៖ កាលពីឆ្នាំ ២០០៧ នៅពេលថតរឿងថ្មី ខ្ញុំបានដកធ្មេញថ្គាម៤ ដែលធ្វើឲ្យមុខខ្ញុំតូចជាងមុនច្រើនណាស់។ តាមការបកស្រាយខាងលើ មនុស្សជាច្រើនគិតថា Zheng Shuang ចង់ថាឲ្យ Yang Mi វះកាត់ថ្គាមឲ្យតូច តែមិនហ៊ានសារភាពទើបប្រាប់ថាមកពីដកធ្មេញ។
នៅលើបណ្ដាញសង្គម អ្នកគាំទ្ររបស់តួឯករឿង និស្ស័យស្នេហ៍ទេវតា៣ជាតិបានបញ្ចេញមតិថា៖ Zheng Shuang ខ្លួនឯងក៏កែមុខដែរ ម៉េចក៏ថាឲ្យគេបែបនេះ។ តែក៏មានមតិលើកឡើងថា នេះគ្រាន់តែជាការភាន់ច្រឡំដោយ Zheng Shuang មិនបានតម្រង់ទៅកាន់ Yang Mi ឡើយ។ ទោះបីជាមិនទាន់ដឹងការពិតយ៉ាងណាក្ដី តែក្រុមអ្នកគាំទ្ររបស់តារាស្រីទាំង២កំពុងឈ្លោះគ្នាបយ៉ាងអឺងកង៕