អត់គូយូរពេក ទៅអ៊ុតសក់ម៉ូដដូច Yangyang ក្រែងដូរវាសនា មានឯណាលទ្ធផលបានត្រឹមទឹកភ្នែក
- 2020-11-14 01:30:00
- ចំនួនមតិ 0 | ចំនួនចែករំលែក 0
អត់គូយូរពេក ទៅអ៊ុតសក់ម៉ូដដូច Yangyang ក្រែងដូរវាសនា មានឯណាលទ្ធផលបានត្រឹមទឹកភ្នែក
គេថារឿងដែលឆោតជាងគេនោះគឺកុំធ្វើត្រាប់តាមតារាអោយសោះ ពិតជាមិនខុសមែន។ ជាក់ស្ដែង ដោយសារតែចង់មានសក់ស្អាតដូចតារាសម្ដែងប្រុសល្បីឈ្មោះចិន Yangyang បុរសម្នាក់ត្រូវបៀមទុក្ខលើសដើម។
មនុស្សជាច្រើនតែងតែប្រាប់គ្នាតៗថា មិនថាប្រុស ឬស្រីក៏ដោយ នៅពេលទៅប្ដូរម៉ូដសក់ ត្រូវត្រៀមចិត្តត្រៀមកាយជាមុន ត្បិតវាអាចមាន២ករណីកើតឡើង ដោយបើសំណាង អ្នកនឹងស្អាតជាងមុន តែបើស៊យ អ្នកប្រាកដជាលែងចង់ចេញក្រៅតែម្ដង។
មុននេះបន្តិច បុរសម្នាក់ឈ្មោះ Xiao Shen មកទីក្រុង Shenzhen ប្រទេសចិន បានទទួលលទ្ធផលខ្លោចចិត្តក្រោយពេលផ្លាស់ប្ដូរម៉ូដសក់របស់ខ្លួន។ តាមនោះដែរ ដោយសារតែអាយុម្ភៃក្រាស់ហើយ តែនៅតែរកមិត្តស្រីមិនបាន ហើយឃើញគេកំពុងល្បីថា សក់រួញតិចៗដូចតារាសម្ដែងប្រុស Yangyang កំពុងតែពេញនិយមនោះ លោកក៏ប្ដេជ្ញាចិត្តទៅអ៊ុតសក់ ដោយរំពឹងថានឹងរកបានសង្សារនឹងគេ។
គួរឲ្យសោកស្ដាយ ក្រោយពេលអង្គុយនៅហាងអ៊ុតសក់អស់ជាង៤ម៉ោង បុរសខាងលើមិនឃើញដូច Yangyang ត្រង់ណា តែបែរជាមើលឃើញខ្លួនឯងថា ដូចតួ Medusa ដែលមានក្បាលសុទ្ធតែសត្វពស់ច្រើនជាង។ ម្ចាស់ហាងប្រាប់លោកថា ថ្ងៃស្អែកសក់នឹងរលាមកវិញ ហើយស្អាតជាងនេះ។ លោកក៏រាងស្ងប់ចិត្តបន្តិច ហើយត្រលប់ទៅផ្ទះវិញ។ យ៉ាងណាក្ដី ស្អែកឡើង សក់លោកបានរលាមកវិញមែនពិត តែលទ្ធផលក៏មិនប្រសើរជាងមុនប៉ុន្មាន។ លោកបានប្រាប់ខ្លួនឯងថា ថ្ងៃក្រោយម៉ូដសក់ណាដែលសមនឹងខ្លួននឹងទុកម៉ូដនឹងហើយ មិនតាមតារាទៀតឡើយ ព្រោះគ្មានលទ្ធផលមើលទៅស្អាតដូចពួកគេទេ៕