ស្ទើរតែមិនជឿ បុរសម្នាក់ត្រូវឆ្កែខ្លួនឯងបាញ់ធ្លុះជើង

2020-11-16 03:51:00
ចំនួនមតិ 0 | ចំនួនចែករំលែក 0

បើដឹងថាចិញ្ចឹមសត្វឲ្យវេទនាខ្លួនបែបនេះ បែបម្ចាស់សត្វឆ្កែមួយនេះ មិនយកមកចិញ្ចឹមតាំងពីដំបូងម្ល៉េះ។ បុរសវ័យកណ្ដាលម្នាក់មកពីរដ្ឋ Texas សហរដ្ឋអាមេរិក ត្រូវទៅសង្គ្រោះបន្ទាន់ភ្លាមៗ ក្រោយហេតុការណ៍មួយដែលនឹកស្មានមិនដល់ ដោយលោកត្រូវគ្រាប់កាំភ្លើងបាញ់ត្រូវខ្លួន។ តែជនដៃដល់ដែលបាញ់លោកនោះ មិនមែនជាមនុស្សឡើយ។

ជាក់ស្ដែង តាមការរាយការណ៍របស់ប៉ូលិសក្រុង Plano រដ្ឋ Texas បានឲ្យដឹងថា បុរសខាងលើ មានចំណូលចិត្តសៀតកាំភ្លើងនៅចង្កេះខោរបស់ខ្លួន។ នៅថ្ងៃកើតហេតុ នៅពេលដែលកំពុងពរឆ្កែរបស់ខ្លួន ឆ្កែនេះក៏ជ្រុលជើងទៅប៉ះកៃកាំភ្លើងដែល ធ្វើឲ្យកាំភ្លើងនេះបាញ់ធ្លុះជើងម្ចាស់របស់វា។

សំណាងល្អ ដោយរបួសមិនទាន់ធ្ងន់ធ្ងរ ម្ចាស់ឆ្កែរូបនេះ បានជិះឡានទៅសង្គ្រោះបន្ទាន់ខ្លួនឯងភ្លាមៗ ក្រោយពេលត្រូវគ្រាប់កាំភ្លើងបាញ់ធ្លុះជើង។ ពេទ្យដែលព្យាបាលជនរងគ្រោះខាងលើបានឲ្យដឹងថា សំណាងល្អ គ្រាប់កាំភ្លើងមិនបានបាញ់ប៉ះសរសៃឈាម ដែលធ្វើឲ្យលោកមិនបានប៉ះពាល់ដល់អាយុជីវិតនោះទេ។ យ៉ាងណាក្ដី ពេទ្យក៏ផ្ដល់ដំបូន្មានថា ថ្ងៃក្រោយលោកមិនគួរពរឆ្កែនៅពេលសៀតកាំភ្លើងនៅខោទៀតឡើយ ព្រោះវាគ្រោះថ្នាក់៕

ប្រភព៖ Kenh14 ប្រែសម្រួល៖ Caramel