ក្រឡេកមើលឡើងវិញទោះកូវីដ១៩រាតត្បាតសាហាវ យ៉ាងហោច២០២០ ក៏បានបង្រៀនមនុស្សនូវមេរៀន៥យ៉ាងនេះ

2020-12-23 04:05:00
ចំនួនមតិ 0 | ចំនួនចែករំលែក 0

អំឡុងពេលកូវីដ១៩ វាបានធ្វើឲ្យពិភពលោកក្រឡាប់ចាក់យ៉ាងខ្លាំង រហូតមានមនុស្សមួយចំនួនយល់ថា ២០២០ គឺជាឆ្នាំមិនល្អសម្រាប់ភពផែនដីមួយនេះ។ យ៉ាងណាក៏ដោយ បើអ្នកងាកមើលមួយជ្រុងទៀត អ្នកនឹងដឹងថាវាក៏បង្ប់នូវផលវិជ្ជមានច្រើនដែរសម្រាប់មនុស្សជាតិ។

១. គម្លាតសង្គម បង្កើតឱកាសជិតស្និទ្ធដល់សមាជិកគ្រួសារ

ខណៈពេលកូវីដ១៩កំពុងរាតត្បាត ការកាត់បន្ថយចេញដើរខាងក្រៅគឺជារឿងដែលគ្មាននរណាចង់នោះទេ តែបើយើងក្រឡេកពីផលវិជ្ជមានវិញ នេះគឺជាពេលវេលាដ៏មានន័យក្នុងការបង្កើតភាពជិតស្និទ្ធជាមួយក្រុមគ្រួសារ។ មនុស្សជាច្រើនតម្រូវឲ្យធ្វើការពីផ្ទះ សិស្សសាលាតម្រូវឲ្យរៀនតាម Online ពីផ្ទះ ហើយវាបានក្លាយជាឱកាសជួបជុំគ្នាជាមួយសមាជិកគ្រួសារ ច្រើនជាងជួបជុំមិត្តភក្កិ។ ពួកគេអាចចូលរួមចម្អិនអាហារជាមួយគ្នា ជួយកិច្ចការងារផ្ទះ … ដែលរឿងទាំងនោះកាលពីមុន គឺមនុស្សជាច្រើនកម្រមានពេលវេលាធ្វើរួមគ្នាណាស់។ ថ្វីត្បិតសកម្មភាពទាំងនោះមើលទៅសាមញ្ញ តែវាមានតម្លៃ និងកក់ក្តៅ បំផុត។

២. ឱកាសរៀនមុខជំនាញថ្មីៗ

ខណៈដែលមនុស្សភាគច្រើនជ្រើសរើសយកការគេងស្ទើរពេញមួយថ្ងៃ ខ្ជិលធុញថប់ ឬលេងហ្គេមកម្សាន្តអារម្មណ៍អំឡុងពេលកូវីដ១៩ តែបើយើងក្រឡេកមើលមួយជ្រុងទៀត នោះគឺជាពេលវេលាដ៏អស្ចារ្យសម្រាប់បន្ថែមចំណេះដឹងថ្មីៗនិងមុខជំនាញផងដែរ។ មនុស្សធម្មតានៅពេលជួបស្ថានភាពលំបាក គេនឹងស្តីបន្ទោសខ្លួនឯងមិនចង់ដើរទៅមុខ តែសម្រាប់មនុស្សជោគជ័យវិញ នឹងចាប់ឱកាសយ៉ាងលឿនពីស្ថានភាពដ៏តានតឹង ដើម្បីច្នៃឲ្យទៅជាមានប្រយោជន៍។

៣. កាន់តែយកចិត្តទុកដាក់លើសុខភាពមួយកម្រិតទៀត

អំឡុងកូវីដកំពុងផ្ទុះខ្លាំង វាបានឆក់យកជីវិតមនុស្សរាប់ម៉ឺននាក់ជារៀងរាល់ថ្ងៃ មិនថាជាអ្នកមាន អ្នកក្រ មានបុណ្យសក្កិ ឬមនុស្សតូចទាបឡើយ។ នេះបានបង្ហាញឲ្យឃើញថា សុខភាពគឺជាមូលដ្ឋានគ្រឹះនៃជីវិត ហើយបើគ្មានសុខភាពល្អទេ គ្រប់យ៉ាងក៏គ្មានតម្លៃអ្វីទាំងអស់។ ដូច្នេះ ស្ថានភាពនេះបានបង្រៀនមនុស្សឲ្យចេះយកចិត្តទុកដាក់លើសុខភាពខ្លួនឯងកាន់តែច្រើន តាមរយៈការចេះលៃលកពេលវេលាចូលគេងឲ្យបានគ្រប់គ្រាន់ យកចិត្តទុកដាក់លើរបបអាហារ និងធ្វើលំហាត់ប្រាណឲ្យបានច្រើនផងដែរ។

៤. ចេះរីករាយសូម្បីរឿងតូចតាច ក្នុងជីវិត

ពួកយើងសុទ្ធតែដឹងគ្រប់គ្នាថា ជីវិតមនុស្សមិនទៀងទាត់ទេ គឺវាអាចបញ្ចប់បានគ្រប់ពេលនៅវិនាទីណាមួយ។ ហេតុនេះ បើព្រឹកឡើង អ្នកនៅតែអាចក្រោកមើលឃើញពន្លឺព្រះអាទិត្យបាន គួរតែអរគុណជីវិតមួយនេះទៅ។ គួររៀនរីករាយសូម្បីតែរឿងតូចតាចក្នុងជីវិតរបស់អ្នក រៀនផ្តល់ក្តីស្រលាញ់ដល់មនុស្សនៅក្បែរអ្នក និងរៀនលើកទឹកចិត្តដល់គ្នាទៅវិញទៅមក។

៥. ចេះពីរបៀបសន្សំលុយ

យើងទាំងអស់គ្នា សុទ្ធតែប្រាប់គ្នាថា គ្រប់យ៉ាងសុទ្ធតែអាចកើតឡើងនៅថ្ងៃស្អែក ដូច្នេះ ត្រូវរស់នៅថ្ងៃនេះឲ្យដូចថ្ងៃចុងក្រោយ។ យ៉ាងណាក៏ដោយ នេះមិនមានន័យថា យើងត្រូវចំណាយលុយទាំងអស់ទៅលើអ្វីមួយ ហាក់ដូចគ្មានរឿងអ្វីកើតឡើងនៅថ្ងៃស្អែកនោះដែរ។ ហេតុនេះ អ្នកត្រូវរៀនសន្សំលុយឲ្យបានគ្រប់គ្រាន់ យ៉ាងហោចសម្រាប់ការផ្គត់ផ្គង់ ៣- ៦ ខែខាងមុខ ក្នុងករណីដែលយើងត្រូវជួបស្ថានភាពបាត់បង់ប្រាក់ចំណូលណាមួយភ្លាមៗ។

ពេលនេះ ២០២០ ជិតដាច់ផុតហើយ ដូច្នេះអ្នកគួរអរគុណចំពោះជីវិតមួយនេះ អរគុណដែលអ្នកនៅតែរស់នៅលើផែនដីនេះបាន ។ ឆ្នាំ២០២១ កាន់តែជិតចូលមកដល់ រឿងទុក្ខព្រួយ ក្តីបារម្ភផ្សេងៗសូមឲ្យជៀសឆ្ងាយ និងរស់នៅដោយភាពស្ងប់សុខ និងសុភមង្គល៕

ប្រភព៖ emdep ប្រែសម្រួល៖ លឹម សុនា